Go ya ka puku ya mafelelo ka Beibeleng, leswao 666 ke palo goba leina la sebata seo se nago le dihlogo tše šupago le manaka a lesome seo se tšwago ka lewatleng. (Kutollo 13:1, 17, 18) Sebata se se emela tshepedišo ya dipolotiki ya lefase ka bophara, yeo e laolago “meloko le batho le maleme le ditšhaba ka moka.” (Kutollo 13:7) Leina 666 le bontšha gore tshepedišo ya dipolotiki e paletšwe o šoro mahlong a Modimo. Se se bjalo bjang?

Ga se leswao feela. Maina ao a newago ke Modimo a na le seo a se bolelago. Ka mohlala, Modimo o neile motho yo mongwe leina la Aborama leo le bolelago gore “Tate o Phagame (Godišitšwe),” ge Modimo a be a holofetša go dira Aborahama “Tatago lešaba la ditšhaba,” o ile a mo nea leina Aborahama leo le bolelago “Tatago Mašaba.” (Genesi 17:5, mongwalo wa tlase wa Reference Bible) Ka mo go swanago, Modimo o bitša sebata ka palo 666 e le seka sa go hlalosa dika tša sona.

Palo tshela e emela go se phethagale. Ka Beibeleng, gantši dipalo di dirišitšwe e le maswao. Gantši palo šupa e emela selo se se feletšego goba se se phethagetšego. Ka ge palo šupa gantši e emela go felelela, gona palo tshela e emela selo seo se sa felelago goba seo se sa phethagalago mahlong a Modimo gomme e ka tswalanywa le manaba a Modimo.—1 Dikoronika 20:6; Daniele 3:1.

Palo tshela e bušeleditšwe gararo e le go gatelela. Ka dinako tše dingwe Beibele e gatelela taba ka go e bolela ka makga a mararo. (Kutollo 4:8; 8:13) Ka gona, leina 666 le gatelela gore Modimo o lebelela tshepedišo ya batho ya dipolotiki e le e paletšwego o šoro. E palelwa ke go tliša khutšo le polokego ya sa ruri, e lego dilo tšeo feela di ka tlišwago ke Mmušo wa Modimo.

Leswao la sebata

 Beibele e re batho ba amogela “leswao la sebata” ka gobane ba se latela “ka go tlabega,” go fihla bokgoleng bja go se rapela. (Kutollo 13:3, 4; 16:2) Ba dira se ka go rapela dinaga tša bona, leswao la yona goba matla a yona a tša bohlabani. Go etša ge The Encyclopedia of Religion e bolela: “Botšhaba bo fetogile sebopego se bohlokwa sa bodumedi sa mehleng yeno.” a

 Leswao la sebata le beilwe bjang letsogong la le letona la motho goba phatleng? (Kutollo 13:16) Ge Modimo a be a nea setšhaba sa gagwe sa Isiraele ditaelo, o itše: ‘Di tlemeleleng bjalo ka seka diatleng tša lena gomme di be bjalo ka mphapahlogo diphatleng tša lena.’ (Doiteronomio 11:18) Se se be se sa bolele gore Baisiraele ba swanetše go dira seka diatleng le diphatleng tša bona ka tsela ya kgonthe, eupša se be se bolela gore seo Modimo a se bolelago se tla hlahla mediro le menagano ya bona. Ka mo go swanago, go e na le gore 666 e be selo sa kgonthe bjalo ka tattoo, leswao la sebata le swantšhetša bao ba dumelelago tshepedišo ya dipolotiki gore e laole maphelo a bona. Bao ba nago le leswao la sebata ba kgahlanong le Modimo.—Kutollo 14:9, 10; 19:19-21.