SHOKA TASHI KWATHELE AAGUNDJUKA
9: Itseya mwene
OKWIITSEYA MWENE OSHIKE?
Okwiitseya mwene inaku kwatela mo owala okukala wu shi edhina lyoye neholokopo lyoye. Okwa kwatela mo omikalo, shoka wi itaala nosho wo omaukwatya goye. Onkee ano, okwiitseya mwene okwa kwatela mo uukwatya woye womeni nowokombanda.
OMOLWASHIKE OKWIITSEYA KWA SIMANA?
Uuna wu ishi nawa, iho etha wu kale to pangelwa komaakula, pehala lyaashono, oho popile shoka wi itaala.
Omumati gwedhina Adrian okwa ti: “Aantu oyendji oya fa owala omapopitha ga zalekwa ngoka hatu mono moositola. Hago haga hogolola shoka ge na okuzala, ihe ohaga zalekwa kuyalwe.”
Omukadhona gwedhina Courtney okwa ti: “Ondi ilonga okupopila shoka shi li mondjila, nonando kashi shi oshipu. Ohandi vulu okumona kutya ookuume kandje yashili oyeni, ngele tandi tala kwaashoka taya ningi nokunkene handi ihumbata uuna ndi li nayo.”
SHOKA OMBIIMBELI TAYI TI: “Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni.” — Aaroma 12:2.
SHOKA TO VULU OKUNINGA
Dhiladhila ngashingeyi kutya ngoye omuntu wa tya ngiini, nowa hala okukala omuntu a tya ngiini, mokutala omaukwatya goye omawanawa, omaunkundi goye naashoka wi itaala. Oto vulu oku shi ninga mokuyamukula omapulo taga landula.
Omaukwatya omawanawa: Ondi na uunkulungu wuni, nowino yini? Omaukwatya geni omawanawa ndi na? (Pashiholelwa: Mbela ondi shi okukwata ethimbo nawa? Ondi na eipangelo? Ohandi longo nuudhiginini? Ondi hole ngaa okugandja?) Iinima iiwanawa yini handi ningi?
EETOPO: Oto nyengwa okumona kutya omaukwatya omawanawa geni wu na? Ngele osho, pula omuvali gwoye nenge kuume koye ngoka wi inekela kutya omaukwatya omawanawa geni e wete mungoye nomolwashike ta tile ngawo.
SHOKA OMBIIMBELI TAYI TI: “Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.” — Aagalati 6:4.
Omaunkundi: Openi nda pumbwa okuninga omalunduluko? Uunake hashi kala oshidhigu kungame ndi sinde omamakelo? Omoonkalo dhini nda pumbwa eipangelo?
SHOKA OMBIIMBELI TAYI TI: “Ngele otatu ti kutya katu na oondjo, nena otatu ipukitha tse yene, noshili kayi mo mutse.” — 1 Johannes 1:8.
Eitaalo: Ohandi landula omikalo noohedhi dhini, nomolwashike? Ondi itaala ngaa kutya Kalunga oko e li? Uumbangi wuni wa kwathela ndje ndi shi itaale? Iinima yini ndi wete kutya oyi li mondjila, nomolwashike? Oshike ndi itaala tashi ka ningwa monakuyiwa?
SHOKA OMBIIMBELI TAYI TI: “Owino otayi ke ku tonatela, noondunge tadhi ke ku gamena.” — Omayeletumbulo 2:11.
Opu na ishewe uuyelele mbuka
OMAYAMUKULO GOMAPULO OMULONGO NGOKA AAGUNDJUKA HAYA PULA
Ongame lye?
Okukala wu shi omithikampango ndhoka ho iyutha kudho, uukwatya woye, omangambeko goye nomalalakano goye otashi ke ku kwathela wu ninge omatokolo ge li mondjila uuna to thiminikwa.
