Batamela Kgaufsi le Modimo

“Tšea Ngwana wa Xaxo, šó”

2 DIKXOŠI 4:8-37

GO HWELWA ke ngwana ke bjo bongwe bja mahloko a mašoro ao motho a ka lebeletšanago le ona. Jehofa Modimo o na le matla a go tsoša bana bao. Re a tseba gore se ke therešo ka gobane o ile a nea banna ba mmalwa ba mehleng ya Beibele matla a go tsoša bahu. Pego e nngwe yeo e begilwego go 2 Dikxoši 4:8-37, ke ya mošimanyana yo a ilego a tsošwa ke moporofeta Elisa.

Tiragalo ye e direga motseng wa Sunema. Mosadi wa moopa le monna wa gagwe ba ile ba swara Elisa ka botho, ka mehla ba mo nea dijo le marobalo. Ka letšatši le lengwe, moporofeta yo a lebogago o ile a botša mosadi gore: “Išaxo pak’eno O tlo ba Ò swere ngwana wa lesoxana.” Letšatši leo a bego a nagana gore le ka se ke la tla le ile la tla, gomme o na le ngwana wa mošemanyana, bjalo ka ge Elisa a boletše. Ka manyami, lethabo la gagwe ga se la tšea nako e telele. Ka morago ga nywaga e mmalwa, ngwana o opša ke hlogo o šoro ge a le mašemong gomme o išwa gae, moo a hwetšego ‘difarong tša mmagwe.’ (Ditemana 16, 19, 20) Mma yo a llago o kuka setopo se senyenyane gomme o se bea malaong ao moporofeta a bego a robala go ona gantši.

Ka ntle le go senya nako le ka tumelelo ya monna wa gagwe, o tšea leeto la dikhilomithara tše 30 go yo bona Elisa Thabeng ya Karamele. Ge a kopana le yena, ga a golole goba go lla goba go bontšha gore o nyamile ka ditsela tše dingwe. Na ke ka gobane a tseba gore Eliya, yo a ilego a hlatlangwa ke Elisa, o ile a tsoša morwa wa mosadi wa mohlologadi? (1 Dikxoši 17:17-23) Na mosadi wa Sunema o na le tumelo ya gore Elisa o tla dira se se swanago le ka morwa wa gagwe? Go sa šetšwe gore boemo ke bofe, o gana go ya gae go fihlela ge Elisa a dumela go sepela le yena.

Kua Sunema, Elisa o tsena phaphošing yeo a e tsebago kudu gomme o bona setopo sa ngwana “malaong a xaxwe.” (Temana 32) Moporofeta o batamela Jehofa ka seo e swanetšego go ba e bile topo e tseneletšego. Ke moka, ge Elisa a swere ngwana yoo ka diatla, “mmele wa ngwana wa [thoma go] huthumêla.” Pelo ya ngwana yeo e bego e eme, e thoma go betha gape! Elisa o bitša mmago ngwana gomme o mmotša mantšu ao a tla fetošago manyami a gagwe lethabo leo le sa laolegego, o re: “Tšea ngwana wa xaxo, šó!”—Temana 34, 36.

Pego ya go tsošwa ga morwa wa mosadi wa Sunema ke mothopo wa kholofelo le khomotšo. Jehofa o kwešiša manyami a batswadi bao ba lahlegetšwego ke bana ba bona ka lehu. Go feta moo, o hlologetše go tsoša bana ba bona. (Jobo 14:14, 15) Batho bao ba tsošitšwego ke Elisa le batho ba bangwe ba mehleng ya Beibele ke mohlala o bontšhago seo Modimo a tlago go se dira ka mo go phethagetšego lefaseng la gagwe le lefsa la go loka leo le tlago. *

Kholofetšo ya Beibele ya tsogo ga e tloše bohloko bja go lahlegelwa ke moratiwa. Monna yo a botegago wa Mokriste yo a hwetšwego ke ngwana o boletše gore: “Bohloko bjo ke bo kwago bo ka se ke bja fela go fihlela ge ke swara morwa wa-ka gape.” Bona ka leihlo la kgopolo o kopanywa le baratiwa ba gago ba hwilego. Kgopolo feela ya go kgona go ba swara gape e ka dira gore bohloko bjo o bo-kwago bo fokotšege. Na o nyaka go tseba ka mo go oketšegilego ka Modimo yo a re neago kholofelo ye?

[Mongwalo wa tlase]