KA 2010, dilithara tše e ka bago tše dimilione tše 800 tša oli e tala di ile tša dutlela ka lewatleng kua Kgogometšaneng ya Mexico ka morago ga gore motšhene wa go epa oli o thunye le go nwelela. Lega go le bjalo, oli e ntši e be e se sa le gona ka morago ga dikgwedi tše mmalwa. Seo se diregile bjang?

Ela hloko: Dinyakišišo tša thutamahlale di bontšhitše gore diphedi tše dinyenyane tša ka lewatleng di kgona go bolaya dimolekule tša carbon tšeo di lego oling. Moprofesara Terry Hazen, e lego setsebi sa diphedi tše dinyenyane le tikologo ya tšona o hlalositše diphedi tše e le “dimisaele tše di tsomago oli.” Diphedi tše di bile le karolo go seo se diregilego kua Kgogometšaneng ya Mexico, go etša ge go hlalositšwe ka mo godimo.

Pego ya BBC ge e bolela ka taba ye e re: “Ge e le gabotse, ga go makatše gore mawatle a na le diphedi tše dinyenyane tšeo di jago oli.” Go oketša moo, ka nywaga e mentši “go be go dutše go na le oli yeo e dutlelago ka meetseng go tšwa botlaseng bja lona.”

Ke therešo gore maiteko a batho a go hlwekiša oli yeo e tšhologilego a a atlega. Lega go le bjalo, maiteko a batho a go hlwekiša oli yeo e tšhologilego a ka baka tshenyo e kgolo. Dikhemikhale tšeo di dirišwago di thibela tshepedišo ya tlhago ya go hlwekiša oli. Go oketša moo, dikhemikhale tše bjalo di na le mpholo e bile di senya tikologo. Eupša go senyega ga oli ka tsela ya tlhago, go akaretša le diphedi tše dinyenyane tšeo di jago oli, go dira gore lewatle le itlhwekiše ka bolona ntle le go diriša mekgwa ya batho yeo e feleletšago ka ditlamorago tše mpe. *

O nagana eng? Na diphedi tše dinyenyane tša ka lewatleng tše di jago oli di bile gona ka mohlolo? Goba na di hlamilwe?