Aowa. Ge dingwalwa tša bogologolo di bapišwa, go hwetšwa gore Beibele ga se ya ka ya fetošwa le gatee, le ge e le gore go fetile mengwaga e dikete e dutše e ngwalollwa godimo ga dilo tšeo di senyegago.

 Go ile gwa hwetšwa dingwalwa tše dintši tša kgale tša Beibele. Tše dingwe tša dingwalwa tšeo ga di swane, gomme seo se hlatsela gore go bile le diphošo ge dingwalwa tšeo di be di ngwalollwa. Dilo tše dintši tšeo go hweditšwego di sa swane ga se tša go tshwenya, le gona ga di fetoše kgopolo ya mangwalo. Lega go le bjalo, go na le dilo tše sego kae tšeo di dirago gore mangwalo a fapane kudu, gomme tše dingwe tša tšona di bontšha gore ke kgale batho ba leka go fetoša molaetša wa Beibele. Ela hloko mehlala e mebedi ye e latelago:

1.   Diphetolelo tše dingwe tša kgale tša Beibele di fetoletše 1 Johane 5:7 ka gore: “magodimong . . .: Ke Tata wešo, le yena lentšu, le Moya o mokgethwa. Gomme ba bararo ba ke batee.” Lega go le bjalo, dingwalwa tšeo di sa kago tša fetošwa di bontšha gore mantšu a a be a se gona dingwalweng tša mathomo. A ile a tsenywa ka morago. a Ka gona, diphetolelo tša Beibele tša mehleng yeno di tlošitše mantšu ao.

2.   Leina la Modimo le tšwelela ka makga a mantši ka dingwalweng tša kgale tša Beibele. Lega go le bjalo, diphetolelo tše dintši tša Beibele di ile tša le tloša gomme tša ngwala “Morena” goba “Modimo.”

 Go fihla gona bjale, go šetše go hweditšwe dingwalwa tše dintši kudu moo go hwetša diphošo go lego bonolo. b Ke eng seo banyakišiši ba se hweditšego ge ba be ba bapetša dingwalwa tše go bontšha gore Beibele e nepagetše?

•   Ge seithuti William H. Green, a be a bolela ka Mangwalo a Seheberu (ao gantši a bitšwago “Testamente ya Kgale”) o ile a re: “Motho a ka bolela a kgodišegile gore ga go na puku e nngwe ya bogologolo yeo e kilego ya ngwalollwa ka mo go nepagetšego ka tsela ye.”

•   Seithuti sa Beibele e lego F. F. Bruce o ile a ngwala mabapi le Mangwalo a Bakriste a Segerika goba “Testamente e Mpsha” gore: “Bohlatse bja dingwalwa tša rena tša Testamente e Mpsha ke bjo bontši kudu go feta bja dingwalwa tše dingwe tša kgale tšeo go se nago motho le o tee yo a belaelago gore di nepagetše.”

•   Morena Frederic Kenyon, e lego setsebi sa go tuma sa dingwalwa tša Beibele o ile a bolela gore, motho “a ka swara Beibele ka letsogong gomme a bolela a sa boife selo gore seo se ngwadilwego ka Beibeleng ke Lentšu la Modimo leo le nepagetšego e bile ga se la ka la fetošwa ge le be le ngwalollwa.”

•   Bajuda le Bakriste ka moka bao ba ngwalollotšego Beibele, ba ngwadile ka diphošo tše dikgolo kudu tšeo batho ba Modimo ba ilego ba di dira. c (Numeri 20:12; 2 Samuele 11:​2-4; Bagalatia 2:​11-​14) Le gona, ga se ba tloša ditemana tšeo di bontšhago gore Jehofa o ile a ahlola Bajuda ka baka la go se kwe le tšeo di bolelago ka dithuto tša maaka tšeo di rutwago ke batho. (Hosea 4:2; Maleaki 2:​8, 9; Mateo 23:​8, 9; 1 Johane 5:​21) Ka ge bangwadi ba ba ngwalollotše dingwalwa tše ka tsela e nepagetšego, ba bontšha gore ba be ba botega le gore ba be ba tšea Lentšu la Modimo e le le lekgethwa.

•   Go molaleng gore ka ge Modimo e le yena a buduletšego Beibele, o tla lwela gore e dule e nepagetše. d (Jesaya 40:8; 1 Petro 1:​24, 25) Le gona, o be a sa e direla gore e hole batho ba mehleng ya kgale feela, eupša o be a e diretše gore e hole le rena. (1 Bakorinthe 10:11) Ge e le gabotse, “dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.”​—Baroma 15:4.

•   Jesu le balatedi ba gagwe ga se ba ka ba belaela go nepagala ga dingwalwa tšeo tša kgale ge ba be ba tsopola Mangwalo a Seheberu.​—Luka 4:​16-​21; Ditiro 17:​1-3.