Ipan yejuin tlamachtijli tikitaskej yejuin:

•  ¿Tlenon noneki kichiuas se tajtli?

•  ¿Tlenon san ueli kichiua se tajtli?

•  Tajtin niman imichpokauan

•  Tlen kinpaleuis tajtin

•   Ijkuak xiuajnemi se konetsintli. Tla aman kuajli tiktlajpiya mokonetsin, noijki ijkon tikchiuas sakin ijkuak yonemiko. Se libro kampa kiteneua tlenon noneki kichiuas se tajtli, ijkin kijtoua:

   “Tla se tajtli iuan ontlakoua isiuauj ijkuak koneua, kita ipan se foto ijkuak ikonetsin peua yoliui noso kikaki kenon tekuini iyoltsin, yejua uelis más kitlasojtlas ikonetsin ijkuak tlakatis niman isiuatsin”.

   “Ijkuak nosiuauj koneua katka, xniknekiya ika nochi san yejua makichiua, ika yejon, onikpaleui. San sekan otitlayektlalijkej kampa kochiskia tokonetsin, tiknekiyaj ika ijkuak uajnemiskia maka itlaj makipolo. Melak kualtsin tlen topan onochiuj” (James).

   Texto tlen mitspaleuis: “Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli” (Filipenses 2:4).

•   Ijkuak uajnemi konetsintli. Nochipa xnapalo mokonetsin niman iuan xmauilti. Ijkon más nemotlasojtlaskej. Niman noijki, tejua iuan mosiuauj xmopaleuikan xtlajpiyakan nemokonetsin. Nochi tlen tejua tikchiuas kipaleuis mokonetsin kuajli manoskalti, niman kiteititis tla melauak tiktlasojtla.

   “Xmauilti iuan mokonetsin ipan piso. Maka xpinaui tikchiuas itlaj. Xkilnamiki ika tejua akin kachtopa noneki tikmachtis kenon tetlasojtlas” (Richard).

   Texto tlen mitspaleuis: “On tokoneuan yejuan tikintlakatiliaj, sen ueyi tlatiochiualistli yejuan toTEKO techmaka” (Salmo 127:3).

•   Ijkuak ueyixtiuj. Ixtlamatkej yokitakej ika kokonej akin kuajli nouika iuan intaj, más kuajli nomachtiaj ipan escuela. Noijki más kuajli nomachiliaj, niman uelis kinpaleuis niman ijkon xkitekitiltiskej drogas noso kichiuaskej itlaj okse tlen xkuajli. Kuakon, tajtin nochipa imiuan xnemikan nemokoneuan niman ijkon uelis más kuajli imiuan nemouikaskej.

   “Nokoneuj nechijliaya ika ijkuak xok touan chantiskia, melak kitemoskia kenon kuajli tonojnotsayaj ijkuak tonpaxalouayaj niman ijkuak san sekan titlakuayaj. Kemantika tonojnotsayaj itech itlaj tlen melak kualtsin maski nion xtiknemiliayaj titlajtoskej itech yejon. Niman ijkon panouaya pampa nochipa san sekan tinemiyaj” (Dennis).

   Texto tlen mitspaleuis: “Yejua ika kuajli xmotakan sano nemejuamej ken nemouikaskej. Maka xmouikakan ken on yejuan xtlamatkej, yej xmouikakan ken tlamatkej. Maka xpolokan tiempo, yej nochipa xchiuakan tlen kuajli” (Efesios 5:15, 16).

 Miyekej kinemiliaj ika se tajtli yejua akin noneki kinmakas ifamilia nochi tlen kimpoloua niman kintlajpiyas. Niman oksekimej kinemiliaj ika pampa siuamej más teikneliaj, yejuamej akin noneki kinpaleuiskej niman kinyolchikauaskej inkoneuan (Deuteronomio 1:31; Isaías 49:15). San ika, ipan seki familias xijkon panoua. Kemantika, se tajtli kichiua tlen nonekiskia kichiuas se nantli niman se nantli kichiua tlen nonekiskia kichiuas se tajtli. Maski ijkon, ixtlamatkej kijtouaj ika cada se kichiua ipan familia itlaj tlen xueli kichiua okse, ijkon ken se tlakuajli ijkuak kipiya nochi tlen noneki. a

 Yejon tlen ipan onochiuj Judith Wallerstein, akin okijkuilo se libro itech familia. Yejua kijtoua tlen opanok ijkuak iichpokatsin, akin kipiaya 12 xiuitl, okantikis carro. Ikoneuj kinekiya ika itaj makuika ipan ambulancia pampa kimachiliaya ika yejua más kuajli kipaleuiskia. San ika, ipan hospital kinekiya ika ompa manemi inan niman ijkon uelis kiyolseuis”. b

 “Se tajtli uelis kimakas ifamilia nochi tlen kipoloua niman kitlajpiyas, san ika, se nantli uelis ouijtika kichiuas nochi yejuin. Niman se nantli más kintlasojtla inkoneuan niman ijkuak itlaj kijliaj, kuajli kinkaki niman kimasikamati. Tajtli niman nantli san sekan nopaleuiyaj” (Daniel).

 Texto tlen mitspaleuis: “Nokoneu, xkaki niman xtlakamati motataj. Niman maka xtlalkaui on tlen mitsmachtia monanaj” (Proverbios 1:8).

 Ichpokamej uelis kitaskej tlenon kichiua intaj niman ijkon kimatiskej kenon oksekimej tlakamej noneki imiuan nouikaskej. Matikitakan tlenon uelis más tikmachtis mochpoch.

•   Ijkuak kita kenon timouika iuan mosiuauj. Tla tejua tiktlasojtla niman tiktlakaita mosiuauj, mochpoch kuajli kitlapejpenis iuan akinon nonamiktis (1 Pedro 3:7).

•   Ijkuak kitas kenon tejua tiknotsa. Tla mochpoch kita ika tejua tiktlakaita, san no yejua kitas ika noneki makitlakaitakan. Niman yejon kipaleuis makita ika noneki makitlakaitakan oksekimej tlakamej.

   San ika, tla tejua nochipa tikijlijtika ika nochi xkuajli kichiua, yejua kimachilis ika xtlaj ika tepaleui. Niman kanaj hasta uelis peuas nouikas iuan tlakamej akin san kauilmatiskej.

   “Ijkuak se tajtli kitlasojtla ichpoch niman nochipa kipaleuiya, yejon ichpochtli kanaj kuajli kitlapejpenis iuan akinon nonamiktis niman xsan akinon kiselis” (Wayne).