Ne hiki mai e matua taane haaku i Sihamani ki Ausetalia he 1949. Ne hau a ia ke kumi gahua ke he tau kamupanī keli maka uho mo e gahua malolō hila, ti nofo he maaga tua i Victoria. I ai, ne mau a ia mo e matua fifine haaku ti fanau au he 1953.

Fai tau he mole, ne kamata e matua fifine haaku ke fakaako e Tohi Tapu mo e Tau Fakamoli a Iehova, ti ko e tau fakaakoaga he Tohi Tapu e falu mena ne manatu e au mai he vahā tote. Ka e nakai fiafia e matua taane haaku ke he ha lotu. Mahani vale a ia mo e pule lahi, ti matakutaku lahi e matua fifine haaku. Ne matutaki a ia ke fakaako fūfū e Tohi Tapu ti fiafia lahi ke he tau fakaakoaga i loto. Ka ai nofo a Tete i kaina, ne talamai e ia ki a au mo e mahakitaga haaku e tau mena haana ne fakaako. Ne talamai e ia ki a maua hagaao ke he lalolagi parataiso anoiha, mo e puhala ka moua e maua e fiafia he mumuitua ke he tau mahani mitaki he Tohi Tapu.​—Salamo 37:10, 29; Isaia 48:17.

He 18 e tau haaku he moui, ne lata ni au ke toka e kaina ha ko e mahani favale he matua taane haaku. Pete kua talitonu au ke he tau mena ne fakaako mai e Mami he Tohi Tapu, ne nakai kitia e au e uho he tau mena ia. Ti kaumahala au ke fakaaoga ai he moui haaku. Ne kamata au ke gahua hila he tau keliaga kolu. He 20 e tau haaku he moui, ne faihoana au. Tolu e tau he mole ne fanau e tama fifine fakamua ha maua, ti liu au manamanatu ke he tau mena ne aoga ke he moui haaku. Iloa e au na maeke e Tohi Tapu ke lagomatai e magafaoa ha mautolu, ti kamata au ke fakaako e Tohi Tapu mo e taha he Tau Fakamoli a Iehova. Ka kua totoko lahi e hoana haaku ke he Tau Fakamoli. He fina atu au ke he taha feleveiaaga ha lautolu, ne mai e ia e poakiaga mamafa​—fakaoti e fakaako Tohi Tapu po ke fano kehe mai he magafaoa. Nakai iloa e au ha mena ke taute, ti lolelole ni au mo e fakamamutu mai he Tau Fakamoli. Ne tokihala au he magaaho fakamui he nakai tapiki mau ke he mena ne iloa e au kua hako.

He taha aho, ne fakakite mai he tau kapitiga gahua haaku e tau ata telefua. Kua fia kitekite au ki ai ka e fakateteki foki he magaaho taha, ti fakamaligaliga he logona hifo e au. Ne manatu e au e tau mena ne fakaako mai he Tohi Tapu, ti talitonu mooli au to fakahala he Atua au. Ka e he lahi fakahaga e kitekite au ke he tau fakatino teteki, ne hiki e manatu haaku ke he tau ata telefua. Ti fai magaaho he mole, ne hufia au i ai.

He 20 e tau i mua, ne tafea mamao au mai he tau tutuaga ne lali e matua fifine haaku ke fakaako ki a au. Ne fakakite he mahani haaku  e tau mena ne fagai aki e au e manamanatuaga haaku. Ti fakalialia mo e pilo e tau vagahau mo e tau vaiga haaku. Ne feaki e au e onoonoaga hepe ke he mahani fakataane mo e fifine. Pete he nonofo agaia mo e hoana haaku, ne fano foki au mo e falu fifine. Hoko ke he taha aho, ne ono au ke he fakaata ti manatu, “Ai fia loto au ki a koe.” Ko e tuaga lilifu haaku kua hukui aki e fakavihiatia.

Ne mavehevehe au mo e hoana haaku, ti mavehevehe foki e moui haaku. Ne liligi e au e loto haaku ki a Iehova he liogi. Ti pete kua 20 e tau he mole, ne liu au matutaki e fakaako ke he Tohi Tapu. He mogoia kua fitā e matua taane haaku he mate, mo e kua papatiso e matua fifine haaku ko e taha he Tau Fakamoli a Iehova.

Ne kua vehā mamao lahi e moui haaku mo e tau tuaga tokoluga he Tohi Tapu. Ka ko e mogonei kua eketaha au ke moua e loto mafola ne mavehe mai he Tohi Tapu. Ne fakatoka e au ke tiaki e tau vagahau kelea mo e ua ita vave. Fifili foki au ke tiaki e moui mahani feuaki, fakaoti e pelē tupe, fakaoti e konahia, mo e fakaoti e kaiha mai he takitaki gahua haaku.

Ne nakai maama he tau kapitiga gahua haaku e kakano ne manako au ke taute e tau hikiaga lalahi ia. Ke he tolu e tau, ne fakaohooho tumau e lautolu au ke liu ke he tau puhala tuai haaku. Ka kaumahala au tuga e vale po ke kupu kelea, ne tui kalaga fiafia a lautolu mo e pehe: “Haia! Ko Joe tuai a ia.” Ne mamahi mooli e tau kupu ia! Ti fa logona hifo e au kua kaumahala au.

Ne loga lahi e tau ata telefua he gahuaaga haaku, he komopiuta po ke he tau lau pepa. Ne uta fano tumau he tau kapitiga gahua haaku e tau fakatino fakalialia he tau komopiuta ha lautolu, tuga ne taute foki e au he magaaho fakamua. Lali au ke tiaki e hufiaaga haaku, ka e malolō foki a lautolu he taute lagatau ke kaumahala au. Ne kumi lagomatai mo e fakamalolōaga au mai he matakainaga ne fakaako e Tohi Tapu mo au. Ti fanogonogo fakamitaki a ia he liligi age e au e loto haaku. Ne fakaaoga e ia e tau kupu Tohi Tapu ke fakakite e puhala mitaki ke fehagai ke he hufiaaga haaku, ti fakamafana e ia au ke liogi tumau ki a Iehova ke moua e lagomatai.​—Salamo 119:37.

Ne hoko ke he taha aho, ti fono au mo e tau tagata gahua haaku. He o mai a lautolu, ne fekau e au ke age takitaha e lupo kava ke he tokoua e tagata ne hufia he kava. Ne vale lahi e kau gahua: “Ai lata a koe ke taute e mena ia! Hane taufetului e tau tagata nei he hufia ki ai!” Ne tali au: “E, ti pihia foki au.” Tali mai he aho ia, ne mailoga he tau tagata gahua ko au hane taufetului ke tiaki e hufiaaga ke he tau ata telefua, ti oti e fakalagalaga ha lautolu ki a au ke liu ke he tau puhala tuai haaku.

Ha ko e lagomataiaga ha Iehova, ne fai magaaho he mole ti kautū au ke he haaku a hufiaaga ke he tau ata telefua. He 1999, ne papatiso au ko e taha he Tau Fakamoli a Iehova, ti loto fakaaue lahi au he moua e magaaho ke liu lali lagaua ke atihake e moui mitaki mo e fiafia.

Kua maama e au mogonei e kakano ne vihiatia e Iehova e tau mena ne leva lahi e fiafia au ki ai. Ha ko e Matua fakaalofa, ne lali a ia ke puipui au mai he tau matematekelea he tau ata telefua. Kua mooli lahi e tau kupu he Tau Fakatai 3:5, 6! Pehē mai e tau kupu ia: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Ko e tau tutuaga he Tohi Tapu ne nakai ni ko e puipuiaga, ka e mavehe mai foki to moua e monuina.​—Salamo 1:1-3.

He magaaho fakamua, ne vihiatia au ki a au ni, ka ko e mogonei kua moua e au e lilifu mo e mafola e loto. Kua meā e moui haaku mogonei mo e logona e au e fakamagaloaga mo e lagomatai ha Iehova. He 2000, ne mau au mo Karolin, ko e matakainaga fifine Kerisiano ne fulufuluola mo e fiafia foki ki a Iehova tuga au. Ko e huaga he mafola e kaina ha maua. Ti fiafia mooli a maua ke eke mo vala he fakatokatokaaga Kerisiano ne meā mo e fakaalofa ke he lalolagi katoa.