Ko e tama tote ko Noelle ko e tama loto fakaalofa ne fiafia lahi ke ta fakatino. He taha afiafi he vahā mafana ne fano a ia ke he faahi tua he kaina ti tō ki loto he pa koukou lahi he magafaoa. Ne ua agaia e faahi tapu ne toe ato tu e fā e tau haana he magaaho ne tomo a ia.

Ko Charlotte, Daniel, Olivia, Josephine . . . Ko e falu higoa ni anei he tau fanau toko 20 ne taki ono po ke taki fitu e tau tau moui mai he toko 26 ne mamate he fana he aoga i Connecticut, U.S.A., ia Tesemo 14, 2012. He taute e mauku, ne fakailoa he Pelesiteni ko Obama e tau higoa he tau fanau ia ti tala age ke he tau tagata he toloaga ne kua momoko: “Kua lata ni e tau matematekelea nei ke fakaoti.”

Ko e tama fifine ko Bano ne hogofulumavalu e tau moui ne toka a Iraq he 1996 ti hiki atu mo e magafaoa haana ki Norway. Ne hea he tau kapitiga haana a ia he higoa kaina haana ko Sun Rays. Ka e momoko ai, ia Iulai 22, 2011, ko Bano taha he toko 77 ne tamate he tagata fakamatakutaku kelea ne hula he pehē: “Manako au ke fakamolemole atu . . . ha kua nakai tokologa atu ne tamate e au.”