Kalunga ke na okatongo nokwa hala okuyambeka aantu ayehe.

Kalunga okwa li a uvanekele omuhunganeki Abraham a ti kutya “omungoye iigwana ayihe otayi ka lalekwa nuuyamba.” — Genesis 12:3.

Shoka otashi tu longo shike? Kalunga oku tu hole noonkondo nokwa hala okuyambeka iigwana ayihe, ano aalumentu, aakiintu naanona mboka haya vulika kuye.

Kalunga omunahenda noha yambeke mboka taya ningi oonkambadhala ye mu tseye.

Omunankondoawike okwa li a pe omuhunganeki Moses oonkondo a longe iikumithalonga iinene. Ihe Moses okwa li a galikana a ti: “Tseyithila ndje oondjila dhoye, opo ndi ku tseye nondi kale ndi na ombili nangoye.” (Eksodus 33:13) Kalunga okwa li a hokwa eindilo lyaMoses nokwe mu yambeke moku mu pa ontseyo oyindji noku uve ko oondjila Dhe nomaukwatya ge. Pashiholelwa, Moses okwa li i ilongo kutya Omushiti ‘oKalunga omunamutimahenda nomunalukeno.’ — Eksodus 34:6, 7.

Shoka otashi tu longo shike? Kalunga okwa hala oku tu yambeka atuheni, aalumentu, aakiintu naanona ngele otwa kambadhala oku mu tseya nawa. Ote shi ulike mOmbiimbeli nkene e na okulongelwa nankene a halelela okukala e tu hokwa noku tu yambeka.

Kalunga ota vulu oku tu pa omayambeko taga kalelele ngele otwi ilongo kombinga yaashoka Jesus a ninga nokwe tu longa.

Otatu vulu okwiilonga iinima oyindji mOohapu dhaKalunga kombinga yonkalamwenyo yaJesus nomalongo ge. Kalunga okwa li a pe Jesus oonkondo dhokulonga iikumithalonga oyindji, ngaashi okutsikulula aaposi, okuthitulula oombolo nokwaaludha iitiningili. Okwa li wo a yumudha aasi. Kungawo Jesus okwa li a ulike kutya Kalunga ote ke etela aantu ayehe omayambeko ngoka monakuyiwa. Okwa li a yelitha kutya opo kehe gumwe gwomutse a ka mone omayambeko ngoka, oku na okuninga po sha. Okwa ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” — Johannes 17:3.

Jesus okwa li omunalukeno, omunahenda nomunambili. Aalumentu, aakiintu aagundjuka naakokele, oya li ya mbombolokele kuye sho e ya hiya pahole a ti: ‘Tseyii ndje, oshoka ongame omunambili nomomutima ondi ishonopeka; notamu imonene evululuko.’ (Mateus 11:29) Jesus okwa li a ungaunga naakiintu nolukeno nonesimaneko, kali a fa yalwe yopethimbo lye mboka ya li haya ungaunga nayi naakiintu.

Shoka otashi tu longo shike? Jesus okwa li e hole aantu nomutima aguhe nokwa tula po oshiholelwa sha dhenga mbanda sha nkene tu na okuungaunga nayalwe.

Oohapu dhaKalunga otadhi tu longo kutya “tseni otu na owala Kalunga gumwe” na Jesus Kristus okwa li omutumwa gwaKalunga omwiifupipiki. (1 Aakorinto 8:6) Jesus okwe shi popi sha yela kutya Kalunga omunene e mu vule nosho wo kutya Kalunga okwa li e mu tumu kombanda yevi. — Johannes 11:41, 42; 14:28. *