Easter e hlaloswa ka go Encyclopædia Britannica e le “monyanya o mogolo kudu wa kereke ya Bokriste wa go bina Tsogo ya Jesu Kriste.” Eupša na ke monyanya wa Bokriste?

E le gore go kgonthišetšwe gore selo seo se hlamilwego ke batho se nepagetše, go bohlokwa gore go hlahlobje ditaba ka botlalo. Ka mo go swanago, e le gore re bone ge e ba Easter e le monyanya wa Bokriste, go nyakega gore re hlahlobe ditaba ka botlalo tša mabapi le Easter.

Sa mathomo, Jesu o ile a kgopela balatedi ba gagwe gore ba gopole lehu la gagwe, e sego tsogo ya gagwe. Moapostola Paulo o ile a bitša tiragalo ye gore ke “selalelo sa Morena.”—1 Bakorinthe 11:20; Luka 22:19, 20.

Go oketša moo, Britannica e re metlwae e mentši ya Easter “ga e sepedišane” le tsogo ya Jesu “eupša e tšwa meetlong ya batho.” Ka mohlala, The Encyclopedia of Religion ge e bolela mabapi le dilo tše di tumilego tšeo di swantšhetšago Easter e lego lee le mmutla, e re: “Lee le swantšhetša sephedi seo se tšwago go seo se bonagalago e le go hwa (go ba thata) ga kgapetla ya lee.” E oketša ka gore: “Mmutla o be o tsebja e le sephedi seo se tswalago kudu ka mo go sa tlwaelegago, gomme ka baka leo o be o swantšhetša go tla ga sehla sa seruthwane.”

Philippe Walter, e lego moprofesara wa dikgatišo tša mehleng ya magareng, o hlalosa gore meetlo e bjalo e ile ya ba karolo ya monyanya wa Easter. O ngwadile gore “mogatong wa go dirwa ga madumedi a boheitene gore e be a Bokriste,” go ile gwa ba bonolo go tswalanya monyanya wo o ketekago “go feta ga lehu la marega go ya bophelong bja nako ya seruthwane” ka tsogo ya Jesu. Walter o oketša ka gore se e bile mogato wa motheo go tšweletšeng seo go thwego ke menyanya ya Bokriste almanakeng ya boheitene, e lego seo se dirilego gore go be bonolo gore mašaba a batho a sokologele Bokristeng.

Mogato wo wa go dirwa ga menyanya gore e be ya Bokriste ga se wa ba gona nakong ya ge baapostola ba be ba sa phela, ka gobane bona ba be ba ‘thibela’ boheitene. (2 Bathesalonika 2:7) Moapostola Paulo ile a lemoša gore ka morago ga ge a “tlogile,” go be go tla “tsoga banna bao ba tlago go bolela dilo tše di kgopamego gore ba goge barutiwa gore ba ba šale morago.” (Ditiro 20:29, 30) Go yela bofelong bja lekgolong la pele la nywaga, moapostola Johane o ile a ngwala gore banna ba bangwe ba be ba šetše ba aroša Bakriste. (1 Johane 2:18, 26) Go be go bulegile tsela ya gore meetlo ya boheitene e feleletše e amogelwa.

Lega go le bjalo, ba bangwe ba ka nagana gore e be se phošo go amogela e mengwe ya meetlo ya Easter—ba bolela gore go be go nea bao go thwego ke baheitene sebaka sa gore ba kwešiše gakaone seo se bolelwago ke tsogo ya Jesu. Lega go le bjalo, Paulo le ka mohla o be a ka se dumelelane le seo. Gaešita le ge a be a kopana le meetlo e mentši ya boheitene ge a be a tšea maeto a go phatša Mmušo wa Roma, le ka mohla ga se a ka a amogela le ge e le efe ya meetlo yeo gore a nee batho kwešišo e kaone ka Jesu. Ka mo go fapanego, o ile a lemoša Bakriste ka gore: “Le se ke la rwala joko le ba ba sa dumelego. Gobane toko le go hloka molao di na le segwera sefe? Goba seetša se abelana eng le leswiswi? Jehofa o re: ‘Ka gona tšwang gare ga bona, le itlhaole le lese go kgwatha selo se se sa hlwekago.’”—2 Bakorinthe 6:14, 17.

Re hwetša eng ka morago ga go hlahloba ka boripana ditaba ka botlalo? Go bontšhitše gabotse gore Easter ga se monyanya wa Bokriste.