EMINYEETO NIBABUUZA
Obutingwa shi bugwire?
“Omu kukura kwangye, ekintu ekirakizireyo kungumira kugumisiriza n’okureka kurigira abu ndikushushanisa nabo obuhangwa. Nkaba ninteekateeka ngu n’ahabw’orurengo oru naabaire ndiho, kwonka na hati enyehurira ezo nizikinteganisa.”—David, ow’emyaka 23.
David n’Omukristaayo orikwenda kushemeza Ruhanga. Mbwenu shi naabaasa kushemeza Ruhanga obwo arikurigira abu arikushushanisa nabo obuhangwa? Ruhanga buzima naareeba ata ebitingwa?
Baibuli neegamba ki?
Emiteekateekyere aha butingwa neebaasa kuba neetaana kurugiirira aha nganda nari obwire obu turimu. Kwonka Abakristaayo tibarikutegyekwa ebiteekateeko by’abantu nari kutwarwatwarwa “buri muyaga gw’enyegyesa.” (Abaefeso 4:14) Kureka, emiteekateekyere ei baine aha butingwa neeyegamira aha mitindo ya Baibuli.
Emitindo ya Baibuli erikukwata aha butingwa neeyetegyerezibwa gye. Ekigambo kya Ruhanga nikigira kiti:
“Otarigira omushaija omukazi, ahabw’okuba n’ekihagaro.”—Abaleevi 18:22.
‘Ruhanga akabareka kukurata ebi emitima yaabo erikwetenga, ngu bategyekwe emize erikwitsa enshoni, abakazi baabo baareka eki emibiri yaabo yaahangiirwe, baagikoresa ekitari ky’obuhangwa.’—Abarooma 1:24, 26.
“Mutaribeihwa. Abashambani, nari abarikuramya ebishushani, nari abeegira abakazi, nari ebitingwa, nari abashuma, nari abeetengi, nari abasinzi, nari abajumi, n’obu baakuba abanyagi, abo boona tibarihungura bukama bwa Ruhanga.”—1 Abakorinso 6:9, 10.
Omu mazima, emitindo ya Ruhanga neekwata aha bantu boona, yaaba baine ebyetengo by’obutingwa nari byombi. Amazima gari ngu, buri omwe aine kwezibira kyahika aha byetengo by’okwejumba omu micwe etarikushemeza Ruhanga.—Abakolosai 3:5.
Eki shi nikimanyisa ngu . . . ?
Eki shi nikimanyisa ngu Baibuli neehiga abantu kwanga ebitingwa?
Ngaaha. Nangwa, Baibuli terikushagika rwango ey’omuringo gwona yaaba n’ebitingwa nari abantu abatereire. Kureka, neetugambira “okugira obusingye n’abantu boona,” oyihireho oku barikutwaza. (Abaheburaayo 12:14) N’ahabw’ekyo kigwire kwejumba omu kurahura, omuri rwango, nari omu muringo gwona ogw’okutwariza kubi ebitingwa.
Eki shi nikimanyisa ngu Abakristaayo baine kuhakanisa ebiragiro ebirikwikiriza obushwere bw’ebitingwa?
Baibuli neeyoreka ngu omutindo gwa Ruhanga n’omushaija omwe kushwera omukazi omwe. (Matayo 19:4-6) Kwonka, ebiragiro by’abantu ebirikukwata aha bushwere bw’ebitingwa n’eby’obutegyeki, beitu ti by’emicwe. Baibuli neegambira Abakristaayo kuguma bataine rubaju. (Yohaana 18:36) N’ahabw’ekyo, tibarikushagika ebiragiro bya gavumenti ebirikukwata aha bushwere bw’ebitingwa nari kubihakanisa.
Kwonka shi . . . ?
Kwonka shi hati omuntu ku yaakuba ari ekitingwa? Naabaasa kuhinduka?
Eego. Nangwa, na bamwe omu kyasha ky’okubanza bakahinduka! Baibuli bwanyima y’okugira ngu abantu ebitingwa tibarikwija kuhungura Obukama bwa Ruhanga, neegira eti: “Bamwe omuriimwe mukaba muri nk’abo.”—1 Abakorinso 6:11.
Mbwenu shi eki nikimanyisa ngu abo abaarekire obutingwa tibakiine kyetengo kyona ahabw’entwaza yaabo ey’enyima? Ngaaha. Baibuli neegira eti: ‘Mujware omuntu omusya, orikuhindurwa musya obutoosha omu bwengye.’ (Abakolosai 3:10) Okukora empinduka nikugumizamu.
Kwonka shi omuntu orikwenda kukuratira emitindo ya Ruhanga ku yaakuba akiine ebyetengo by’obutingwa?
Nk’okwegomba okundi kwona, omuntu naabaasa kucwamu kutakukuriiriza nari kutakukoreraho. Mu muringo ki? Baibuli neegira eti: “Mugume mugyendere omu mwoyo, obwo nibwo mutarihikiiriza okw’okwetenga kw’omubiri.”—Abagalatia 5:16.
Yetegyereze ngu ekyahandiikirwe eki ti kyagira ngu omuntu tarikwija kugira ebyetengo by’omubiri. Kureka, omuntu yaaba aine entebeekanisa nungi y’eby’omwoyo, arikweyegyesa Baibuli kandi arikushaba, naija kugira amaani gw’okwangira ebyetengo.
David, owaagambwaho aha kutandika, akashanga ngu kihikire na munonga bwanyima y’okugambira abazaire be oburemeezi bwe. “Nkaihwaho omugugu guremeire aha mabega gangye,” nikwo arikugira, “kandi obundi nkaba ninyija kwesiimira omu bushogoyo bwangye ku ogire ngu nkagamba kare.”
Empereruka, nitushemererwa twahamira aha mitindo ya Yehova. Nituhamya ngu emitindo egyo ‘ehikire, neegwisa gye omutima,’ kandi ‘n’omu kugyorobera harimu ebihembo bingi.’—Zaaburi 19:8, 11.
