Ga go motho yo a kilego a bona Modimo ka mahlo. (Ekisodo 33:20; Johane 1:18; 1 Johane 4:12) Beibele e re “Modimo ke Moya,” sebopego sa bophelo seo se sa bonwego ke batho.—Johane 4:24; 1 Timotheo 1:17.

 Lega go le bjalo, Modimo a ka kgona go bonwa feela ke barongwa ka gobane ke dibopiwa tša moya. (Mateo 18:10) Go oketša moo, batho ba bangwe bao ba hwago ba tla tsošetšwa legodimong ka mmele wa moya gomme ba tla kgona go bona Modimo.—Bafilipi 3:20, 21; 1 Johane 3:2.

 Gantši Beibele e diriša kgopolo ya go bona ka tsela ya seswantšhetšo go fetiša kgopolo ya go kwešiša selo. (Jesaya 6:10; Jeremia 5:21; Johane 9:39-41) Ka kgopolo ye, motho a ka kgona go bona Modimo gona bjale ka ‘mahlo a pelo ya gagwe’ ka go ba le tumelo e le gore a Mo tsebe le go tšeela godimo dika tša Gagwe. (Baefeso 1:18) Beibele e hlalosa megato yeo e dirago gore motho a be le tumelo ya mohuta wo.

•   Ithute ka dika tša Modimo tše bjalo ka lerato la gagwe le go nea ga gagwe ka seatla se se bulegilego gotee le bohlale le matla a gagwe ka go bona dilo tšeo a di hlodilego. (Baroma 1:20) Ka morago ga gore a gopotšwe ka mediro ya Modimo ya tlholo, monna yo a botegago Jobo o ile a ikwa eka o bona Modimo ka mahlo a gagwe.—Jobo 42:5.

•   Tseba Modimo ka go ithuta Beibele. Beibele e re kgonthišetša gore: ‘Ge e ba o ka tsoma Modimo, yena o tla dira gore o mo hwetše.’—1 Dikoronika 28:9; Psalme 119:2; Johane 17:3.

•   Ithute ka Modimo bophelong bja Jesu. Ka ge Jesu a ile a bontšha gabotse semelo sa Tatagwe, Jehofa Modimo, o be a ka bolela ka mo go nepagetšego gore: “Yo a bonego nna o bone le Tate.”—Johane 14:9.

•   Phela ka tsela yeo e kgahlišago Modimo gomme o bone kamoo a tla dirišanago le wena ka gona. Jesu o itše: “Go thaba bao ba sekilego pelong, ka ge ba tla bona Modimo.” Ka ge go bontšhitšwe pejana, ba bangwe bao ba kgahlišago Modimo ba tla tsošetšwa legodimong gomme ba tla “bona Modimo” gona moo.—Mateo 5:8; Psalme 11:7.

 Dipegong tšeo go ka bonagalago eka Beibele e re batho ba kile ba bona Modimo e le ka kgonthe, ge e le gabotse mantšu a dikologilego dipego tšeo a bontšha gore Modimo o be a emelwa ke morongwa goba o ile a tšwelela ka sebopego sa pono.

 Barongwa.

Mehleng ya bogologolo, Modimo o ile a romela barongwa e le baemedi ba gagwe gore ba tšwelele go batho le go bolela ka leina la gagwe. (Psalme 103:20) Ka mohlala, Modimo o kile a bolela le Moshe sehlareng seo se bego se tuka mollo gomme Beibele e re: “Moshe a uta sefahlego sa gagwe gobane o be a boifa go lebelela Modimo wa therešo.” (Ekisodo 3:4, 6) Moshe ga se a bona Modimo ka mahlo a gagwe, lega go le bjalo, mantšu ao a dikologilego taba yeo a bontšha gore ge e le gabotse o ile a bona “morongwa wa Jehofa.”—Ekisodo 3:2.

 Ka mo go swanago, ge Beibele e re Modimo “a bolela le Moshe ba lebantše difahlego,” seo se bolela gore Modimo o be a boledišana le Moshe kgauswiuswi. (Ekisodo 4:10, 11; 33:11) Ge e le gabotse Moshe ga se a bona sefahlego sa Modimo, ka gona boitsebišo bjoo a bo hweditšego go tšwa go Modimo bo “fetišeditšwe ka barongwa.” (Bagalatia 3:19; Ditiro 7:53) Lega go le bjalo, tumelo ya Moshe e be e tiile kudu moo Beibele e mo hlalositšego eka “o bona Yo a sa bonagalego.”—Baheberu 11:27.

 Ka tsela e swanago le yeo a ilego a bolela le Moshe ka yona, Modimo o ile a boledišana le Aborahama ka go diriša barongwa. Ke therešo gore go kga Beibele ka godimo go ka go nea kgopolo ya gore Aborahama o ile a bona Modimo ka mahlo a gagwe. (Genesi 18:1, 33) Lega go le bjalo, ditemana tšeo di dikologilego taba ye ge e le gabotse di bontšha gore “banna ba bararo” bao ba ilego ba tla go Aborahama e be e le barongwa bao ba romilwego ke Modimo. Aborahama o be a ba lebelela e le baemedi ba Modimo gomme a bolela le bona eka o be a bolela le Jehofa ka go lebanya.—Genesi 18:2, 3, 22, 32; 19:1.

 Dipono.

Le gona Modimo o ile a tšwelela go batho a diriša dipono goba ditoro. Ka mohlala, ge Beibele e bolela gore Moshe le Baisiraele ba bangwe ba ile ba “bona Modimo wa Isiraele,” ge e le gabotse ba ile ba “bona pono ya Modimo wa therešo.” (Ekisodo 24:9-11) Ka mo go swanago, Beibele ka dinako tše dingwe e bolela gore baporofeta ba ile ba “bona Jehofa.” (Jesaya 6:1; Daniele 7:9; Amose 9:1) Boemong bjo bongwe le bjo bongwe, ditemana tšeo di dikologilego taba yeo e bolelago ka go bona Modimo di bontšha gore ba be ba bona dipono go e na le go bona Modimo ka go lebanya.—Jesaya 1:1; Daniele 7:2; Amose 1:1.