Go nwa bjala ka go lekanetša ga se sebe. Beibele e re beine ke mpho e tšwago go Modimo yeo e dirago gore bophelo bo thabiše. (Psalme 104:14, 15; Mmoledi 3:13; 9:7) Beibele gape e a dumela gore beine e a hola go tša maphelo.—1 Timotheo 5:23.

 Jesu o ile a nwa beine ge a sa le mo lefaseng. (Mateo 26:29; Luka 7:34) O mongwe wa mehlolo yeo e tsebjago kudu wa Jesu, ke wa ge a fetola meetse gore e be beine e le mpho monyanyeng wa lenyalo.—Johane 2:1-10.

Dikotsi tša go nwa kudu

 Le ge Beibele e bolela ka mehola ya beine, e ganetša go nwa kudu le botagwa. Ka go rea’lo, Mokriste yo a kgethago go nwa o tla dira bjalo ka go lekanetša. (1 Timotheo 3:8; Tito 2:2, 3) Beibele e nea mabaka a mmalwa a gore re pheme go nwa kudu.

•   Go nwa kudu go šitiša monagano le kahlolo e botse. (Diema 23:29-35) Motho yo a nwago kudu a ka se phethagatše taelo ya Beibele ya gore re ‘neele mebele ya rena e le sehlabelo se se phelago, se sekgethwa, se se amogelegago go Modimo, tirelo e kgethwa ka matla a rena a tlhaologanyo.’—Baroma 12:1.

•   Go nwa kudu go ka dira gore o se be le dihlong le “maikemišetšo a mabotse.”—Hosea 4:11; Baefeso 5:18.

•   Go nwa kudu go baka bodiidi le malwetši.—Diema 23:21, 31, 32.

•   Go nwa kudu le botagwa ga di kgahliše Modimo.—Diema 23:20; Bagalatia 5:19-21.

Go nwa kudu ke eng?

 Ge re re motho o nwele bjala kudu ke ge a bea bophelo bja gagwe le bja ba bangwe kotsing. Go ya ka Beibele, motho yo a tagilwego a ka bonwa ka go ba le kgopolo e šarakanego, go thekesela, go tlala dingangišano goba go rogana e sego go idibala. (Jobo 12:25; Psalme 107:27; Diema 23:29, 30, 33) Gaešita le bao ba phemago go tagwa ba dutše ba ka “imelwa ke ... go nwa kudu” le go lebeletšana le ditlamorago tša gona.—Luka 21:34, 35.

Go tlogela bjala ka mo go feletšego

 Beibele e bolela ka dinako tšeo Mokriste a ka kgetha go se nwe bjala:

•   Ge e ba seo se kgopiša ba bangwe.—Baroma 14:21.

•   Ge e ba go nwa bjala go thulana le molao wa naga.—Baroma 13:1.

•   Ge e ba motho a palelwa ke go bo laola. Bao e lego makgoba a bjala goba mehuta e mengwe ya dinotagi ba swanetše go gata megato ya go lokiša.—Mateo 5:29, 30.