“PESE ye e ka tloga, eupša monna yo wa mo-China a šale!” Se ke seo Alexandra a kwelego se bolelwa ge a be a dutše ka peseng, a letetše go tshela mollwane magareng ga dinaga tše pedi tša Amerika Borwa. O ile a fologa gore a yo bona gore go direga eng gomme a hwetša lesogana la mo-China leo le bego le leka go hlalosetša mohlapetši wa mollwaneng mathata a lona eupša le paledišwa ke go se tsebe Sepaniši gabotse. Ka ge Alexandra e be e le setho sa phuthego ya Dihlatse tša Jehofa yeo e bolelago se-China, o ile a ithaopela go ba toloki gore a ba thuše.

Lesogana le ile la hlalosa gore ke lona modudi yo a lego molaong eupša le be le utsweditšwe mangwalo a lona le tšhelete. Mathomong mohlapetši o be a sa kgolwe taba ye e bile a naganela gore Alexandra ke o mongwe wa ba go gweba ka batho. Mafelelong, mohlapetši o ile a kgolwa tlhaloso ya lesogana leo le bego le le tlalelong, eupša le ile la swanelwa ke go lefa kotlo ya go se be le mangwalo a swanetšego. Ka ge le be le se na tšhelete, Alexandra o ile a ithaopela go le adima R280.00. Lesogana leo le be le sa tsebe gore le leboge Alexandra bjang gomme la re le tla mmušetša tšhelete ya ka godimo ga R280.00. Alexandra o ile a le hlalosetša gore o be a sa nyake moputso; o be a thabela go thuša ka ge a be a bona seo e le se se swanetšego. O ile a nea lesogana leo dikgatišo tšeo di bolelago ka Beibele a ba a le kgothaletša gore le ithute Beibele le Dihlatse tša Jehofa.

Go a thabiša go kwa ka ditiro tša go swarwa gabotse ga batho bao ba sa tsebjego. Le gona, ditiro tša go swana le tše di dirwa ke batho ba madumedi ka moka le bao e sego badumedi. Na o be o ka ikemišetša go thuša ka tsela yeo ya go ikgafa? Potšišo yeo ke e bohlokwa ka baka la gore Jesu o itše: “Go na le lethabo le legolo go neeng go feta go amogeleng.” (Ditiro 20:35) Boramahlale le bona ba kgahlegela taba ye ka gore banyakišiši ba hweditše gore go nea go a go hola. Anke re boneng gore seo se bjalo ka ditsela dife.

Go bonagala go nea le go thaba go le bjalo ka monwana le lenala. Moapostola Paulo o ngwadile gore “Modimo o rata monei yo a neago ka go hlalala.” O be a bolela ka Bakriste bao ba ilego ba neela go tšwa pelong gore ba thuše badumedigotee le bona nakong ya tlalelo. (2 Bakorinthe 8:4; 9:7) Paulo o be a sa bolele gore ba ile ba nea ka gobane ba thabile. Therešo ke gore—ba be ba thabile ka baka la ge ba ile ba kgona go nea.

Ge e le gabotse, go ya ka nyakišišo e nngwe, go nea go “kgoma dikarolo tše dingwe tša bjoko tšeo di tswalanywago le lethabo, go dirišana gabotse le batho, go tshepa ba bangwe gomme go dira gore motho a ikwe gabotse.” Nyakišišo e nngwe e hweditše gore “go nea motho tšhelete go dira gore monei a thabe kudu go feta ge nkabe a ile a e dirišetša go ithekela dilo.”

Na o kile wa nagana gore ka baka la maemo a gago, o ka se kgone go dira mo gontši? Therešo ke gore yo mongwe le yo mongwe a ka thabela go ba “monei yo a neago ka go hlalala.” Ge tšhelete e newa ka maikemišetšo a mabotse, ga se gore e swanetše go ba e ntši. Hlatse e nngwe ya Jehofa e rometše molaetša le moneelo go bagatiši ba makasine wo. E re: “Mengwaga ye ka moka ke be ke sa kgone neela ka  tšhelete e ntši Holong ya Mmušo.” Lega go le bjalo, Hlatse yeo e okeditše ka gore: “Jehofa Modimo o nneile go feta kamoo ke neetšego ka gona. . . . Ke a le leboga ge le dirile gore go kgonege gore ke neele ka mpho ye—se se a nkgothatša.”

Ke therešo gore ga se tšhelete feela yeo motho a ka e neago. Go na le ditsela tše dintši tša go nea.

Beibele e re: “Motho yo botho o šetša moya wa gagwe, eupša motho yo sehlogo o itira molahlwa.” (Diema 11:17) Batho ba botho ba nea ka pelo ka moka gomme ba ikemišeditše go ikgafa—ka nako ya bona, maatla a bona, go tshwenyega ga bona ka ba bangwe, bjalo bjalo. Mokgwa wo wa bophelo o ba hola ka ditsela tše sa swanego. Le gona, go nea ka pelo ka moka go thuša gore ba phele gabotse mmeleng.

Dinyakišišo di bontšha gore bao ba ithaopelago go thuša ba bangwe ba hweditšwe ba sa tshwenywe kudu ke dihlabi le go gateletšega monaganong. Ba bantši ba bona ba phela gabotse mmeleng. Go nea go tšwa pelong go bile go dira gore bao ba nago le malwetši a sa alafegego, a bjalo ka multiple sclerosis goba HIV ba ikwe ba le kaone. Go bontšhitšwe gape gore gaešita le bao ba tlogelago bjala e bile ba thuša ba bangwe, ga ba gateletšege kudu monaganong gomme ba ka kaonefatša gore ba se boele mokgweng wa bona wa go nwa bjala.

Ge e le mabapi le go bontšha gore se se bakwa ke eng, go šišinywa gore “kwelobohloko le botho di dira gore motho a se be le maikwelo a fošagetšego.” Go nea go ka fokotša kgateletšego le kgatelelo ya madi. Le gona maswao a kgateletšego ya monagano a be a fela ka pela ge batho bao ba hlokofaletšwego ke balekane ba be ba ithaopela go thuša ba bangwe.

Ga go na pelaelo ka taba ye. Go nea go a go hola.

Jesu o kgothaleditše balatedi ba gagwe gore: “Tlwaelang go fa gomme batho ba tla le fa. Ba tla le tšhelela memenong ya diaparo tša lena kelo e botse, yeo e katetšwego, yeo e hlokgoseditšwego le ya go falala. Gobane kelo yeo le elago ka yona, le lena ba tla le elela ka yona.” (Luka 6:38) Ge o nea, gantši batho ba leboga seo o ba neago sona gomme le bona e ba bao ba neago. Ka gona, go nea go kgothaletša tirišano le segwera.

Banyakišiši bao ba ithutago ka tirišano ya batho ba lemogile gore “batho bao ba dulago ba bontšha botho ba thuša ba bangwe gore le bona ba dire seo.” Ge e le gabotse, “go fo bala ka ditiro tše botho tšeo di sa tlwaelegago go dira gore batho ba be botho le go feta.” Ka gona, go ya ka nyakišišo e nngwe, “motho yo mongwe le yo mongwe setšhabeng a ka thuša batho ba bantši goba ba makgolo bao ba bangwe ba bona a sa ba tsebego le bao a sa kago a gahlana le bona.” Ka mantšu a mangwe, tiro e tee e botho e ka fetela bathong ba sa swanego setšhabeng ka moka. Na o ka se thabele go phela setšhabeng se bjalo? Go tla ba le mehola e mentši ge e ba batho ba bantši ba ka tlwaela go nea.

Kanegelo e nngwe yeo e bontšhago mafelelo a mabotse ke ya kua Florida, U.S.A. Sehlopha sa  Dihlatse tša Jehofa se ile sa ithaopela go thuša modirong wa tlhakodišo ka morago ga tshenyo yeo e bakilwego ke ledimo le legolo. Ge sehlopha se be se letetše ditlabakelo tša go lokiša ntlo yeo se bego se swanetše go e lokiša, se ile sa lemoga gore legora la moagišani le be le senyegile gomme sa ithaopela go le lokiša. Moagišani yoo ka morago o ile a ngwalela ntlongkgolo ya Dihlatse tša Jehofa lengwalo leo le rego: “Ke tla dula ke leboga. Ke thoma go kopana le batho ba botho ka tsela ye.” Tebogo e mo tutueditše gore a romele moneelo o tšwago pelong gore o dirišetšwe go seo a se bitšago mošomo o kgahlišago wa Dihlatse.

Selo seo se kgahlišago seo se hweditšwego nyakišišong ya boramahlale ke gore “go bonagala batho ka tlhago ba tutueletšega go thuša ba bangwe.” Nyakišišo yeo e re bana “ba bontšha botho gaešita le pele ba ka ithuta go bolela.” Ka baka la’ng? Beibele e nea karabo ge e re batho ba bopilwe “ka go swantšha ka yena Modimo,” e lego seo se bolelago gore, ba na le dika tše di swanago le tša Modimo.—Genesi 1:27.

Go nea ke seka se sengwe seo se kgahlišago seo Mmopi wa rena e lego Jehofa Modimo, a nago le sona. O re neile bophelo le dilo ka moka tšeo re di hlokago gore re thabe. (Ditiro 14:17; 17:26-28) Re ka tlwaelana le Tatago rena wa legodimong le merero ya gagwe e kgahlišago ka rena ka go ithuta Lentšu la gagwe, Beibele. Yona puku yeo e hlalosa gore Modimo o dirile tokišetšo ya gore re tle re thabe nakong e tlago. * (1 Johane 4:9, 10) Ka ge Jehofa Modimo e le mothopo wa go nea, gomme wena o bopilwe ka seswantšho sa Modimo, ga go makatše gore go nea—ka go ekiša Modimo—go a go hola e bile go dira gore a go rate.—Baheberu 13:16.

Na o sa gopola Alexandra yo go boletšwego ka yena mathomong a sehlogo se? Kanegelo ya gagwe e feleleditše bjang? Le ge monamedigotee le yena peseng a ile a bolela gore o be a lahlile tšhelete ya gagwe, lesogana leo a le thušitšego le ile la ikgokaganya le bagwera ba lona ba motseng o latelago wo pese e ilego ya ema go wona, gomme la lefa sekoloto sa R280.00 ka pejana. Godimo ga moo, lesogana leo le ile la diriša tšhišinyo yeo Alexandra a le neilego yona gomme la thoma go ithuta Beibele. Alexandra o ile a thabela go kopana le lesogana leo gape ka morago ga dikgwedi tše tharo kopanong ya Dihlatse tša Jehofa ya leleme la se-China kua Peru. E le ge lesogana leo le leboga seo Alexandra a le diretšego sona, le ile la mo laletša gotee le bao ba bego ba tlile le yena kopanong gore ba ye lebenkeleng la lona la go jela.

Go nea le go thuša ba bangwe go tliša lethabo le legolo. Godimo ga moo, ge o dutše o dira bjalo, o thuša batho gore ba tsebe gakaone Mothopo wa dimpho tšohle tše dibotse e lego Jehofa Modimo! (Jakobo 1:17) Na o thabela mehola ya go nea mo go bjalo?