Gyɛnɛsese 39:1-23
39 Bɛvale Dwosefi bɛhɔle Yigyibiti,+ na Yigyibitinli bie mɔɔ bɛfɛlɛ ye Pɔtefaa,+ Falo mgbanyima ne mɔ ko mɔɔ nea sinzavolɛma ne mɔ anwo zo la dɔle ye vile Yehyemɛlema+ mɔɔ vale ye hɔle ɛkɛ ne la ɛkɛ.
2 Noko ɛnee Gyihova nee Dwosefi lua.+ Ɔti ɔwiele ye boɛ, na ɔ menle Yigyibitinli ne vale ye awuke ne wulale ɔ sa nu.
3 Na ɔ menle ne nwunle kɛ ɛnee Gyihova nee ye lua yɛɛ Gyihova maa debie biala mɔɔ ɔyɛ la yɛ boɛ.
4 Dwosefi hɔle zo nyianle ɔ nyunlu ɛlolɛ, na ɔrayɛle ye sonvolɛ mɔɔ ɔdie ye ɔdi. Ɔti ɔvale ye awuke ne ɔwulale ɔ sa nu na ɔmaanle ɔnleanle debie biala mɔɔ ɔlɛ la azo.
5 Ɔvi mekɛ mɔɔ ɔvale ye awuke ne ɔwulale Dwosefi asa anu na ɔmaanle ɔnleanle ye debie biala azo la, ɔlua Dwosefi ati Gyihova yilale Yigyibitinli ne awuke ne azo, na Gyihova yilale debie biala mɔɔ ɔlɛ wɔ sua nu ɛkɛ yɛɛ ɛbɔ nu la azo.+
6 Akee ɔvale ye debie biala ɔwulale Dwosefi asa anu, na yeandwenle debie biala anwo kɛ aleɛ mɔɔ ɔbali la ala. Na Dwosefi nyinle yɛle nrenyia kɛnlɛma mɔɔ ɔgyi zo sengɔɔnwo.
7 Nzinlii, akee ɔ menle aye ne dule ɔ nye ziele Dwosefi anwo na ɔhanle kɛ: “Ɛ nee me ɛla.”
8 Noko yeanyɛ na ɔhanle ɔhilele ɔ menle aye ne kɛ: “Kɛkala me menle ɛndwenle ninyɛne mɔɔ meyɛ ye wɔ sua nu ɛke la anwo, na yeva debie biala mɔɔ ɔlɛ la yewula me sa nu.
9 Awie biala ɛnle kpole ɛndɛla me wɔ awuke ɛhye anu, yɛɛ ɔtɛtuale me wɔ debie biala anwo kɛ ɛdawɔ ala, ɔluakɛ ɔ ye a le wɔ. Ɔti kɛzi mekola meyɛ amumuyɛ kpole ɛhye na meyɛ ɛtane metia Nyamenle ɛ?”+
10 Ɛnee ɔka ɔkile Dwosefi dahuu, noko Dwosefi amkponle ɛlɛ kɛ ɔ nee ye bala anzɛɛ ɔ nee ye badɛnla bɔbɔ.
11 Noko kenle ko bie mɔɔ ɔhɔle awuke ne anu kɛ ɔkayɛ ye gyima la, ɛnee sonvolɛma mɔɔ wɔ sua nu ɛkɛ ne la biala ɛnle sua nu.
12 Akee raalɛ ne zɔle Dwosefi tɛladeɛ ne anu na ɔhanle kɛ: “Ɛ nee me ɛla!” Noko Dwosefi gyakyile ye tɛladeɛ ne maanle ye na ɔnriandile ɔvindele alienwo.
13 Na mɔɔ raalɛ ne nwunle kɛ yegyakyi ye tɛladeɛ ne yemaa ye na yenriandi yevinde alienwo la,
14 ɔdeɛdeanle nu ɔvɛlɛle mrenyia mɔɔ wɔ ye sua nu ɛkɛ ne la na ɔzele bɛ kɛ: “Bɛnlea! Yehɔva Hibulunli nrenyia ɛhye yera ɛke kɛ ɔragolo yɛ nwo. Ɔrale me nwo ɛke kɛ ɔba ɔ nee me arala, noko mendeɛdeanle nuhua.
15 Na mɔɔ ɔdele kɛ mɛlɛteɛdea nu mgbole la, ɔgyakyile ye tɛladeɛ ne wɔ me nwo ɛke na ɔnriandile ɔvindele alienwo.”
16 Ɛhye anzi, ɔvale Dwosefi tɛladeɛ ne ɔguale ɔ nwo ɛkɛ ɔhɔkpulale kɛ Dwosefi amenle rale sua nu la.
17 Akee ɔhanle edwɛkɛ ko ne ala ɔhilele ye, ɔse: “Hibulunli sonvolɛ ne mɔɔ ɛhɔvale ye ɛrale ɛke la rale kɛ ɔba yearagolo me nwo.
18 Noko mɔɔ mendeɛdeanle nu mgbole la, ɔgyakyile ye tɛladeɛ ne wɔ me nwo ɛke na ɔnriandile ɔvindele alienwo.”
19 Mɔɔ ɔ menle ne dele edwɛkɛ mɔɔ ɔ ye hanle hilele ye kɛ: “Debie mɔɔ wɔ sonvolɛ ne ɛyɛ ɛhile me la ɛne” ala la, ɔvale ɛya kpole.
20 Ɔti Dwosefi amenle ne vale ye hɔdole efiade, ɛleka mɔɔ belemgbunli ne pilizama ne gua la, na ɔlale efiade ɛkɛ ne.+
21 Noko Gyihova nee Dwosefi luale na ɔhɔle zo ɔlale ɛlɔlɛ kpundii ali ɔhilele ye, na ɔmaanle ɔnyianle kpanyinli ne mɔɔ nea efiade ɛkɛ ne la anyunlu ɛlolɛ.+
22 Ɔti kpanyinli ne mɔɔ nea efiade ɛkɛ ne la maanle Dwosefi nleanle pilizama mɔɔ wɔ efiade ɛkɛ ne la amuala anwo zo, na ɔdaye a ɛnee ɔnea ɔmaa bɛyɛ debie biala wɔ ɛkɛ ne a.+
23 Kpanyinli ne mɔɔ nea efiade ɛkɛ ne la andwenle debie biala mɔɔ wɔ Dwosefi asa anu la anwo, ɔluakɛ ɛnee Gyihova nee Dwosefi lua yɛɛ Gyihova maanle debie biala mɔɔ ɔyɛle la yɛle boɛ.+
