Seo re Ithutago Sona go Jesu

Ka Modimo wa Therešo

Na Modimo o na le leina?

Jesu o rutile gore Modimo o na le leina. Jesu o itše: “Ka gona, le swanetše go rapela ka tsela ye: ‘Tatago rena wa magodimong, leina la gago a le kgethagatšwe.’” (Mateo 6:9) Beibele e re botša gore leina la Modimo ke Jehofa. (Psalme 68:4) Ge a bolela ka barutiwa ba gagwe, Jesu o boditše Tatagwe ge a rapela gore: “Ke ba tsebišitše leina la gago.”—Johane 17:26.

Jehofa ke Mang?

Jesu o itše Jehofa ke “Modimo a nnoši wa therešo” ka gobane Jehofa ke Mmopi. (Johane 17:3) Jesu o itše: “Na ga se la bala gore yo a ba bopilego go tloga mathomong o ba dirile e le yo motona le yo motshadi?” (Mateo 19:4) Gape Jesu o itše: “Modimo ke Moya.” (Johane 4:24) Ka gona re ka se kgone go bona Modimo.—Ekisodo 33:17-20.

 Ke’ng seo Modimo a se nyakago go rena?

Ge motho yo mongwe a botšiša Jesu gore taelo e kgolo ke efe, Jesu o itše: “Ya pele ke ye, ‘Kwa, Wena Isiraele, Jehofa Modimo wa rena ke Jehofa a nnoši, gomme o rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka le ka matla a gago ka moka.’ Ya bobedi ke ye, ‘O rate moagišani wa gago go etša ge o ithata.’”—Mareka 12:28-31.

Re ka bontšha bjang gore re rata Modimo?

Jesu o itše: “Ke rata Tate.” O bontšhitše lerato leo bjang? O itše: “Go etša ge Tate a nneile taelo gore ke dire, ke dira bjalo.” (Johane 14:31) O boletše gape gore: “Ka mehla ke dira dilo tše di mo kgahlišago.” (Johane 8:29) Re ka thabiša Modimo ka go ithuta ka yena. Ge a be a rapelela barutiwa ba gagwe, Jesu o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo.”—Johane 17:3; 1 Timotheo 2:4.

Re ka ithuta ka Modimo bjang?

Tsela e nngwe yeo re ka ithutago ka Modimo ka yona ke ka go šetša dilo tšeo a di bopilego. Ka mohlala, Jesu o itše: “Šetšang ka kelohloko dinonyana tša legodimo, gobane ga di bjale peu goba go buna goba go kgobela nywakong ya polokelo; lega go le bjalo, Tatago lena wa legodimong o a di fepa. Na ga le bohlokwa go di feta?” Jesu o be a e-ra go re’ng? Ga se ra swanela go dumelela go tshwenyega ga rena ka dilo tšeo re di nyakago e le gore re phele go re thibela go hlankela Modimo.—Mateo 6:26-33.

Tsela e kaone ya gore re tsebe Jehofa ke ka go ithuta Lentšu la gagwe e lego Beibele. Jesu o itše Mangwalo ke “lentšu la Modimo.” (Luka 8:21) Jesu o itše go Modimo: “Lentšu la gago ke therešo.”—Johane 17:17; 2 Petro 1:20, 21.

Jesu o thušitše batho go ithuta therešo ka Jehofa. Yo mongwe wa barutiwa ba Jesu o boletše mabapi le yena gore: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?” (Luka 24:32) E le gore re ithute ka Modimo, re swanetše go ikokobetša, re ikemišetše go rutwa. Jesu o itše: “Ka ntle le gore le sokologe gomme le be bjalo ka bana ba banyenyane, le ka se tsene mmušong wa magodimo le gatee.”—Mateo 18:3.

Ke ka baka la’ng go tseba Modimo go re thabiša?

Modimo o kgotsofatša kganyogo ya rena ya go nyaka go kwešiša morero wa bophelo. Jesu o itše: “Go thaba bao ba lemogago go nyaka ga bona dilo tša moya.” (Mateo 5:3) Jehofa o re ruta tsela e kaone ya bophelo. Jesu o itše: “Go thaba bao ba kwago lentšu la Modimo gomme ba le boloka!”—Luka 11:28; Jesaya 11:9.

Bakeng sa tsebišo e oketšegilego, bona kgaolo 1 ya puku ya Ke Eng Seo ge e le Gabotse Beibele e se Rutago? *

[Mongwalo wa tlase]

[Seswantšho go letlakala 16]

“Ke ba tsebišitše leina la gago.”—Johane 17:26

[Diswantšho go letlakala 16, 17]

Re ka ithuta ka Jehofa go tšwa tlholong le ka Beibeleng