Кенийы дыууӕ пионеры куы хъусын кодтой, уӕд сӕ чидӕр хӕдзармӕ фӕхуыдта. Мидӕмӕ куы бахызтысты, уӕд иу нӕлгоймаджы сынтӕджы хуысгӕ федтой. Йӕ буар уыди ӕнахуыр гыццыл, йӕ къухтӕ та – цыбыр. Хуыцау зӕрдӕ цӕмӕй ӕвӕры, уый тыххӕй йын куы загътой, «къуылых чи у, уый сагау згъордзӕн», зӕгъгӕ, уӕд йӕ цӕсгом ныррухс ӕмӕ йӕ мидбылты бахудт (Ис. 35:6).

Пионертӕ базыдтой, уыцы нӕлгоймаг, Онисмус, кӕй райгуырди стджыты низимӕ (остеопсатироз). Йе стджытӕ сты тынг лӕмӕгъ – гыццыл дӕр сыл куы бахӕцай, уӕд асӕтдзысты. Уыцы низӕн хос кӕй нӕй, уымӕ гӕсгӕ Онисмус афтӕ хъуыды кодта, ӕмӕ йӕ рыстытӕй никуы фервӕздзӕн ӕмӕ цӕрӕнбонты уыдзӕн инвалиды коляскӕйы.

Онисмус сразы Библи ахуыр кӕныныл. Фӕлӕ йӕ йӕ мад нӕ уагъта ӕмбырдтӕм цӕуын, зӕгъгӕ йыл исты куы ’рцӕуа ӕмӕ йӕ уавӕр куы фӕфыддӕр уа. Уымӕ гӕсгӕ-иу ӕфсымӕртӕ ӕмбырды программӕ ныффыстой ӕмӕ-иу ӕм Онисмус хӕдзары байхъуыста. Фондз мӕйы куы рацыд, уӕд Онисмус аскъуыддзаг кодта, ӕмбырдмӕ кӕй ацӕудзӕн, кӕд уый йе ’нӕниздзинадӕн тӕссаг уыди, уӕддӕр.

Цымӕ Онисмус ӕмбырдтӕм цӕуын кӕй райдыдта, уый йе ’нӕниздзинадӕн исты зиан ӕрхаста? Нӕ, хабар бынтон ӕндӕрхуызон рауад! Мӕнӕ цы загъта йӕхӕдӕг: «Ӕмбырды рӕстӕг-иу мӕ мӕ рыстытӕ айрох сты». Онисмус куыд загъта, афтӕмӕй йын фидӕнӕй цы диссаджы ныфс фӕзынд, уый йын лӕвӕрдта хъарутӕ. Онисмусы мад бафиппайдта, йӕ лӕппу кӕй фӕхъӕлдзӕгдӕр, ӕмӕ афтӕ цин кодта, ӕмӕ йӕхӕдӕг дӕр сразы Библи ахуыр кӕныныл. Уый загъта: «Мӕ лӕппуйӕн йӕ хос у Хуыцауӕн лӕггад кӕнын».

Бирӕ нӕ рацыд, афтӕ Онисмус сси ӕнӕаргъуыд хъусынгӕнӕг. Фӕстӕдӕр донаргъуыд райста ӕмӕ ныр лӕггад кӕны кӕстӕриуӕггӕнӕг ӕфсымӕрӕй. Кӕд йӕ къӕхтӕ ӕмӕ йӕ иу къух нӕ кусынц, уӕддӕр ӕй тынг фӕндыд, цӕмӕй Йегъовӕйӕн лӕггад кӕнгӕйӕ, йӕ бон цыдӕриддӕр уыд, уый арӕзтаид. Онисмусы фӕндыди ӕххуысгӕнӕг пионерӕй лӕггад кӕнын, фӕлӕ ӕфсӕрмы кодта уый тыххӕй ӕфсымӕртӕн зӕгъын. Цӕмӕн? Уымӕн ӕмӕ йӕ ӕмбӕрста, уӕд ӕй искӕй кӕй хъӕудзӕн ралас-балас кӕнын. Йӕ сагъӕстӕ хотӕ ӕмӕ ӕфсымӕртӕн куы радзырдта, уӕд ын зӕрдӕ бавӕрдтой, кӕй йын ӕххуыс кӕндзысты. Ӕмӕ Онисмус ӕххуысгӕнӕг пионерӕй лӕггад кӕнын куы райдыдта, уӕд уыдон дӕр сӕ ныхас ӕххӕст кодтой.

Онисмусы ӕххӕстрӕстӕг пионерӕй лӕггад кӕнын куы бафӕндыд, уӕд дӕр та сагъӕс кодта, зӕгъгӕ мын чи ӕххуыс кӕндзӕн. Фӕлӕ иу бон брошюрӕ «Фыстад иртас» куы каст, уӕд дзы стыр ныфс бауагъта уыцы боны стих. Уый уыд Псалом 34:8: «Бафӕлварут ӕмӕ базонут, Йегъовӕ куыд хорз у, уый». Онисмус уыцы стихыл куы ахъуыды кодта, уӕд аскъуыддзаг кодта, ӕххӕстрӕстӕг пионерӕй лӕггад кӕнын кӕй райдайдзӕн. Ныр къуыри цыппар боны хъусын кӕны ӕмӕ, Библи кӕимӕ ахуыр кӕны, уыдон рӕстдзинады фӕндагыл размӕ цӕуынц. 2010 азы Онисмус ахуыр кодта Пионерты скъолайы. Уыцы скъолайы ахуыргӕнӕджы куы федта, уӕд йӕ цинӕн кӕрон дӕр нал уыд. Уый уыди, фыццаг хатт ӕм чи ӕрбацыд, уыцы ӕфсымӕртӕй сӕ иу!

Ныр Онисмусыл цӕуы 40 азмӕ ӕввахс. Хъыгагӕн, Онисмусӕн йӕ ныййарджытӕ нал сты, ӕмӕ йӕм ныр кӕсынц ӕмбырды хотӕ ӕмӕ ’фсымӕртӕ. Хуыцауӕй тынг бузныг у, цы бирӕ арфӕдзинӕдтӕй хайджын у, уый тыххӕй. Ӕмӕ зӕрдиагӕй ӕнхъӕлмӕ кӕсы уыцы бонмӕ, иу адӕймаг дӕр афтӕ куы нал зӕгъа, «ӕз рынчын дӕн», зӕгъгӕ (Ис. 33:24).