Ombiimbeli inayi longitha uutumbulilo “okwiikutha ela” nelalakano yi humithe komeho okuhoya mo omala. Ihe nonando ongawo, oovelise odhindji mOmbiimbeli otadhi popi nkene Kalunga a tala ko omwenyo gwomuntu, nokuli nogwokanona hoka ke li mela natango.

Omwenyo omagano ga za kuKalunga. (Genesis 9:6; Episalomi 36:9) Okwa tala ko omwenyo kehe gu na ongushu, mwa kwatelwa nokuli nogwokanona hoka inaaka valwa. Onkee ano, ngele omuntu okwa dhipaga okanona hoka ke li mela owina, shoka osha tali ka ko edhipago.

Ompango ndjoka Kalunga a li a pe Aaisraeli oya ti: “Ngele oku na omukiintu omusimba, ndele ela tali gu mo, ye ina mona we oshiponga shilwe, ngoka e mu ehameke na fute, omulume shoka ta pula, nongaashi aatokolihapu ya koleke. Ihe ngele omukiintu mwene oye a si, nena egeelo otali pula omwenyo gu futwe nomwenyo.” — Eksodus 21:22, 23. *

•  Omwenyo gwomuntu ohagu tamekele peni?

•  Mbela Kalunga ota vulu ngaa okudhimina po omuntu ngoka i ikutha ela?

•  Mbela okukutha mo ela osha puka, uuna omwenyo gwomukiintu nenge gwokanona gu li moshiponga?

Kalunga okwa tala ko omwenyo gwomuntu okuza ngaa pesimbapalo. MOohapu dhe, Ombiimbeli, Kalunga oku ulika kutya okanona hoka inaaka valwa, oke li omuntu i ikalekelwa. Tala kiiholelwa tayi landula, mbyoka tayi ulike kutya momeho gaKalunga kapu na eyooloko pokati komwenyo gwokanona hoka ka valwa naahoka inaaka valwa.

• Kalunga okwa li a nwetha mo omukwaniilwa David a popye ta ti: “Owa mono ndje, manga inaandi valwa.” (Episalomi 139:16) Kalunga okwa li a tala ko David e li omuntu, nomanga nokuli inaa valwa.

• Shimwe ishewe, Kalunga okwa li e shi kutya ota ka pa omuhunganeki Jeremia oshinakugwanithwa shi ikalekelwa, omanga nokuli Jeremia inaa valwa. Kalunga okwe mu lombwele a ti: “Onde ku hogolola, manga inaandi ku shitila moshivalelo shanyoko, nomanga inoo valwa, onde ku yapula nonde ku lenge omuhunganeki gwiigwana.” — Jeremia 1:5.

• Omunyoli gwOmbiimbeli, Lukas, ngoka a li ondohotola, okwa longitha oshitya shOshigreka sha faathana, opo a popye kombinga yokanona hoka inaaka valwa nosho wo hoka ka valwa. — Lukas 1:41; 2:12, 16.

Mboka ya kutha mo omala, otaya vulu okudhiminwa po kuKalunga. Ngele ngashingeyi oya tala ko omwenyo ngaashi Kalunga he gu tala ko, itaya ka kala yu uvite ye na ondjo. Ombiimbeli otayi ti: “Omuwa oye omunamutimahenda nomunalukeno . . . Ngaashi uuzilo u li kokule nuuninginino, osho ta kaleke kokule natse oondjo dhetu.” * (Episalomi 103:8-12) Jehova oha dhimine po ayehe mboka yi iyela ombedhi shili, omolwomapuko gawo gomonakuziwa, mwa kwatelwa okwiikutha ela. — Episalomi 86:5.

Okutala kwaashoka Ombiimbeli ya popya shi na ko nasha nokanona hoka inaaka valwa, omuntu ita vulu owala okutokola okwiikutha ela, molwaasho tashi vulika omwenyo gwe nenge gwokanona gwu li moshiponga.

Ongiini ngele opwa holoka onkalo yontumba ya nika oshiponga pethimbo omukiintu a adha okupulumutha, ndjoka tayi pula pu ningwe ehogololo pokati kokuhupitha omwenyo gwomukiintu nenge gwokanona? Monkalo ya tya ngaaka, aantu mboka ya kwatelwa mo moshinima shoka, oyo ye na okuninga etokolo kutya omwenyo gwuni gu na okuhupithwa.