Puku ya Moswana-noši

“Beibele ke puku yeo e abilwego ka bontši kudu historing.” —The World Book Encyclopedia.

NYWAGENG e fetago e 550 e fetilego, mohlami wa Mojeremane, Johannes Gutenberg, o ile a thoma go gatiša a diriša motšhene wa ditlhaka tšeo di beakanywago ka seatla. Puku ya mathomo ya bohlokwa yeo a e gatišitšego motšheneng wa gagwe e be e le Beibele. * Ga e sa le go tloga ka nako yeo, go gatišitšwe dipuku tše dikete tše dimilione tšeo di bolelago ka ditaba ka moka tšeo go ka naganwago ka tšona. Lega go le bjalo, go fihla ga bjale Beibele ke puku e di phagametšego kudu ka moka.

▪ Go akanyetšwa gore go gatišitšwe Dibeibele tša ka godimo ga dimilione tše dikete tše 4,7 (e feletše goba ka karolo ya yona). E feta palo ya dikopi tšeo di abilwego tša kgatišo ya bobedi yeo e abjago ka bontši e lego Quotations From Chairman Mao ka makga a fetago a mahlano.

▪ Morago bjale, go abilwe dikopi tša ka godimo ga tše dimilione tše 50 tša Beibele goba karolo ya yona ka ngwaga o tee feela. Pego yeo e lego ka go makasine wa The New Yorker e re: “Beibele ke puku yeo e rekwago kudu ka ngwaga, ngwaga o mongwe le o mongwe.”

▪ Beibele e fetoletšwe ka maleme a ka godimo ga a 2 400 e feletše goba ka karolo ya yona. Bonyenyane, karolo e itšego ya Beibele e hwetšagala ka maleme ao a bolelwago ke batho ba ka godimo ga 90 lekgolong.

▪ Mo e ka bago seripa-gare sa bangwadi ba Beibele ba feditše go ngwala dipuku tša bona pele Confucius e lego sehlalefi se se tsebegago sa ma-China le Siddhārtha Gautama e lego mothomi wa bodumedi bja Mabhudda ba belegwa.

▪ Beibele e bile le tutuetšo e kgolo kudu go tša bokgabo, go akaretša diswantšho tše dingwe tše di thadilwego tše di tumilego kudu lefaseng go akaretša mmino le tša kgatišo ya dipuku.

▪ Beibele e phologile dithibelo tša mebušo, go fišwa ke baganetši ba bodumedi le ditlhaselo tša baswaya-diphošo. Ga go puku e nngwe historing yeo e ilego ya lebeletšana le kganetšo e kgolo gakaalo gomme ya phologa.

[Mongwalo wa tlase]

[Diswantšho go letlakala 15]

Motšhene wa Gutenberg wa go gatiša le letlakala leo le tšwago Beibeleng ya gagwe

[Ditlhaloso tša Methopo]

Press: Courtesy American Bible Society; page: © Image Asset Management/age fotostock