EDWƐKƐ TITILI | DUZU ATI A GYISƐSE NWUNLE AMANEƐ NA ƆWULE A?
Asoo Ɔzile Amgba Ɔ?
Wɔ 33 Y.M. nyenyesuo mekɛ nu, bɛhunle Gyisɛse mɔɔ vi Nazalɛte la. Bɛdole ye ɛzonle kɛ ɔle maamɔvo, bɛbole ye atisesebɛ nu na bɛbɔle ye baka nu. Ɔwule nyane ewule. Noko Nyamenle dwazole Gyisɛse rale ngoane nu, na ye kenle 40 anzi, ɔhɔle anwuma.
Yɛnwu nwanwane edwɛkɛ ɛhye wɔ Edwɛkpa nna ne mɔɔ wɔ Kilisiene Giliki Ngɛlɛlera ne, mɔɔ bɛta bɛfɛlɛ ye Ngyekyeleɛ Fofolɛ ne la anu. Asoo ninyɛne ɛhye mɔ zile amgba ɔ? Kpuya ɛhye anwo hyia ɛsesebɛ kpalɛ. Saa yeanzi a, ɛnee Kilisienema diedi ne le mgbane yɛɛ dahuu ngoane anyelazo wɔ Paladaese bayɛ ɛlalɛ ala. (1 Kɔlentema 15:14) Wɔ adenle fofolɛ zo, saa edwɛkɛ ɛhye mɔ zile a ɛnee alesama lɛ kenle bie anyelazo kpalɛ, mɔɔ ɛbahola wɔaboka nwo a. Yemɔti, Edwɛkpa ne le nɔhalɛ anzɛɛ ɔle nwɔra ɔ?
MƆƆ NƆHALƐ NE KILE LA
Edwɛkpa ne ɛnle kɛ nwɔra mɔɔ bɛbɔ bɛ ti anu bɛto la, ɔka edwɛkɛ ne pɛpɛɛpɛ na ɔtwe adwenle ɔsie edwɛkɛ fɔɔnwo bie azo. Kɛ neazo la, azua aluma wɔ nu mɔɔ bɛ nuhua dɔɔnwo wɔ ɛkɛ mɔɔ ɛbahola wɔahɔ ɛkɛ ɛnɛ a. Bɛka menli mɔɔ bɛdɛnlanle aze mɔɔ tetedwɛkɛ kɛlɛvoma ɛlie ɛdo nu kɛ ɔle zɔ la anwo edwɛkɛ.—Luku 3:1, 2, 23.
Ewiade kɛlɛvoma mɔɔ dɛnlanle aze wɔ ɛvoya mɔɔ limoa nee mɔɔ tɔ zo nwiɔ anu la hanle Gyisɛse anwo edwɛkɛ. * Adenle mɔɔ bɛluale zo bɛhunle ye, mɔɔ bɛha ye wɔ Edwɛkpa ne anu la nee adenle mɔɔ Wulomuma dua zo ku menli wɔ mekɛ zɔhane la le ko. Bieko, bɛka edwɛkɛ ne nɔhalɛ nu, bɔbɔ bɛhanle Gyisɛse ɛdoavolɛma ne nyɛleɛ bie mɔ mɔɔ ɛnle kpalɛ la anwo edwɛkɛ. (Mateyu 26:56; Luku 22:24-26; Dwɔn 18:10, 11) Edwɛkɛ ɛhye mɔ amuala di daselɛ kɛ Edwɛkpa kɛlɛvoma ne le nɔhavoma na mɔɔ bɛhɛlɛle wɔ Gyisɛse anwo la le pɛpɛɛpɛ.
GYISƐSE EWUDWAZO NE NOKO Ɛ?
Menli dɔɔnwo die di kɛ Gyisɛse dɛnlanle aze na ɔwule ɛdeɛ, noko bie mɔ su ye ewudwazo ne anwo kpolera. Ye ɛzoanvolɛma ne bɔbɔ anlie anli wɔ mekɛ mɔɔ limoa mɔɔ bɛdele kɛ yedwazo la. (Luku 24:11) Noko mekɛ mɔɔ bɛ nee ɛdoavolɛma gyɛne nwunle ye wɔ ɛleka ngakyile la bɛliele bɛlile. Nɔhalɛ nu, mekɛ bie anu, menli mɔɔ bo 500 la nwunle ye.—1 Kɔlentema 15:6.
Ɛdoavolɛma ne vale akɛnrasesebɛ bɔle Gyisɛse ewudwazo ne anwo nolo hilele awie biala—bɔbɔ bɛdabɛ mɔɔ bɛhunle ye la, ɔnva nwo kɛ ɛnee bɛkola bɛkye bɛ na bɛku bɛ la. (Gyima ne 4:1-3, 10, 19, 20; 5:27-32) Saa ɛnee ɛdoavolɛma ne ɛnlie ɛnli kɛ bɛdwazole Gyisɛse amgba a, asoo anrɛɛ bɛbanyia akɛnrasesebɛ ɔ? Nɔhalɛ nu, Gyisɛse ewudwazo ne mɔɔ zile amgba la a le debie mɔɔ Kilisiene ɛzonlenlɛ ne gyi zo ɔvi mekɛ zɔhane dedee badwu ɛnɛ.
Gyisɛse ewule nee ye ewudwazo ne anwo kɛlɛtokɛ mɔɔ wɔ ɛkɛ la di daselɛ kɛ Edwɛkpa ne le nɔhalɛ wɔ tetedwɛkɛ nu. Saa ɛtɔ ɛ rɛle aze ɛkenga a ɔbamaa wɔanyia anwodozo kɛ edwɛkɛ ɛhye mɔ sisile amgba. Saa ɛte deɛmɔti bɛzile la abo a, wɔ anwodozo ne bayɛ kpole. Edwɛkɛ mɔɔ doa zo la bɛahilehile nu.
^ ɛden. 7 Tacitus mɔɔ bɛwole ye kɛyɛ 55 Y.M. anu, hɛlɛle kɛ “Kelaese mɔɔ ye nuhua a [Kilisienema] nyianle bɛ duma ne vile la, nwunle amaneɛ kpole wɔ Pɔnteɛse Paelɛte asa nu wɔ mekɛ mɔɔ amɛnlado Taebileɛse ɛlɛdi tumi la.” Suetonius (ɛvoya mɔɔ limoa); Dwuuma tetedwɛkɛ kɛlɛvo Josephus (ɛvoya mɔɔ limoa) yɛɛ Pliny, Baetenea amɛnlado Kpavolɛ ne (ɛvoya mɔɔ tɔ zo nwiɔ la mɔlebɛbo) noko hanle Gyisɛse anwo edwɛkɛ.
