LUANDA, Angola—Go thoma ka March 11, 2015, dipula tša matlorotloro di ile tša baka mafula ao a bolailego batho ba 85 le go senya magae a 119 profenseng ya Benguela, yeo e lego dikhilomithara tše 500 go tloga Luanda. Ofisi ya lekala ya Dihlatse tša Jehofa nageng ya Angola e begile gore ga go na Hlatse yeo e hlokofetšego, eupša magae a 11 a Dihlatse a sentšwe o šoro. Toropong ya Lobito, Holo ya Mmušo e lego ntlo ya borapedi e sentšwe ke mafula.

Mesong ya ka morago ga dipula tše, Dihlatse di ile tša hloma komiti ya tlhakodišo go hlahloba tshenyo yeo e bakilwego ke mafula le go rulaganya tlhakodišo. Dihlatse di ile tša thuša barapedi gotee le tšona gaešita le bao e sego Dihlatse bao ba lego mafelong ao a kgomilwego ke kotsi. Holong ya Mmušo toropong ya Lobito, baithaopi ba ile ba tloša leraga le lentši le meetse gomme ba fetša go lokiša lefelo leo ka nako bakeng sa go swara diboka tše kgethegilego mafelobekeng a ka morago ga mafula. Baemedi bao ba tšwago ofising ya lekala la Dihlatse tša Jehofa nageng ya Angola ba ile ba tloga Luanda go ya dibokeng tša lefelong leo, bakeng sa go homotša le go kgothatša Dihlatse ka Beibele.

Todd Peckham e lego mmoleledi wa Dihlatse tša Jehofa nageng ya Angola, o boletše gore: “Re lla le bohle bao ba sa tšwago go welwa ke kotsi ye. Ofisi ya lekala ya Angola e tla tšwela pele go etelela modiro wa tlhakodišo pele le go thekga setšhaba.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Angola: Todd Peckham, mogala +244 222 460 192