Тӕрегъӕдгӕнагӕ адӕймаги бон фӕууй ӕхе иннӕ адӕймаги бунати райвӕрун ӕма ин куд зин ӕй, уой балӕдӕрун. Психолог Рик Хансон загъта: «Иннетӕн тӕрегъӕд кӕнун нӕ тоги ӕй».

РАСАГЪӔС КӔНӔ. Цума иннетӕн тӕрегъӕд кӕнун айдагъ адӕймаги бон цӕмӕн ӕй? Библи нин лӕдӕрун кӕнуй, Хуцау адӕймаги ӕхемӕ гӕсгӕ ке сфӕлдиста (Райдайӕн 1:26). Гъома уомӕ цӕхуӕн менеугутӕ ес, уӕхӕн менеугути хӕццӕ. Мадта адӕн иннетӕн ку фӕттӕрегъӕд кӕнунцӕ, ӕма син ку банхус кӕнунцӕ, уӕд се Сфӕлдесӕг Хуцау Йегови менеуӕг равдесунцӕ (Ӕмбесӕндтӕ 14:31).

Хуцауӕн нӕ гъезӕмӕрттӕмӕ кӕсун зин ӕй. Рагон израилӕгтӕ Египети цагъартӕ ку адтӕнцӕ, уой фӕсте ба 40 анзей дӕргъи ӕдзӕрӕг будури ку цудӕнцӕ, уӕд сӕмӕ Хуцау ци зӕрдӕ дардта, уой туххӕй Библий финст ӕй: «Уонӕн зин ку адтӕй, уӕд зин адтӕй уомӕн дӕр» (Исай 63:9). Хуцау син сӕ зиндзийнӕдтӕ уотид уингӕ нӕ кодта, фал ӕй лӕдӕрдтӕй, куд зин син адтӕй, уой, ӕма загъта: «Зонун ӕй, куд уодхар кӕнунцӕ» (Рацуд 3:7). «Сумахмӕ ка ӕвналуй, е мин мӕ цӕстигагумӕ ӕвналуй» (Захари 2:8). Еске нӕ ку фефхуӕруй, уӕд Хуцауӕн дӕр зин фӕууй.

Еуӕй-еухатт нӕхецӕн цидӕр ке нӕ фӕххатир кӕнӕн, уой туххӕй нӕмӕ уотӕ фӕккӕсуй, цума Хуцауи фӕлмӕнзӕрдӕдзийнади аккаг нӕ ан. Фал Библи зӕгъуй, «Хуцау нӕ зӕрдитӕй устурдӕр ӕй ӕма алцидӕр зонуй», зӕгъгӕ (1 Иоанни 3:19, 20). Хуцау нӕ нӕхецӕй хуӕздӕр зонуй. Хуарз нин зонуй нӕ уавӕртӕ, нӕ гъудитӕ, удта нӕ зӕрди ци ес, уой ӕма нин тӕрегъӕд кӕнуй.

 Библи зӕгъуй:

• «Йеговӕмӕ исдзиназдзӕнӕ, ӕма дин дзуапп ратдзӕй, ӕнхусмӕ имӕ фӕсседдзӕнӕ, ӕма дин зӕгъдзӕй: „Мӕнӕ дӕн!“» (ИСАЙ 58:9).

• «„Ӕз ӕй хуарз зонун, сумах туххӕй мӕ зӕрди ци ес, уой,– зӕгъуй Йеговӕ.– Мӕнӕн мӕ зӕрди ес сумах бӕллӕхи хай бакӕнун нӕ, фал фарнӕй исхайгин кӕнун, цӕмӕй уин уа федӕн ӕма нифс. Дзордзиайтӕ мӕмӕ, ӕрбацӕудзиайтӕ ӕма мӕмӕ ковдзиайтӕ, ӕма уӕ ӕз фегъосдзӕн“» (ЙЕРЕМИ 29:11, 12).

• «Мӕ цӕстисугтӕ мин дӕ лалуни исӕвӕрӕ. Дӕ киунуги финст нӕ ’нцӕ?» (ПСАЛОМ 56:8)2.

Хуцау нин тӕрегъӕд ке кӕнуй, уой ку зонӕн, уӕд нин е зин рӕстӕг куд ӕнхус кӕндзӕй? Ӕркӕсӕн, Марийӕ ци радзурдта, уомӕ.

«Нӕ ’й лӕдӕрдтӕн, ма цард уотӕ зин цӕмӕн ӕй ӕма мӕбӕл уӕхӕн хабар цӕмӕн ӕрцудӕй, уой. Мӕ 18-анздзуд биццеу дууӕ анзи раккӕй фӕгъгъезӕмарӕ кодта ӕма рамардӕй. Уӕд хъӕбӕр устур рист ӕма маст бавзурстон. Йеговӕмӕ мӕстгун кодтон, ӕ незӕй ӕй ке не ’сдзӕбӕх кодта, уой туххӕй!

Ӕхсӕз анзей фӕсте ӕмбурди мӕ хуарз ӕмбалӕн радзурдтон, уотӕ мӕмӕ ке кӕсуй, ӕма мӕ Йеговӕ нӕ уарзуй. Е мӕмӕ цалдӕр сахатти фегъуста, удта мин бакастӕй 1 Иоанни 3:19, 20 финст дзурдтӕ: „Хуцау нӕ зӕрдитӕй устурдӕр ӕй ӕма алцидӕр зонуй“. Еци дзурдтӕ мӕ зӕрдӕмӕ багъардтонцӕ. Удта ма мин балӕдӕрун кодта, Йеговӕ нин нӕ зӕрди рист хъӕбӕр хуарз ке лӕдӕруй.

Фал ма уӕддӕр Йеговӕбӕл мӕ зӕрдӕ худтӕй. Уой фӕсте ма бакастӕн Псалом 94:19 финст дзурдтӕ: „Тухст сагъӕстӕ мин ӕнцойнӕ ку нӕбал лӕвардтонцӕ, уӕд мин дӕ зӕрдӕфедаргӕнӕн дзурдтӕ рӕвдудтонцӕ мӕ уод“. Уотӕ мӕмӕ фӕккастӕй, цума еци дзурдтӕ мӕнӕн финст ӕрцудӕнцӕ! Фӕстагмӕ мӕ бон иссӕй Йеговӕн радзорун, ци мӕ тухсун кодта, уой, уомӕн ӕма ’й зудтон, ке мӕ игъосуй ӕма мӕ ке лӕдӕруй».

Хуцау нӕ ке лӕдӕруй ӕма нӕбӕл ке тухсуй, уой зонун устур уодӕнцойнӕ ӕй! Фал уӕддӕр уойбӕрцӕ зиндзийнӕдтӕ цӕмӕн ӕвзарӕн? Хуцау нӕ нӕ тӕрегъӕдти туххӕй ке ӕфхуӕруй, уой туххӕй? Хуцау ескӕд зиндзийнӕдтӕн кӕрон искӕндзӕй? Аци фарстатӕбӕл дзурд цӕудзӕй иннӕ статьяти.