Okakadhona komimvo 13 osho ka li ku uvite ngawo, sho ka pewa omagano gokambwa. Omukiintu gumwe e na ongeshefa tayi ende nawa, okwa ti kutya okompiuta ndjoka a pelwe kuhe sho a li mosikola yopombanda, oyo omagano ngoka ga lundulula onkalamwenyo ye. Omusamane gumwe opo a hokana okwa li u uvite kutya okakalata hoka omukadhi e mu ningile ke li omagano goshituthidhimbuluko shohango yawo shotango, oko omagano omawanawa ngoka a pelwe.

Omumvo kehe, aantu oyendji ohaya longitha ethimbo olindji nohaya ningi oonkambadhala ya kongele ookuume kawo nenge aapambele yawo omagano omawanawa, pompito yi ikalekelwa. Oyendji ohaya kala ya hala omuntu ngoka ya pa omagano a popye oohapu dha fa ndhoka dha popiwa metetekelo. Ongiini kombinga yoye? Mbela owa hala okugandja nenge okupewa omagano omawanawa?

Okukala netegameno lya tya ngawo oshiwanawa lela, hamolwaashoka owala hashi nyanyudha nakugapewa, ihe omolwaashoka hashi nyanyudha wo omugandji. Ombiimbeli otayi ti: “Okugandja oku na elago ku vule okutaamba.” (Iilonga 20:35) Omuntu ngoka a gandja omagano oha kala u uvite elago nenge a nyanyukwa noonkondo, ngele ngoka e ga pa okwe ga pandula.

Ongiini nduno to vulu okukala ho gandja omagano ngoka tage ku nyanyudha notaga nyanyudha ngoka to ga pe? Nonando otashi vulika shi kale oshidhigu okugandja omagano ngoka wu uvite kutya omawanawa, oshike to vulu okuninga, opo ngoka to ga pe a kale e ga pandula shili?