PaJohannes 20:1-31
20 Mesiku lyotango lyoshiwike, Maria Magdalena okwa yi ongula onene kombila,* manga kwa li kwa luudha natango, nokwa mono kutya emanya olya undulwa po nale pombila.*
2 Onkee ano okwa matuka a uka kuSimon Petrus nosho wo komulongwa gumwe, ngoka a li e holike kuJesus, nokwa ti kuyo: “Oya kutha mo Omuwa mombila, nokatu shi mpoka ye mu tula.”
3 Nena Petrus nomulongwa omukwawo oya yi ya uka kombila.
4 Opo nduno ayehe yaali oya tameke okumatuka, ihe omulongwa ngoka okwa thigi po Petrus e ta thiki ko tango kombila.
5 Sho a hedha komeho, a ontamene mo, okwa mono mo omalapi goliina, ihe ina ya mo.
6 Opo nduno Simon Petrus, ngoka a li e mu landula, naye okwa thiki e ta yi mo mombila, nokwa mono mo omalapi goliina.
7 Elapi, ndyoka lya li komutse gwaJesus, kalya li pamwe nomakwawo, ihe olya li lya gonywa, li itulilwa olyo alike.
8 Opo nduno omulongwa, ngoka a thiki po tango pombila, naye wo okwa yi mo, nokwe shi imonene e ta itaale.
9 Ihe kaya li ye uvite ko natango enyolo, ndyoka tali ti kutya ota ka yumuka kuusi.
10 Onkee ano aalongwa mboka oya shuna komagumbo gawo.
11 Ihe Maria okwa kala a thikama pondje, popepi nombila, ta lili. Manga a li ta lili, okwa hedha komeho, a ontamene mombila,
12 nokwa mono mo aayengeli yaali, ya zala oonguwo oontokele, ya kuutumba mpoka pwa li pwa langekwa omudhimba gwaJesus, gumwe okwa gama mpoka pwa li pwa taalela omutse gwe, nagumwe oompoka pwa li pwa taalela oompadhi dhe.
13 Aayengeli mboka oya ti kuye: “Mukiintu ngoye, oto lilile shike?” Okwa ti kuyo: “Oya kutha mo Omuwa gwandje, nokandi shi mpoka ye mu tula.”
14 Konima sho a popi oohapu ndhoka, okwa punguluka, nokwa mono Jesus a thikama mpoka, ihe ina dhimbulula kutya oJesus.
15 Jesus okwa ti kuye: “Mukiintu ngoye, oto lilile shike? Oto kongo lye?” Molwaashoka okwa li ta dhiladhila kutya ngoka ta popi naye omulongi gwomoshikunino, okwa ti kuye: “Omusimanekwa, ngele ongoye we mu kutha mo, lombwele ndje mpoka we mu langeka, notandi yi ndi ke mu tale ko.”
16 Jesus okwe mu ithana ta ti: “Maria!” Sho a punguluka, okwa ti kuye mOshihebeli: “Rabboni!” (shoka tashi ti, “Muhongi!”)
17 Jesus okwa ti kuye: “Etha ndje, oshoka inandi londa natango, ndi ye kuTate. Ihe inda kaamwatate e to ya lombwele to ti: ‘Otandi londo, ndi ye kuTate, Ho yeni, Kalunga kandje naKalunga keni.’”
18 Maria Magdalena okwa yi, nokwa lombwele aalongwa ta ti: “Onda mona Omuwa!” Opo ihe okwe ya lombwele shoka Jesus e mu lombwele.
19 Mesiku lyotango lyoshiwike, sho kwa toko, aalongwa oya li ya gongala megumbo limwe, noya li ya ipatela mo, molwaashoka oya li ya tila Aajuda. Opo nduno Jesus okwa holoka, nokwa thikama mokati kawo e ta ti kuyo: “Ombili nayi kale nane!”
20 Konima sho a popi ngawo, okwe ya ulukile iikaha ye nosho wo molupati lwe. Nena aalongwa oya nyanyukwa noonkondo, sho ya mono Omuwa.
21 Jesus okwa ti ishewe kuyo: “Ombili nayi kale nane! Ngaashi owala Tate a tuma ndje muuyuni, nangame wo otandi mu tumu muuyuni.”
22 Konima sho a popi ngawo, okwe ya fudhile, nokwa ti kuyo: “Taambeni ombepo ondjapuki.
23 Ngele omwa dhimine po omuntu oondjo dhe, Kalunga naye ota dhimine po omuntu ngoka. Ihe ngele inamu mu dhimina po, Kalunga naye omuntu ngoka ite mu dhimine po.”
24 Ihe Tomas, gumwe gwomaayapostoli 12, ngoka ha ithanwa Omukwanambwiyu, ka li po, sho Jesus e ya holokele.
25 Onkee ano aalongwa yalwe oya li taye mu lombwele taya ti: “Otwa mona Omuwa.” Ihe okwa ti kuyo: “Otandi itaale owala, ngele onda mono iiyadhi yoomboha kiikaha ye, noku yi guma nomunwe gwandje nosho wo ngele onde mu gumu molupati lwe noshikaha shandje.”
26 Konima yomasiku gahetatu, aalongwa ye, natango, oya li ya gongala megumbo, naTomas okwa li pamwe nayo. Jesus okwe ya mo, nonando omiyelo odha li dha pata, nokwa thikama mokati kawo e ta ti kuyo: “Ombili nayi kale nane!”
27 Konima yaashoka, okwa ti kuTomas: “Tula ominwe dhoye piiyadhi, mbyoka yi li kiikaha yandje, kutha oshikaha shoye e to gumu oshiyadhi, shoka shi li molupati lwandje. Ino kala we wa limbililwa,* ihe itaala.”
28 Tomas okwe mu yamukula ta ti: “Omuwa gwandje, Kalunga kandje!”
29 Jesus okwa ti kuye: “Molwaashoka ngashingeyi owa mona ndje, owa itaala? Mboka haya itaale, nonando inaya mona, otaya kala ya nyanyukwa.”
30 Odhoshili kutya Jesus okwa longo wo iikumithalonga yimwe oyindji montaneho yaalongwa ye, mbyoka inaayi nyolwa mo mondhingambo ndjika.
31 Ihe iinima mbika oya nyolwa, opo mu itaale kutya Jesus oye Kristus, Omuna gwaKalunga, nongele omwa itaale, otamu ka mona omwenyo, omolwedhina lye.
Omanyolo gopevi
^ Nenge “kombiladhimbuluko.”
^ Nenge “pombiladhimbuluko.”
^ Eln., “ino kala we ihoo itaale.”
