“Entaatsya y’ensi yoona agarukire omu kabi,” orikukurira Ekitongore kya Banka y’Ensi Yoona nikwo yaarabwire omu Kwamukaaga 2022. “Hati, ebeeyi y’ebintu neeyongyera kutemba, kandi omu bwire nibwo bumwe hariho esente nkye.”

 “Ebeeyi y’amajuta n’eby’okurya etembire ahonaaho, ekikizire kuteganisa abantu omu mahango amooro,” ekitongore ekirikukora aha by’esente omu nsi yoona nikwo kigizire.

 Baibuli neetuhwera kwetegyereza ahabw’enki hariho eibura ry’esente, oku turikubaasa kugumisiriza, n’oku oburemeezi obu burikwija kugonjoorwa obutagaruka kubaho.

•   Obwire obu turimu Baibuli neebweta ‘ebiro by’emperu.’—2 Timoseo 3:1.

•   Yesu akagira ngu “ebirikutiinisa,” bikaba nibiija kubaho omu bunaku bwaitu. (Luka 21:11) Okutemba kw’ebeeyi y’ebintu nikutiinisa. Abantu nibatiina aha bikwatiraine na nyentsya yaabo, n’okubaisaho amaka gaabo.

•   Ekitabo ky’Okushuuruurwa kikagamba aha kutemba kw’ebeeyi y’ebintu omu bunaku obu. “Naahurira nk’eiraka. . . . Nirigira riti: Endengo y’engano, nari endengo ishatu za sayiri niziija kugura omushaara gw’eizooba ryona.”—Okushuuruurwa 6:6, Baibuli eya Easy-to-Read.

 Kubaasa kumanya ebirikukiraho aha ‘biro by’emperu’ n’obunabi oburi omu kitabo ky’Okushuuruurwa, reeba vidiyo Ensi Ekahinduka Kuruga 1914, kandi oshome n’ekicweka “Abavugi Bana n’Embaraasi Nibo Baahi?”

•   ‘Nibaija kwombeka amaju, bagatuuremu, nibaija kubyara emizaabibu, barye ebijuma byayo. Tibarikwija kwombeka maju, abandi bakagataahamu, tibarikwija kubyara mizaabibu, ekariibwa abandi.’—Isaaya 65:21, 22.

•   ‘Nihaija kubaho omweru mwingi omu nsi, emyaka neija kukondakonda omu misiri n’omu bibungo.’—Zaaburi 72:16.

•   “Ahabw’okunyagwa kw’abooro, n’ahabw’okutsinda kw’abakyene, mbwenu ka nyimukye, nikwo [Yehova] arikugira.”—Zaaburi 12:5. a

 Juba Ruhanga naija kumaraho embeera mbi z’eby’entaatsya, ti mu ihanga rimwe ryonka, beitu omu nsi yoona. Kubaasa kureeba oku araakikore, shoma ekicweka “Entebeekanisa y’Entaatsya ey’Oburingaaniza Neebaasika?”

 Nangwa na hati, Baibuli neebaasa kukuhwera kugumisiriza okutemba kw’ebeeyi y’ebintu. Mu muringo ki? Erimu obuhabuzi oburikukora aha bikwatiraine n’okukoresa gye sente. (Enfumu 23:4, 5; Omubuurizi 7:12) Kubaasa kwega ebirikukiraho, shoma ekicweka, “Rinda eby’Okwebaisaho Byawe” na “Oku Orikubaasa Kumarwa na Bikye.”