“Tate ote ke mu pa shaa shoka tamu indile medhina lyandje.” — Johannes 16:23.

Oohapu dhaJesus ndhoka otadhi ulike sha yela nawa kutya Jehova okwa hala tu galikane kuye, ihe hamedhina lyiihongwathano, lyaamboka haku tiwa aayapuki, lyaayengeli, nenge lyoonakusa, ihe omedhina lyaJesus Kristus. Uuna tatu galikana kuKalunga medhina lyaJesus, otatu ulike kutya otu shi shoka Jesus e tu ningila. Jesus okwa ti: “Kape na ngoka ta vulu okuya kuTate, okuninga ta pitile mungame.” — Johannes 14:6.

“Anekeni omaudhigu geni koshipala she.”— Episalomi 62:8.

Uuna tatu galikana kuJehova, otu na okupopya ngaashi tatu popi natate omunahole. Pehala lyokulesha egalikano mokambo nenge okupopya ndyoka tu shi momutse, otu na okugalikana kuye nesimaneko notashi zi komutima.

“Ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.” — 1 Johannes 5:14.

MOmbiimbeli, Jehova Kalunga ote tu lombwele shoka te ke tu ningila naashoka a hala tu mu ningile. Opo omagalikano getu ga taambiwe ko kuKalunga, otwa pumbwa okugalikana kombinga yaashoka “she mu opalela.” Opo tu shi ninge, otwa pumbwa okukonakona Ombiimbeli, opo tu mu tseye nawa. Ngele osho twa ningi, omagalikano getu ota ka kala e ga hokwa.

Galikana kombinga yoompumbwe dhoye. Otatu vulu okugalikana kuKalunga kombinga yoompumbwe dhetu dhesiku kehe, ngaashi kombinga yiikulya, yomizalo noyehala lyokukala. Otatu vulu wo okugalikana kuye e tu pe uunongo tu ninge omatokolo ge li mondjila nosho wo oonkondo, tu vule okwiidhidhimikila omaudhigu. Otatu vulu okugalikana kuKalunga e tu pe eitaalo, e tu dhimine po noku tu kwathele. — Lukas 11:3, 4, 13; Jakob 1:5, 17.

Galikanena yalwe. Aavali mboka ye hole oyana ohaya kala ya nyanyukwa ngele oyana oye holathane. Jehova naye okwa hala oyana yokombanda yevi ya kale taya silathana oshimpwiyu. Oshi li nawa tu galikanene ookuume ketu kopandjokana, aanona yetu, yaandjetu nosho wo ookuume. Omulongwa Jakob okwa nyola a ti kutya natu “galikanenathane.” — Jakob 5:16.

Pandula Kalunga. Ombiimbeli otayi popi Omushiti gwetu tayi ti: “Okwa kala hi iholola miilonga iiwanawa mbyoka he yi ningile aantu: ohe mu pe omvula tayi zi kegulu niilya pethimbo lyo opala, ohe mu pe iikulya noha nyanyudha oomwenyo dheni.” (Iilonga 14:17) Uuna twa dhiladhila kombinga yaashoka Kalunga e tu ningila, otashi ke tu inyengitha tu mu pandule megalikano. Ihe, otu na wo okuulika kutya otwa pandula Kalunga meihumbato lyetu. — Aakolossa 3:15.

Omathimbo gamwe, otashi vulika tu uve nayi ngele omagalikano getu ga zi komutima itaga yamukulwa nziya. Mbela otu na okuthika pehulithodhiladhilo kutya Kalunga ke na ko nasha natse? Aawe! Tala kiiholelwa tayi landula mbyoka tayi ulike kutya otwa pumbwa okutsikila okugalikana.

Steve ngoka a popiwa moshitopolwa shopetameko ota ti: “Ando onda li ihaandi galikana, andola onda kanitha nale etegameno lyokukala nda nyanyukwa ishewe.” Oshike she mu kwathele a ninge elunduluko? Okwa tameke okukonakona Ombiimbeli nokwi ilongo kutya omolwashike sha simana okugalikana nokutsikila oku shi ninga. Steve ota ti: “Ohandi galikana kuKalunga tandi mu pandula omolwekwatho alihe ndyoka nda pewa kookuume kandje aaholike. Ngashingeyi onda nyanyukwa lela.”

Ongiini kombinga yaJenny ngoka a li ha kala e uvite kutya ina gwana okupulakenwa kuKalunga? Ota ti: “Uuna nda li ndu uvite kaandi na oshilonga sha sha, ondi indile Kalunga a kwathele ndje ndi mone kutya omolwashike ndi uvite ngaaka.” Shoka oshe mu kwathele ngiini? Ota ti: “Okugalikana kuKalunga okwa kwathela ndje ndi itale ko ngaashi ha tala ndje ko, ndi mone kutya nonando omutima gwandje ohagu pe ndje uusama, ye hasho ha ningi. Osha kwathele ndje wo kaandi teke omukumo, ihe nandi tsikile okukambadhala.” Oshizemo? Ota ti: “Egalikano olya kwathela ndje ndi mone kutya Jehova oko e li shili, omunahole, oKalunga e na ko nasha nangame, oTate nakuume kandje, ngoka ta kala aluhe nokwaambidhidha ndje nokukwathela ndje, shampa owala tandi tsikile nokuninga shoka a hala.”

Tala wo shoka sha ningilwa Isabel. Sho a ningi etegelelo, oondohotola dhe odha li dhe mu lombwele kutya okanona ke otaka ka valwa okalema. Okwa li a dhengwa pomutima. Yamwe oya li nokuli ye mu pe omayele e li kuthe mo. Ota ti: “Onda li ndi uvite nda fa tandi ka sa kuudhigu awuhe mboka wa li momutima gwandje.” Okwa ningi po shike? Ota ti: “Onda kala nokugalikana kuKalunga a kwathele ndje.” Okwa ka mona omwanamati, Gerard, nokwa li oshilema. Mbela Isabel oha kala ngaa e uvite kutya Kalunga okwa yamukula omagalikano ge? Eeno, osho ha kala e uvite! Momukalo guni? Isabel ota ti: “Uuna ndi wete omumwandje, ngoka ngashingeyi e na omimvo 14, ta nyanyukilwa onkalamwenyo nonando oku na uulema, ohandi shi mono mo kutya oye eyamukulo lya dhenga mbanda komagalikano gandje, eyambeko enene ndyoka Jehova Kalunga a pa ndje.”

Oohapu ndhoka dha zi komutima ohadhi tu ningitha tu dhiladhile koohapu dhika dhomupisalomi tadhi ti: “Ngoye Omuwa oto ka pulakena omagalikano gaafupi; oto ke ya tsa omukumo.” (Episalomi 10:17) Kage shi tuu omatompelo omawanawa ngoka tage tu ningitha tu kale hatu galikana aluhe!

MOmbiimbeli omu na omagalikano ogendji gaJesus. Ndyoka li shiwike nawa, oondyoka a longa aalongwa ye. Oshike tatu vulu okwiilonga mo mulyo?