Thuto ya Beibele ke Eng?
Dihlatse tša Jehofa di swarela batho thuto ya Beibele yeo e arabago dipotšišo tše dintši tša go swana le tše di latelago:
Modimo ke mang?
Na Modimo ruri o na le taba le nna?
Nka kaonefatša lenyalo la ka bjang?
Nka hwetša lethabo bjang bophelong?
Ka mo tlase o tlo hwetša dikarabo tša dipotšišo tšeo di botšišwago kudu mabapi le lenaneo la rena la thuto ya Beibele.
Thuto ye e rulagantšwe bjang? Re tšea dihlogo tše bjalo ka “Modimo” goba “lenyalo” gomme ra hlahloba ditemana tša Beibele tše di fapafapanego tšeo di thekgago sehlogo seo. Ge re bapetša ditemana tšeo, re bona seo Beibele e se bolelago ka sehlogo seo, ka go re’alo ra dumelela Beibele gore e itlhalose.
Re diriša puku ya Ke Eng Seo ge e le Gabotse Beibele e se Rutago? go re thuša go ithuta Beibele. Gare ga dihlogo tše dingwe, puku ye e hlalosa ka mo go kwagalago seo Beibele ge e le gabotse e se rutago ka Modimo, Jesu le ka bokamoso bja rena.
Thuto ye ya Beibele ke bokae? Thuto ye ke mahala, e bile dikgatišo tšeo re ithutago ka tšona ga di rekišwe.
Thuto e tšea nako e kae? Batho ba bantši ba beela ka thoko iri e tee goba go feta moo beke e nngwe le e nngwe gore ba ithute Beibele le rena. Eupša nako yeo re e tšeago re ithuta e ka fetofetoga. Go ya ka gore wena o nyaka re ithuta nako e kaakaang.
Go direga eng ge ke kgopela thuto ya Beibele? Ge o kgopela thuto ya Beibele, yo mongwe wa Dihlatse tša Jehofa o tla go etela ka nako yeo e go swanetšego le lefelong leo le go swanetšego. O tla tšea metsotso e sego kae a go bontšha kamoo thuto ya rena e swarwago ka gona. Ge e ba o na le kgahlego, o ka tšwela pele o ithuta.
Ge e ba ke amogela thuto ya Beibele, na seo se ra gore ke swanetše go fetoga yo mongwe wa Dihlatse tša Jehofa? Aowa. Rena Dihlatse tša Jehofa re rata go ruta batho Beibele, eupša le ka mohla ga re gapeletše motho le ge e le ofe gore a fetoge setho sa bodumedi bja rena. Go e na le moo, re hlalosa ka tlhompho seo Beibele e se bolelago, re lemoga gore motho yo mongwe le yo mongwe o na le tshwanelo ya go kgetha seo a nyakago go se dumela.—1 Petro 3:15.
You May Also Like
DIPUKU LE DIPOROUTŠHA
O ka Thabela Bophelo go ya go Ile!—Thoma go Ithuta Beibele le Rena
Poroutšha ye e ka go thuša gore o thome go ithuta Beibele le Dihlatse tša Jehofa mahala beke e nngwe le e nngwe.
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.
DIPOTŠIŠO TŠEO DI BOTŠIŠWAGO KUDU
Ge ke Ithuta Beibele le Dihlatse tša Jehofa, na ke Gapeletšega go ba yo Mongwe wa Tšona?
Dihlatse tša Jehofa di ithuta Beibele mahala le batho ba dimilione lefaseng ka moka. Ge e ba o ithuta Beibele le rena, na o gapeletšega go ba yo mongwe wa Dihlatse tša Jehofa?
MABAPI LE RENA
Ke ka Baka la Eng o Swanetše go Ithuta Beibele?
Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?
DIPOTŠIŠO TŠA BEIBELE DI A ARABJA
O Swanetše go Dira’ng Gore o Kwešiše Beibele?
Go sa šetšwe setlogo sa gago, o ka kgona go kwešiša molaetša wa Modimo wo o lego ka Mangwalong a Makgethwa.