KUITIRA VAKACADHA
1: Cigondiso
CINOREVENYI?
Majimwamuna no vakaji pavanoitirana cigondiso mu mucadho wavo, ivona vanozouvona kuva wo kwenda no kwenda. Izvi zvinoita kuti vatame kuthya. Umwe nga umwe wavo anozothemba kuti apana anozorambhwa ngo umweni, pikija vecisongana no zvineso mu mucadho wavo.
Varovorani vamweni vari kwenderera mberi vari vese ngokuti ukama hwavo no shamwari, vari kuvavhunja kuti vacarambana. Asi cigondiso cavo cinodikana kucijikira pa rudo wavanawo umwe kuno umweni no kureremejana.
BHAIBHERI RINOTI: “Mwamuna aadikani kusiya mukaji wake.”—1 Vakorinte 7:11.
“Kudari makaita cigondiso co kuda mudoni wenyu kwenda no kwenda, amuzokasiki kunyangajwa kudari iyena akamuposera. Cimwenizve, munozokasika kumukumbira ruregerero kudari maposa ciri cese. Munozovona zvineso zvamunosongana nazvo inga ciphingovo haco, haiwa inga thangwe rinoita kuti murambane.”—Mika.
NGENYI ZVINOSISIRA?
Kudari pakamuka zvineso, varovorani vanonga vacizivi kuitirana cigondiso cokadi, vanorangarira kuti ‘atizivi kuitwa kuti tigare tese’ perapo vopsaka manera kuti varambane.
“Vandhu vazinji pavanoita mucadho, vanoronga kuti kudari zvikatama kufamba ushoni, ciro caushoni cavangaita ngo cokurambana. Vandhu vanocadha vecirangarira kuzorambana, vanonga vacizivi kuitirana cigondiso cokadi.”—Jeni.
ZVICINYI ZVAMUNGAITA?
AMBORANGARIRANYI KUDARI
Pamunonga mecivereketesana . . .
-
Munozvidemba meciti ngenyi makarovorana?
-
Munorangarira kuti zvaizova zviri nane kudari no makarovorana no mundhu umweni?
-
Muno mushambo wokumbonanga kuti “andicakudi” kana “ndinoda kupsaka mundhu umweni anondida”?
Kudari pano muvhunjo wamadavira kuti hina, wari inguva yokuvangisa cigondiso comakaitaya.
BHUISANANYI NO WAMAKAROVORANA NAYE NGO PAMUSORO PO MUVHUNJO JINOTEVERA
-
Mucadho wedu ucakavanga here? Kudari ucizivi, cinyi ciri kunesa?
-
Zvicinyi zvatingaita kuti mucadho wedu uve wakavanga kamare?
MAZANO
-
Garanyi mecitarirana mesajhe jo rudo
-
Vonesanyi kuti munoda mudoni wenyu ngo kudira foto yake pa meza yenyu yo kubasa
-
Foneranyi mudoni wenyu njiku jese. Itanyi zvondhozvo pamunonga muri kubasa kana mucipo pamuzi
BHAIBHERI RINOTI: “Mundhu acadoparajanisa zvakabatanijwa ndi Mwari.”—Mateu 19:6.
