Ruhanga ow’amazima niwe ogwo Owaahangire ebintu byona. Taine butandikiro kandi taine bugarukiro. (Zaaburi 90:2) Niwe burugo bw’amakuru marungi agari omu Baibuli. (1 Timoseo 1:11) Tushemereire kuramya Ruhanga wenka ahakuba niwe yaatuhangire.—Shoma Okushuuruurwa 4:11.

Tihaine orareebire Ruhanga ahakuba n’omwoyo, ekirikumanyisa ngu omuringo ogu arimu nigukirira kimwe ogw’ebyahangirwe byona eby’omu nsi. (Yohaana 1:18; 4:24) Kwonka, ebi yaahangire nibituhwera kumanya emitwarize ye. Nk’eky’okureeberaho, ebijuma n’ebirabyo by’emiringo etari emwe nibyoreka rukundo ye n’obwengye bwe. Obuhango bw’eiguru n’ensi nibworeka ku aine amaani maingi.—Shoma Abarooma 1:20.

Okushoma Baibuli nikituhwera kumanya emitwarize ya Ruhanga endiijo. Nk’eky’okureeberaho, neetuhwera kumanya ebi Ruhanga arikukunda n’ebi arikwanga, oku arikutwariza abantu n’oku arikwehurira baakora ebirungi nari ebibi.—Shoma Zaaburi 103:7-10.

Yesu akagira ati: “Tataitwe ow’omu iguru, eiziina ryawe ryezibwe.” (Matayo 6:9) N’obu Ruhanga araabe aine ebitiinisa bingi, aine eiziina rimwe ryonka. Omu buri rurimi niryaturwa okwaryo. Omu Runyankore ni “Yehova.”—Shoma Zaaburi 83:18.

Omu Baibuli enyingi eiziina rya Ruhanga rikaihwamu, omu mwanya gwaryo haatebwamu ebitiinisa nka Mukama nari Ruhanga. Kwonka obu Baibuli yaahandiikwa, eiziina rya Ruhanga rikaba ririmu emirundi nka 7,000. Obu Yesu yaabaire naayegyesa  abantu ebirikukwata ahari Ruhanga akabamanyisa eiziina rya Ruhanga.—Shoma Yohaana 17:26.

Mbwenu shi obu abantu baingi barikubonabona nikimanyisa ngu Yehova ni Ruhanga otarikutufaho? Abamwe nibagira ngu naatubonabonesa kutugyeza, kwonka ekyo tikihikire.—Shoma Yakobo 1:13.

Ruhanga akaha abantu obugabe bw’okwecweramu. Ka nikitureetera okushemererwa ahabw’okwecweramu kuheereza Ruhanga! (Yoshua 24:15) Kwonka baingi nibacwamu kukora kubi abandi, ekirikureetaho okubonabona kwingi. Obutari buringaaniza nk’obwo nibugwisa kubi Yehova.—Shoma Okutandika 6:5, 6.

Yehova ni Ruhanga orikutufaho. Naayenda ngu tugire okushemererwa. Ari haihi kwihaho okubonabona n’abo abarikukureetaho. Kwonka aine enshonga ahabw’enki hati akikurekireho. Omu ishomo 8, nitwija kureeba enshonga egyo.—Shoma 1 Petero 5:7; 2 Petero 3:7, 13.

Yehova naatweta kumwirira haihi kurabira omu kushaba. Buri omwe Ruhanga naamufaho. (Zaaburi 65:2; 145:18) Naaba ayeteekateekire kutusaasira. Naareeba okuteeraho kwaitu kumushemeza n’obu obumwe turaabe nituremwa. N’obu turaabe tutahikiriire nitubaasa kugira omukago murungi na Ruhanga.—Shoma Zaaburi 103:12-14; Yakobo 4:8.

Obu Yehova niwe yaatuhangire, tushemereire kumukunda okukira ebindi byona. (Mako 12:30) Waayoreka ngu nookunda Ruhanga orikweyongyera kwega ebirikumukwataho n’okukora ebi akunda, nikiija kukuhwera kumwirira haihi.—Shoma 1 Timoseo 2:4; 1 Yohaana 5:3.