“Debie ko mɔɔ ɔyɛ se ɔmaa me mɔɔ melɛbɔ mɔdenle kɛ mebali zolɛ la a le nganeɛ mɔɔ mete kɛ meyɛ mgbane la.” Ɛhye a raalɛ ko mɔɔ ɔnlie ɔnli kɛ Gyihova bahola adwenle ɔ nwo la hanle a. Ɛdawɔ noko ɛte nganeɛ zɔhane ɔ? Saa ɔle zɔ a, bie a ɛbazuzu kɛ, ‘Asoo Gyihova dwenle ye sonvolɛ ko biala anwo?’ Mualɛ ne se ɛhɛe! Yɛnwu daselɛ mɔɔ kile kɛ Gyihova dwenle yɛ nuhua ko biala anwo la wɔ Gyisɛse edwɛkɛ ne anu.—Kenga Dwɔn 6:44.

Duzu a Gyisɛse mɔɔ ze Gyihova subane nee ye ɛhulolɛdeɛ kpalɛ tɛla awie biala la hanle a? (Luku 10:22) Gyisɛse hanle kɛ: “Awie biala ɛnrɛhola ɛnrɛra me nwo, kyesɛ Selɛ ne mɔɔ zoanle me la twe ye bɛlɛ me.” Yemɔti, yɛnrɛhola yɛnrɛyɛ Kelaese ɛdoavolɛ—na yɛnrɛzonle yɛ anwuma Selɛ, Gyihova—kyesɛ Gyihova mumua ne twe yɛ. (2 Tɛsalonaekama 2:13) Saa yɛte mɔɔ Gyisɛse hanle la abo a, yɛbanwu kɛ ye edwɛkɛ ne di daselɛ kpole kɛ Nyamenle dwenle yɛ nuhua ko biala anwo.

Gyihova twe yɛ abo kile duzu? Giliki yɛkpɔkɛ mɔɔ bɛhile ɔ bo “twe” la eza kile fɛlɛ mɔɔ bɛtwe bɛ wɔ avonle nu la. (Dwɔn 21:6, 11) Asoo Gyihova twe yɛ wɔ mekɛ mɔɔ yɛngulo la na ɔyɛ ye kyengye kɛ yɛzonle ye? Kyɛkyɛ. Gyihova maa yɛfi yɛ ɛhulolɛ nu yɛyɛ debie, yemɔti ɔnga ye kyengye kɛ yɛzonle ye. (Mɛla ne 30:19, 20) Nwomanli ko hanle ye kɛnlɛma kɛ: “Sonla ahonle nu edwɛkɛ ɛdeɛ, kyesɛ ɔdaye mumua ne.” Gyihova neɛnlea menli mgbe mgbe mɔɔ wɔ ewiade la ahonle nu, na ɔkpondɛ menli mɔɔ bɛkulo kɛ bɛsonle ye la. (1 Edwɛkɛsisilɛ 28:9) Saa ɔnyia sonla zɛhae bie a, ɔfi ɛlɔlɛ nu ɔboa ye. Adenle boni azo?

Gyihova fi ɛlɔlɛ nu twe sonla zɛhae mɔɔ kulo “ngoane” la ahonle. (Gyima ne 13:48) Gyihova yɛ ɛhye wɔ adenle nwiɔ azo—ɔdua edwɛkpa ne mɔɔ le Baebolo ne anu edwɛkɛ ne mɔɔ yɛ nuhua ko biala te, yɛɛ ye sunsum nwuanzanwuanza ne azo. Saa Gyihova nwu ahonle mɔɔ kulo Baebolo ne anu nɔhalɛ ne la a, ɔfa ye sunsum ne ɔboa ahenle ɔmaa ɔte nɔhalɛ ne abo na ɔfa ɔbɔ ye ɛbɛla. (1 Kɔlentema 2:11, 12) Saa Nyamenle amboa yɛ a, yɛnrɛhola yɛnrɛyɛ Gyisɛse nɔhalɛ ɛdoavolɛma na yɛayɛ Gyihova azonvolɛ kpalɛ.

Ɛnee duzu a Gyisɛse edwɛkɛ ne mɔɔ wɔ Dwɔn 6:44 la maa yɛnwu ye wɔ Gyihova Nyamenle anwo a? Gyihova twe menli ɔluakɛ ɔnwu debie kpalɛ wɔ bɛ ahonle nu na ɔdwenle bɛ nuhua ko biala anwo la ati ɔ. Edwɛkɛ ɛhye mɔɔ maa anwosesebɛ mɔɔ raalɛ ne mɔɔ yɛhanle ɔ nwo edwɛkɛ wɔ mɔlebɛbo ne dele ɔ bo la kyekyele ɔ rɛle. Ɔka kɛ: “Ɔle nwolɛ adenle kpole kɛ awie bayɛ Gyihova sonvolɛ. Yemɔti saa Gyihova ɛye me kɛ menzonle ye a ɛnee ɔkile kɛ me nwo hyia ye.” Na ɛdawɔ ɛ? Asoo kɛzi wɔnwu kɛ Gyihova dwenle ye sonvolɛ ko biala anwo la ɛha wɔ ɛmaa wɔnyia ɛhulolɛ kɛ ɛbabuke wɔ ahonle nu ɔ?