Beibele e diriša lentšu “bomoya” go šupa go batho bao ba kwago melao ya Modimo. (Juda 18, 19) Batho bao ba sa nyakego go kwa melao ya Modimo, ba phela go ya ka dikgopolo tša bona. Eupša bao ba kwago melao ya Modimo, ba latela dikeletšo tša gagwe.—Baefeso 5:1.

KELETŠO YA BEIBELE: “Na o ipontšhitše o nyamile letšatšing la tlalelo? Gona matla a gago a tla hlaela.”—Diema 24:10.

SEO KELETŠO YE E SE BOLELAGO: Go nyama go ka re fetša matla ao re a hlokago gore re lebeletšane le mathata a letšatši le letšatši. Ka lehlakoreng le lengwe, go ba le tshepo go ka re nea matla ao re a hlokago go lebeletšana le mathata. Re ka homotšwa ke go tseba gore mathata ao re nago le ona ke a nakwana. Ge e le gabotse, re ka ithuta se sengwe go ona.

SEO O KA SE DIRAGO: Nagana ka dilo tše dibotse tšeo di tlago go direga nakong e tlago. Go e na le go ikopiša hlogo ka dilo tšeo o naganago gore di ka direga, goba wa letela gore dilo di tla no loka, dira se sengwe gore o fihlelele dilo tšeo o di nyakago. Gopola gore re ka welwa ke “ditiragalo tšeo di sa letelwago.” (Mmoledi 9:11) Nnete ke gore re ka makala dilo di kaonefala go feta ka moo re bego re letetše ka gona. Go re thuša go kwešiša ntlha ye, Beibele e re fa mohlala ka molemi. E re: “Bjala peu ya gago mesong gomme o se ke wa khutšiša seatla sa gago go fihlela e eba mantšiboa; ka gobane ga o tsebe mo e tlago go mela gona, e ka ba mo goba mola, le gona ga o tsebe ge e ba bobedi bja tšona di tla mela ka go swana.”—Mmoledi 11:6.

KELETŠO YA BEIBELE: “Ntire gore ke kwešiše . . . Lentšu la gago ke therešo.”—Psalme 119:144, 160.

SEO KELETŠO YE E SE BOLELAGO: Beibele e na le dikarabo tša dipotšišo tšeo yo mongwe le yo mongwe wa rena a ka ipotšišago tšona. Ka mohlala, e araba dipotšišo tša go swana le tše:

• Go tlile bjang gore re be gona?

• Gore’ng re phela?

• Go direga’ng ge motho a ehwa?

• Na Modimo o re bopetše gore re tle re hwe?

Batho ba bantši ba ile ba thoma go ipshina ka bophelo ka morago ga gore ba hwetše dikarabo tše di tšwago ka Beibeleng tša dipotšišo tše le tše dingwe.

SEO O KA SE DIRAGO: Ipalele seo Beibele e se rutago. Kgopela yo mongwe wa Dihlatse tša Jehofa gore a go thuše go kwešiša Beibele. Tsena wepesaeteng ya jw.org/nso, goba o ye go se sengwe sa diboka tša rena Holong ya Dihlatse tša Jehofa. Go tsenwa mahala e bile batho bohle ba a amogelwa.

ITHUTE LENTŠU LA MODIMO

“Go thaba bao ba lemogago gore ba nyaka dilo tša moya.”—MATEO 5:3

ITHUTE KA MODIMO YO GO BOLELWAGO KA YENA KA BEIBELENG.

‘Tsoma Modimo gomme o mo hwetše e le ka kgonthe, gobane ga a kgole le yo mongwe le yo mongwe wa rena.’—DITIRO 17:27.

BALA BEIBELE GOMME O NAGANIŠIŠE KA DIKELETŠO TŠA YONA.

“O kgahlwa ke molao wa Jehofa, * gomme o bala molao wa gagwe ka lentšu la tlasana mosegare le bošego. . . . Se sengwe le se sengwe seo a se dirago se tla atlega.”—PSALME 1:2, 3.