Kɛmɔ adwuleso ninyɛne ɛbu la ati, bie a wɔ gyimamenle, menli mɔɔ ɛ nee bɛ yɛ gyima anzɛɛ ɛ nee bɛ di gua la anye la kɛ bɛ sa baha wɔ mekɛ biala mɔɔ bɛkulo la. Ɛhye maa ɔyɛ se kɛ ɛbaye wɔ adwenle wɔavi gyima zo, na wɔava wɔazie ninyɛne gyɛne mɔɔ anwo hyia wɔ ɛbɛlabɔlɛ nu le kɛ wɔ agyalɛ ne la azo.

•  Mɔɔ ɔwɔ kɛ ɛnwu ye la

•  Gyima nee ninyɛne gyɛne mɔɔ hyia la anwo nzuzulɛ

•  Mɔɔ agyalɛma ka la

•  Kɛzi bɛsuzu ninyɛne nwo la

•   Adwuleso ninyɛne bahola amaa wɔava mekɛ dɔɔnwo wɔayɛ gyima wɔadɛla mekɛ mɔɔ ɛnyia ɛmaa wɔ agyalɛ ne la. Saa ɛnyia gyima nu call, e-mail anzɛɛ tɛse message wɔ mekɛ mɔɔ ɛnle gyima nu la a ɔbahola yeamaa wɔade nganeɛ kɛ ɔle debie mɔɔ ɔhyia kɛ ɛdi nwolɛ gyima ndɛndɛ a.

   “Ɔyɛ se kɛ ɛvi gyima nu ɛba sua nu a ɛbanyia mekɛ wɔamaa ɛ ye anzɛɛ ɛ hu ɔluakɛ gyima nu email nee call mɔɔ ɛnyia la maa ɛ rɛle fi ɛ nwo bɔkɔɔ.”​—Jeanette.

•   Amaa wɔanyia mekɛ mɔɔ fɛta la wɔamaa wɔ agyalɛ ne nee wɔ gyima la, ɔwɔ kɛ ɛyɛ nwolɛ debie. Saa wɔanyɛ ngyehyɛleɛ kpalɛ a, mekɛ mɔɔ ɛbanyia wɔamaa wɔ gyima la bazo adɛla mɔɔ ɛbanyia wɔamaa wɔ agyalɛ ne la.

   “Saa ɔba ye zɛhae a, ɛmpili ɛ hu ɔluakɛ ɛnyia adwenle kɛ, ‘O, ɔbade ɔ bo. Ɔbagyakyi yeamaa yeaha. Mebanyia mekɛ meamaa ye nzinlii.’”​—Holly.

•   Maa wɔ agyalɛ ne ɛhyia wɔ. Baebolo ne ka kɛ: “Mɔɔ Nyamenle ɛha ɛbɔ nu la, mmamaa awie biala kpakye nu.” (Mateyu 19:6) Saa ɛnrɛmaa awie biala ɛnrɛhwe wɔ ɛnrɛvi ɛ hu anzɛɛ ɛ ye anwo a, duzu ati a ɛmaa wɔ gyima ayɛ zɔ a?

   “Menli mɔɔ ɛ nee bɛ di gua la bie mɔ dwenle kɛ kɛmɔ bɛtua wɔ kakɛ la ati, ɔwɔ kɛ bɛ sa ka wɔ mekɛ biala mɔɔ bɛhyia ɛ nwo la. Me agyalɛ ne hyia me, ɔti memaa bɛnwu ye kɛ bɛ sa ɛnrɛha me wɔ mekɛ mɔɔ menle gyima nu la, noko mebavɛlɛ bɛ nzinlii.”​—Mark.

   Biza ɛ nwo kɛ, ‘Asoo me nyɛleɛ kile kɛ me agyalɛ ne hyia me tɛla me gyima ɔ?’

•   Mmadie gyima dɔɔnwo ɛgua ɛ nwo zo. Baebolo ne ka kɛ: “Bɛlɛvoma ze nrɛlɛbɛ.” (Mrɛlɛbulɛ 11:2) Saa ɛbɛlɛ ɛ nwo aze a, ɛbanwu kɛ nrɛlɛbɛ wɔ nu kɛ ɛbakpo gyima bie anzɛɛ ɛbava wɔ gyima ne bie wɔamaa awie.

   “Mele plumber, ɔti saa awie hyia me nwo arɛlevilɛ nu na ɔ sa anga me a, ɔgyegye ye kpalɛ. Ɛhye ati saa menrɛhola menrɛyɛ ye gyima ne wɔ mekɛ mɔɔ ahenle hyia nwo la a, mekile ye awie fofolɛ mɔɔ bahola aboa ye la.”​—Christopher.

   Biza ɛ nwo kɛ: ‘Asoo melɛ ɛhulolɛ kɛ menrɛlie gyima dɔɔnwo menrɛgua me nwo zo amaa me hu anzɛɛ me ye ande nganeɛ kɛ mekpo ye ɔ? Duzu a me ye anzɛɛ me hu baha a?’

•   Bɛnyia mekɛ bɛmaa bɛ nwo. Baebolo ne ka kɛ: “Debie biala lɛ ye mekɛ.” (Nolobɔvo 3:1) Saa gyima dɔɔnwo gua ɛ nwo zo a, ɛnee ɔhyia kɛ ɛyɛ ngyehyɛlɛ na ɛnyia mekɛ ɛmaa wɔ agyalɛ ne.

   “Saa gyima dɔɔnwo gua yɛ nwo zo a, yɛyɛ ngyehyɛleɛ na yɛkpondɛ mekɛ​—saa bɔbɔ ɔle mekɛ mɔɔ yɛbabɔ nu yɛali aleɛ anzɛɛ yɛahɔluolua ɛnweazo ala bɔbɔ a. Yɛmmaa debie biala ɛndwehwe yɛ adwenle.”​—Deborah.

   Biza ɛ nwo kɛ: ‘Asoo meyɛ ngyehyɛleɛ mɔɔ maa menyia mekɛ memaa me hu anzɛɛ me ye angomekye mɔɔ debie biala ɛndwehwe me adwenle ɔ? Duzu a me ye anzɛɛ me hu baha a?’

•   Nua wɔ ɛlɛtɔlɔneke ninyɛne. Baebolo ne ka kɛ: Bɛnwu “ninyɛne mɔɔ hyia kpalɛ la.” (Felepaema 1:10) Ɔdwu mekɛ ne bie a ɛbahola wɔanlua wɔ fonu anzɛɛ wɔ tabelɛte amaa gyima andwehwe wɔ adwenle ɔ?

   “Mebɔ mɔdenle kɛ menrɛyɛ gyima wɔ mekɛ fɔɔnwo bie. Mekɛ zɔhane dwu a, mefa me fonu ne meto ɛleka mɔɔ ɔnrɛzu ɔnrɛgyegye me la.”​—Jeremy.

   Biza ɛ nwo kɛ: ‘Asoo mete nganeɛ kɛ ɔwɔ kɛ mesɔ me fonu ne amaa saa me gyimamenle anzɛɛ menli mɔɔ me nee bɛ di gua la hyia me nwo a bɛ sa aha me ɔ? Duzu a me ye anzɛɛ me hu baha a?’

•   Da ndelebɛbo ali. Baebolo ne ka kɛ: “Bɛmaa menli kɔsɔɔti ɛnwu kɛ bɛlɛ ndelebɛbo.” (Felepaema 4:5) Ndelebɛbo wɔ nu kɛ ɔyɛ a bɛbava mekɛ mɔɔ bɛfa bɛbɔ nu bɛyɛ ninyɛne la bie mɔ bayɛ gyima. Kɛ neazo la, bie a ɔlua gyima mɔɔ ɛ hu anzɛɛ ɛ ye yɛ la ati, saa ɔkpɔne gyima bɔbɔ a ɔwɔ kɛ bɛkola bɛ nee ye tendɛ. Da ndelebɛbo ali, mmanea kɛ ɛ ye anzɛɛ ɛ hu bayɛ debie mɔɔ bo ɔ nwo zo la.

   “Me hu yɛ ɔ ti anwo gyima, na bɛta bɛfɛlɛ ye arɛlevilɛ nu. Ɔyɛ a ɛhye ka me ɛya, noko ɔnyia mekɛ dɔɔnwo ɔmaa me ɔti ɔle kpalɛ.”​—Beverly.

   Biza ɛ nwo kɛ: ‘Asoo medwenle gyima mɔɔ gua me hu anzɛɛ me ye anwo zo la anwo, ɔti memkpondɛ dɔɔnwo menvi ye ɛkɛ ɔ? Duzu a me ye anzɛɛ me hu baha a?’

 Mɔɔ limoa la, bɛ nuhua ko biala bahola azuzu kpuya mɔɔ doa zo la anwo. Akee bɛbɔ nu bɛzuzu bɛ mualɛ ne anwo.

•   Asoo ɛ ye anzɛɛ ɛ hu ɛha kɛ ɛwɔ sua nu bɔbɔ a gyima ala ɛdwenle nwo ɔ? Saa ɔle zɔ a, ɛ nee ye yɛ adwenle ɔ?

•   Ɛleka boni mɔ a ɛnea a ɔwɔ kɛ ɛyɛ nzenzaleɛ amaa wɔanva wɔ mekɛ muala wɔanyɛ gyima a?

•   Ɛdwenle kɛ ɛ hu anzɛɛ ɛ ye toa gyima zo wɔ sua nu ɔ? Saa ɔle zɔ a, mekɛ boni ɔ?

•   Nzenzaleɛ boni mɔ a ɛbahulo kɛ ɛ hu anzɛɛ ɛ ye yɛ wɔ kɛzi ɔyɛ ye gyima la anu a?