Batho ba bantši ba thatafalelwa ke go hwetša dilo tšeo ba di hlokago. Ka maswabi mathata ao a tletšego mo lefaseng a ka dira gore seo se be thata le go feta. Ka baka la’ng?

• Ge mathata a thoma go oketšega dilo tša go swana le dijo le madulo di thoma go tura.

• Mathata goba dikotsi di ka dira gore batho ba lahlegelwe ke mešomo goba ba gapeletšege go šomela tšhelete e nyenyane.

• Dikotsi tša tlhago di ka senya dikgwebo tša batho, magae a bona le dilo tša bona. Ke moka seo sa feleletša ka gore batho ba bantši ba diile.

• Ge o kgona go šomiša tšhelete gabotse, go tlo ba bonolo go lebeletšana le mathata.

• Gopola gore le ge o ka ba le tšhelete e ntši gona bjale, seo ga se re gore e tla dula e le gona. Le gona tšhelete yeo o ipoloketšego yona le dilo tšeo o nago le tšona di ka felelwa ke mohola.

• Go na le dilo tšeo tšhelete e ka se kgonego go di reka, tše bjalo ka lethabo le botee ka lapeng.

Beibele e re: “Ge re na le dijo le diaparo re tla kgotsofala ka tšona.”—1 Timotheo 6:8.

Ge re kgotsofala re thabela dilo tšeo re nago le tšona. Se se bohlokwa kudu ge re na le tšhelete e nyenyane.

Gore o kgotsofale o swanetše go ithuta go phela ka tšhelete e nyenyane. Ge e ba o dula o nyaka dilo tšeo o ka se kgonego go di reka, gona o tlo ba le mathata a mantši.