Ke goletše kua Ancram, e lego torotswana yeo e lego tikologong ya ka thoko ya leboa la New York, U.S.A. Toropo ye e be e tletše dipolasa tša ditšweletšwa tša maswi. Ge e le gabotse, toropo ye e be e na le dikgomo tše dintši go feta batho.

Lapa lešo le be le tsena kereke e nnoši ya toropong yeo. Ka Disontaga mesong, rakgolo o be a phadimiša dieta tša ka, ke moka ka leba sekolong sa Sontaga ke swere Beibele e tšhweu e nyenyane yeo makgolo a bego a mphile yona. Nna le baratho ba ka re be re rutilwe go šoma ka thata, go hlompha le go thuša baagišani ba rena gotee le go leboga ditšhegofatšo tša rena.

Ge ke godile, ke ile ka tloga gae gomme ka ba morutišigadi. Ke be ke na le dipotšišo tše dintši mabapi le Modimo le bophelo. Barutwana ba ka ba bangwe ba be ba tloga ba na le bokgoni. Ba bangwe bona ba be ba se na bokgoni gakaalo eupša ba be ba šoma ka thata. Ba bangwe ba be ba golofetše, mola ba bangwe ba ba be ba phetše gabotse kudu mmeleng. Ke be ke tšea boemo bjoo e le go hloka toka. Ka dinako tše dingwe batswadi ba barutwana ba ka bao ba se nago bokgoni kudu ba be ba bolela dilo tše bjalo ka gore, “Ye ke tsela yeo Modimo a nyakago gore ngwana wa ka a be ka yona.” Ke be ke ipotšiša lebaka leo ka lona Modimo a ka dumelelago gore bana ba bangwe ba belegwe ba na le magole. Go ba gona, go be go se na seo se fošagetšego seo ngwana yoo a bego a se dirile.

Gape ke be ke ipotšiša gore: ‘Ke swanetše go dira selo sefe seo se nago le morero ka bophelo bja ka?’ Ke be ke ikwa eka bophelo bja ka bo feta ka lebelo. Ke be ke goletše lapeng le lebotse, ke tsene dikolong tše dibotse gomme bjale ke šoma mošomo woo ke o ratago. Eupša karolo e šaletšego ya bophelo bja ka e be e bonagala e se na morero. Seo ke bego nka se holofela e be e le go nyalwa, go ba le legae le lebotse le bana ba sego kae, ka tšwela pele ke šoma go fihlela ke rola modiro gomme ka feleletša ka go hudugela legaeng la go hlokomela batšofadi. Ke be ke ipotšiša ge e ba go be go sa na le se sengwe seo se ka dirwago bophelong.

Selemong se sengwe, ke ile ka etela Yuropa le ba bangwe ba barutišigotee le nna. Re ile ra ya kerekeng ya Westminster Abbey, ya Notre-Dame de Paris le Vatican gotee le dikerekeng tše dingwe tše dintši tše dinyenyane. Gohle moo ke bego ke eya gona, ke be ke botšiša dipotšišo tša ka. Ka morago ga go boela gae kua Sloatsburg, New  York, ke ile ka etela dikereke tše dintši, eupša ga go yo a ilego a kgona go nnea dikarabo tše di kgotsofatšago.

Ka letšatši le lengwe, morutwana wa nywaga e 12 o ile a tla go nna gomme a mpotšiša dipotšišo tše tharo. Ya pele, o ile a botšiša ge e ba ke be ke tseba gore ke yena yo mongwe wa Dihlatse tša Jehofa. Ke ile ka dumela. Ya bobedi, o ile a botšiša ge e ba nka nyaka go tseba ka mo go oketšegilego ka Dihlatse tša Jehofa. Le nakong ye, ke ile ka dumela. Ya boraro, o ile a botšiša moo ke dulago gona. Ge ke mmotša aterese ya ka, re ile ra lemoga gore ke be ke dula kgauswi le moo lapa labo le dulago gona. Ka nako yeo ke be ke sa tsebe gore dipotšišo tšeo tše tharo tša ngwanenyana yoo yo monyenyane di be di tla fetoša bophelo bja ka sa ruri.

Ka moragonyana ga moo, o ile a tla legaeng la ka ka paesekela ya gagwe gomme a thoma thuto ya Beibele le nna. Ke ile ka mmotšiša dipotšišo tšeo ke bego ke di botšišitše baetapele ba bantši ba bodumedi. Ka go se swane le bona, o ile a mpontšha dikarabo tše di kwagalago le tše di kgotsofatšago ka Beibeleng ya ka—dikarabo tšeo ke sa kago ka di bona peleng!

Seo ke ithutilego sona ka Beibeleng se ile sa ntlatša lethabo le kgotsofalo. Ke ile ka kgomega ge ke bala 1 Johane 5:19, yeo e rego: “Lefase ka moka le rapaletše matleng a yo kgopo.” Ke ile ka ikwa ke imologile ge ke ithuta gore ga se Modimo yo a bakago manyami ka moka ao re a bonago eupša ke Sathane—le gore Modimo o tla lokiša boemo bjo. (Kutollo 21:3, 4) Ke lemogile gore Beibele e a kwešišega ge e hlaloswa ka tsela e kwagalago. Le ge Hlatse yeo ke bego ke ithuta le yona e be e na le nywaga e 12 feela, ke ile ka ipotša gore therešo ke therešo go sa šetšwe gore e bolelwa ke mang.

Le gona, ke be ke nyaka go bona ge e ba Dihlatse di phethagatša seo di se bolelago. Ka mohlala, ngwanenyana yoo yo monyenyane o be a gatelela gore Bakriste ba therešo ba bontšha dika tše bjalo ka go se fele pelo le botho. (Bagalatia 5:22, 23) Ke ile ka phetha ka gore ke tla mo leka go bona ge e ba le yena a bontšha dika tše bjalo. Ka letšatši le lengwe, ke ile ka latelwa ka boomo thutong ya rena. Ke be ke ipotšiša gore: ‘Na ke tla hwetša a ntetile? Le gona ge e ba go le bjalo, na o tla be a galefetše gore ke latetšwe?’ Ge ke lebile ntlong ka koloi, ke ile ka mmona a letile manamelong a ka pele a ntlo ya ka. O ile a kitimela koloing ya ka gomme a re: “Ke be ke re ke ya gae ke yo botša mma gore re swanetše go leletša dipetlele le maphodisa go bona ge e ba o sa phetše gabotse ka gobane ga o ke o latelwa thutong ya gago. Ke be ke tshwenyegile ka wena!”

Lebakeng le lengwe, ke ile ka botšiša potšišo yeo ke bego ke nagana gore e tla ba thata kudu gore ngwana wa nywaga e 12 a ka e araba. Ke be ke nyaka go bona ge e ba a tla itlhamela karabo. Ge ke botšiša potšišo, o ile a ntsepelela ka mahlong gomme a re: “Potšišo yeo ke e thata kudu. Ke tlo e ngwala fase gomme ka botšiša batswadi ba ka.” Therešo ke gore ge a boa nakong e latelago bakeng sa thuto ya rena, o ile a tla le tokollo ya Morokami yeo e bego e na le karabo ya potšišo ya ka. Se ke seo se nkgogetšego go Dihlatse—dikgatišo tša tšona di be di nea dikarabo tše di theilwego Beibeleng tša dipotšišo tša ka ka moka. Ke ile ka tšwela pele ke ithuta le ngwanenyana yoo yo monyenyane, gomme ka morago ga ngwaga ke ile ka kolobetšwa ke le yo mongwe wa Dihlatse tša Jehofa. *

Ge mafelelong ke hweditše dikarabo tše di kgotsofatšago tša dipotšišo tša ka, ke ile ka nyaka go di abelana le batho bohle. (Mateo 12:35) Mathomong, ba lapa lešo ba be ba ganetša ditumelo tša ka tše difsa. Lega go le bjalo, ge nako e dutše e eya, ba ile ba fetoša kgopolo ya bona. Mma o ile a thoma go ithuta Beibele go yela bofelong bja bophelo bja gagwe. Le ge a se a phela nako e teletšana gore a kolobetšwe, ke kgodišegile gore o be a dirile phetho ya go hlankela Jehofa.

Ka 1978, ke ile ka nyalana le Hlatse yeo e bitšwago Elias Kazan. Ka 1981, nna le Elias re ile ra laletšwa gore re be ditho tša lapa la Bethele la United States. * Ka manyami, ka morago ga ge re hlanketše moo ka nywaga e mene feela, Elias o ile a hlokofala. Le ge ke be ke le mohlologadi, ke ile ka dula kabelong ya ka Bethele, yeo e nneilego selo seo ke bego nka tsepelela go sona gomme sa ntlišetša khomotšo e kgolo kudu.

Ka 2006, ke ile ka nyalana le Richard Eldred, sethogotee le nna sa lapa la Bethele. Nna le Richard re sa thabela tokelo ya go hlankela Bethele. Ka ge ke tseba therešo ka Modimo, ruri ke dumela gore ga se ka hwetša feela dikarabo tšeo ke bego ke di nyaka eupša ke hweditše le morero wa kgonthe bophelong—gomme tše ka moka di thomile ka dipotšišo tše tharo tša ngwanenyana yo monyenyane.