Maa Baebolo Ne Ɛhilehile Wɔ

Duzu Ati A Nyamenle Ɛmaa Ɛtaneyɛlɛ Nwo Adenle A?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Kɛ ɛtaneyɛlɛ zile bɔle ɔ bo ɛ?

Ɛtaneyɛlɛ bɔle ɔ bo wɔ azɛlɛ ye azo wɔ mekɛ mɔɔ Seetan bɔle adalɛ mɔɔ lumua la. Bɛbɔle Seetan la ɛnee nvonleɛ biala ɛnle ɔ nwo. Ɛnee ɔle anwumabɔvolɛ mɔɔ di munli, noko “yeanli nɔhalɛ.” (Dwɔn 8:44) Ɔ nye bolole ɛzonlenlɛ mɔɔ bɛfa bɛmaa Nyamenle la. Seetan bɔle adalɛ hilele Yive na ɔmanle ɔdiele ye. Yeammaa Yive andie Nyamenle. Adam noko andie Nyamenle. Mɔɔ Adam yɛle la a manle amaneɛnwunlɛ nee ewule rale a.—Kenga Mɔlebɛbo 3:1-6, 17-19.

Seetan bɛlɛbɛlale Yive kɛ ɔmmatie Nyamenle la, ɛnee ɔlɛte Nyamenle tumililɛ nwo atua. Menli dɔɔnwo nee Seetan ɛyɛ ko, bɛkpo Nyamenle kɛ bɛ Belemgbunli. Ɛhye ati, Seetan a “sie ɛtane ewiade ɛhye” a.—Kenga Dwɔn 14:30; Yekile 12:9.

2. Asoo Nyamenle ambɔ ninyɛne boɛ?

Ɛnee menli nee anwumabɔvolɛma mɔɔ Nyamenle bɔle bɛ la di munli mɔɔ bɛkola bɛdi Nyamenle mɛla zo. (Mɛla ne 32:5) Nyamenle bɔle yɛ na ɔmanle yɛ adenle mɔɔ yɛkola yɛkpa mɔɔ le kpalɛ anzɛɛ ɛtane. Adenle ɛhye mɔɔ Nyamenle ɛva ɛmaa yɛ la maa yɛkola yɛda ye ali kɛ yɛkulo ye.—Kenga Gyemise 1:13-15; 1 Dwɔn 5:3.

3. Duzu ati a Nyamenle ɛmaa amaneɛnwunlɛ nwo adenle a?

Bɛdele Gyihova tumililɛ ne anwo atua la, yemaa mekɛ ekyi ɛgua nu. Duzu ati ɔ? Amaa yeala ali kɛ awie biala ɛnrɛhola ɛnrɛnlea menli nwo zo kpalɛ. (Gyɛlɛmaya 10:23) Ɛvolɛ 6,000 mɔɔ ɛze ɛhɔ wɔ alesama tetedwɛkɛ nu la ɛmaa nɔhalɛ ne ɛla ali. Alesama tumililɛ ɛtɛkolale ɛtɛtule konle, ɛtanelilɛ, nzisi nee ewule ngakyile abo.—Kenga Nolobɔvo ne 7:29; 8:9; Wulomuma 9:17.

Noko menli mɔɔ ɛva Nyamenle ɛyɛ bɛ Belemgbunli la nyia nyilalɛ. (Ayezaya 48:17, 18) Ɔnrɛhyɛ, Nyamenle bazɛkye alesama tumililɛ kɔsɔɔti. Menli mɔɔ maa Nyamenle di bɛ nwo zo tumi la a badɛnla azɛlɛ ne azo a.—Ayezaya 2:3, 4; 11:9; kenga Daneɛle 2:44.

  4. Nwolɛ adenle boni a Nyamenle abotane ne ɛmaa yɛnyia a?

Seetan kile kɛ dasanli biala ɛnrɛli nɔhalɛ ɛnrɛmaa Gyihova. Nyamenle abotane ne maa yɛnyia adenle yɛkile kɛ yɛkulo Ye tumililɛ anzɛɛ dasanli ɛdeɛ. Yɛ ɛbɛlabɔlɛ a yɛfa yɛkile a.—Kenga Dwobu 1:8-11; Mrɛlɛbulɛ 27:11.

5. Kɛ ɔkɛyɛ na yɛava Nyamenle kɛ yɛ Belemgbunli ɛ?

Saa yɛsonle Nyamenle nɔhalɛ nu kɛmɔ ye Edwɛkɛ Baebolo ne kile la a, ɛnee yɛlɛfa ye yɛayɛ yɛ Belemgbunli. (Dwɔn 4:23) Eza ɔwɔ kɛ yɛsukoa Gyisɛse na yɛtwe yɛ nwo yɛfi maanyɛlɛ, nee konle konle nwo.—Kenga Dwɔn 17:14.

Seetan maa menli fa bɛ nwo wulowula ɛbɛlatane nee ninyɛne mɔɔ sɛkye bɛ la anu. Saa yɛkpo nyɛleɛ zɛhae mɔ a yɛ gɔnwo mɔ nee yɛ mbusuafoɔ bie mɔ bagolo yɛ nwo anzɛɛ badwazo atia yɛ. (1 Pita 4:3, 4) Yemɔti ɔwɔ kɛ yɛsi kpɔkɛ. Asoo yɛ nee menli mɔɔ kulo Nyamenle la badu? Yɛbali ye mɛla ne mɔ mɔɔ yevi ɛlɔlɛ nee nrɛlɛbɛ nu yeva yemaa yɛ la azo ɔ? Saa yɛdi zo a, ɛnee yɛlɛmaa edwɛkɛ mɔɔ Seetan hanle kɛ awie biala ɛnrɛdie Nyamenle la ayɛ adalɛ.—Kenga 1 Kɔlentema 6:9, 10; 15:33.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 11.

[Nvoninli wɔ mukelɛ 12]

Adam yɛle ɛtane

[Nvoninli wɔ mukelɛ 13]

Mɔɔ yɛyɛ la kile kɛ yɛkulo Nyamenle kɛ yɛ Belemgbunli anzɛɛ yɛngulo