Ɛtane Boni A Adam Nee Yive Yɛle A?

BƆ

Mualɛ mɔɔ Baebolo ne fa maa la

Adam nee Yive a le alesama mɔɔ limoale yɛle ɛtane a. Mekɛ mɔɔ bɛyɛle Nyamenle anwo anzosesebɛ bɛlile “baka ne mɔɔ maa bɛnwu kpalɛ nee ɛtane” la bie la, yɛɛ bɛyɛle ɛtane a. * (Gyɛnɛsese 2:16, 17; 3:6; Wulomuma 5:19) Ɛnee Adam nee Yive ɛnlɛ adenle ɛnli zɔhane baka ne bie, ɔluakɛ ɛnee ɔgyi ɛkɛ ɔmaa Nyamenle tumililɛ anzɛɛ adenle mɔɔ ɔlɛ ɔsi kpalɛ nee ɛtane nwo kpɔkɛ ɔmaa alesama la. Mɔɔ Adam nee Yive lile baka ne bie la, ɛnee bɛlɛyɛ debie mɔɔ bɛnlɛ nwolɛ adenle kɛ bɛyɛ la, ɛnee bɛlɛkpa kɛ bɛbazi bɛ ti anwo kpɔkɛ wɔ mɔɔ le kpalɛ nee mɔɔ le ɛtane la anwo. Ɛhye mɔɔ bɛyɛle la maanle bɛkpole tumi mɔɔ Nyamenle lɛ kɛ ɔkile bɛ mɔɔ le kpalɛ nee ɛtane la.

Kɛzi ɛtane mɔɔ Adam nee Yive yɛle la hanle bɛ ɛ?

Ɔluakɛ Adam nee Yive yɛle ɛtane la ati, bɛyɛle mgbanyinli na awieleɛ bɔkɔɔ ne bɛwule. Bɛzɛkyele agɔnwolɛvalɛ mɔɔ ɛnee bɛ nee Nyamenle lɛ la yɛɛ bɛminlinle nwolɛ adenle mɔɔ ɛnee bɛlɛ kɛ bɛbadɛnla aze dahuu wɔ kpɔkɛdelɛ kpalɛ nu la.—Gyɛnɛsese 3:19.

Kɛzi ɛtane mɔɔ Adam nee Yive yɛle la ka yɛ ɛ?

Adam nee Yive vale ɛtane mɔɔ wɔ bɛ nwo la wole bɛ bo zo amra kɛ mɔɔ kakula bie kola nyia ewule bie fi ye awovolɛ ɛkɛ la. (Wulomuma 5:12) Ɔti, bɛva “ɛtane” bɛwo alesama amuala, ɛhye kile kɛ bɛkawo yɛ la ɛnee yɛnli munli, ɔti ɔnyɛ se kɛ yɛbayɛ ɛtane. *—Edwɛne 51:5; Ɛfɛsɛsema 2:3.

Ɔluakɛ bɛvale ɛtane anzɛɛ sinlidɔlɛ bɛwole yɛ la ati, yɛ nwo to yɛ, yɛyɛ mgbanyinli na yɛwu. (Wulomuma 6:23) Eza yɛnwu ɛtane mɔɔ yɛdayɛ mumua ne yɛyɛ anzɛɛ mɔɔ awie mɔ yɛ la anwo amaneɛ.—Nolobɔvo 8:9; Gyemise 3:2.

Bɛbahola bɛalie yɛ bɛavi mɔɔ Adam nee Yive ɛtane ne ɛva ɛra yɛ nwo zo la anu ɔ?

Ɛhɛe. Baebolo ne ka kɛ Gyisɛse rawule bɔle “yɛ ɛtane nwo mgbɔdalɛ afɔle.” (1 Dwɔn 4:10) Gyisɛse afɔlebɔlɛ ne kola die yɛ fi mɔɔ Adam nee Yive ɛtane ne ɛva ɛra yɛ nwo zo la anu na ɔmaa yɛnyia mɔɔ bɛminlinle—anyelazo mɔɔ ɛnee bɛlɛ kɛ bɛbadɛnla aze dahuu wɔ kpɔkɛdelɛ kpalɛ nu la.—Dwɔn 3:16. *

Ɛtane mɔɔ Adam nee Yive yɛle la anwo adalɛ edwɛkɛ

Adalɛ edwɛkɛ: Yɛnrɛhola yɛnrɛbikye Nyamenle ɛlɛ ɔlua ɛtane mɔɔ Adam ne Yive yɛle la ati.

Nɔhalɛ edwɛkɛ: Nyamenle ɛnva mɔɔ Adam nee Yive yɛle la anwo somolɛ ɛmbɔ yɛ. Ɔze kɛ yɛnli munli, yɛɛ ɔ nye ɛnla kɛ yɛbayɛ debie mɔɔ ɔze kɛ yɛnrɛhola ye yɛ la. (Edwɛne 103:14) Ɔwɔ nu kɛ bɛva ɛtane bɛwo yɛ ɛdeɛ, noko yɛlɛ nwolɛ adenle kɛ yɛ nee Nyamenle banyia agɔnwolɛvalɛ kyengye.—Mrɛlɛbulɛ 3:32.

Adalɛ edwɛkɛ: Ɛzɔnenlɛ te yɛ nwo fi ɛtane mɔɔ Adam nee Yive yɛle la anwo, ɔti ɔhyia kɛ bɛsɔne mbɔdɔma.

Nɔhalɛ edwɛkɛ: Ɔwɔ nu kɛ ɛzɔnenlɛ nwo hyia amaa awie anyia ngoanelielɛ, noko diedi mɔɔ yɛbanyia wɔ Gyisɛse afɔlebɔlɛ ne anu ala a bahola ade awie anwo avi ɛtane nwo a. (1 Pita 3:21; 1 Dwɔn 1:7) Ɔluakɛ nɔhalɛ diedi gyi ndelebɛbo mɔɔ awie lɛ la azo la ati, mbɔdɔma ɛnrɛhola ɛnrɛnyia diedi. Ɔti, Baebolo ne ɛnlie mbɔdɔma mɔɔ bɛsɔne bɛ la ɛndo nu. Ɛnee alimoa Kilisienema ze nɔhalɛ edwɛkɛ ɛhye. Bɛanzɔne mbɔdɔma, emomu bɛzɔnenle diedima—“mrenyia nee mraalɛ” mɔɔ ɛnee bɛlɛ Nyamenle Edwɛkɛ ne anu diedi la.—Gyima ne 2:41; 8:12.

Adalɛ edwɛkɛ: Nyamenle wale mraalɛ amonle ɔluakɛ Yive a limoale lile bakama ne mɔɔ Nyamenle duale bɛ kɛ bɛmmadi bie la bie a.

Nɔhalɛ edwɛkɛ: Nyamenle anwa mraalɛ amonle, emomu “mɔmoane ɛwɔlɛ ne mɔɔ bɛfɛlɛ ye Abɔnsam nee Seetan,” mɔɔ bɛlɛbɛlale Yive maanle ɔyɛle ɛtane la a ɔwale ye amonle a. (Yekile 12:9; Gyɛnɛsese 3:14) Bieko, Nyamenle vale ɛtane mɔɔ Adam nee Yive yɛle la anwo somolɛ bɔle Adam na tɛ ɔ ye.—Wulomuma 5:12.

Duzu ati a Nyamenle hanle kɛ Adam bali ɔ ye anwo zo tumi a? (Gyɛnɛsese 3:16) Mekɛ mɔɔ Nyamenle ɛlɛka edwɛkɛ ɛhye la, ɛnee ɔngile kɛ ɔdie nyɛleɛ zɛhae ɔto nu. Ɛnee ɔlɛka mɔɔ bavi bɛ ɛtane ne anu ara la anwo edwɛkɛ. Nyamenle anye la kɛ nrenyia bahulo ɔ ye na yeali ye eni na yeala ɛbulɛ kpole ali yeahile mraalɛ kɔsɔɔti.—Ɛfɛsɛsema 5:25; 1 Pita 3:7.

Adalɛ edwɛkɛ: Nla nu ngitanwolilɛ a le ɛtane mɔɔ Adam nee Yive yɛle a.

Nɔhalɛ edwɛkɛ: Tɛ nla nu ngitanwolilɛ a le ɛtane mɔɔ Adam nee Yive yɛle ɔlua ndelebɛbo ɛhye mɔ ati:

Nyamenle maanle Adam mɛla kɛ ɔmmadi baka ne mɔɔ maa bɛnwu kpalɛ nee ɛtane la bie wɔ mekɛ mɔɔ ɛnee ɔ ngomekye a ɔde na ɔnlɛ ɔ ye la.—Gyɛnɛsese 2:17, 18.
Nyamenle hanle hilele Adam nee Yive kɛ “bɛwo bɛmaa bɛ nwo ɛzo.” (Gyɛnɛsese 1:28) Saa Nyamenle hwenle agyalɛma mɔɔ limoa la anzo wɔ debie mɔɔ ɔse bɛyɛ la anwo a, anrɛɛ ɔbahile kɛ ɔ ti yɛ se.
Adam nee Yive anyɛ ɛtane wɔ mekɛ ko anu—Yive limoale yɛɛ ɔ hu doale ye nzinlii.—Gyɛnɛsese 3:6.
Baebolo ne die kunli nee yelɛ avinli nla nu ngitanwolilɛ to nu.—Mrɛlɛbulɛ 5:18, 19; 1 Kɔlentema 7:3.

^ Menli dɔɔnwo die di kɛ Adam nee Yive a limoale yɛle ɛtane a. Noko nɔhalɛ ne a le kɛ, ɛtane mɔɔ limoa mɔɔ bɛhɛlɛle wɔ Baebolo ne anu la a le Seetan mɛlɛbɛla nee adalɛ edwɛkɛ mɔɔ ɔhanle ɔhilele Yive la.—Gyɛnɛsese 3:4, 5; Dwɔn 8:44.

^ Wɔ Baebolo ne anu, edwɛkɛkpɔkɛ “ɛtane” ɛngile nyɛleɛ mɔɔ ɛnle kpalɛ la ala, emomu eza ɔkile sinlidɔlɛ mɔɔ bɛvale bɛwole yɛ la.

^ Amaa wɔazukoa Gyisɛse afɔlebɔlɛ ne nee kɛzi yɛbahola yɛanyia zolɛ nvasoɛ anwo edwɛkɛ dɔɔnwo la, nea edwɛkɛ “Kɛzi Gyisɛse Die Ngoane Ɛ?”