“Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.”—PSALME 83:18.

Beibele e re ruta gore Jehofa ke yena Modimo a nnoši wa therešo. O bopile dilo ka moka legodimong le lefaseng. Ke yena a nnoši yo re swanetšego go mo rapela.—Kutollo 4:11.

“Modimo ke lerato.”—1 JOHANE 4:8.

Jehofa o diriša Beibele le dilo tšeo a di bopilego go re utollela tše dintši tša dika tša gagwe. Seka sa gagwe se segolo ke lerato. Dilo ka moka tšeo a di dirago o di dira ka lerato. Ge re tšwela pele re ithuta ka Jehofa re mo rata le go feta.

“Wena o Modimo yo a lebalelago.” —NEHEMIA 9:17.

Jehofa o a tseba gore re belegwe re na le sebe. Ka gona, o dula a ‘ikemišeditše go re lebalela’. Ge re mmotša gore re itsholela dilo tše mpe tšeo re di dirilego e bile re leka ka thata go se sa di bušeletša, o tlo re lebalela. Le gona a ka se re otlele diphošo tša nakong e fetilego.—Psalme 103:12, 13.

“Jehofa o kgauswi le bohle bao ba mmitšago . . . O tla ba kwa ge ba mo llela gore a ba thuše.”—PSALME 145:18, 19.

Jehofa ga a nyake gore re dire meetlo e itšego goba re diriše dilo tše itšego tša bodumedi ge re mo rapela. O theetša dithapelo tša rena go no swana le ge batswadi ba theetša dithapelo tša bana ba bona.