Иуӕй-иутӕ ахицӕн вӕййынц, уымӕн ӕмӕ фӕхъуыды кӕнынц, афтӕмӕй сӕ цард кӕй фӕхуыздӕр уыдзӕн. Иннӕты та фӕфӕнды сӕ цардӕмбалимӕ цӕргӕйӕ баззайын, фӕлӕ сӕ сӕ бон бауромын не свӕййы. Куыдфӕнды ма уа, уӕддӕр чи ахицӕн, уыдонӕн сӕ фылдӕр зӕгъынц, сӕ цард, ӕнхъӕл куыд уыдысты, уымӕй зындӕр кӕй фӕци. Кӕд ды дӕр дӕ цардӕмбалӕй ӕрӕджы ахицӕн дӕ, уӕд, ӕвӕццӕгӕн, разы дӕ, уый тынг зын кӕй у. Уымӕ гӕсгӕ хорз уыдзӕн ӕркӕсын иуӕй-иу уынаффӕтӕм Библийӕ. Уыдоны фӕрцы сфӕраздзынӕ, дӕ цардӕмбалӕй кӕй ахицӕн дӕ, уый дын цы зындзинӕдтӕ ӕрхаста, уыдон.

Адӕймаг тынг фӕмаст кӕны ӕхцайы тыххӕй, сывӕллӕтты хъомыл кӕнын ӕй кӕй фӕхъӕуы, стӕй йӕхимӕ иунӕг кӕй фӕкӕсы, уый тыххӕй, ӕмӕ йӕ уыцы хъуыдытӕ бирӕ рӕстӕг уӕгъд нӕ фӕуадзынц. Психолог Джудит Валлерстайн сбӕрӕг кодта, чи ахицӕн ис, уыдонӕй иуӕй-иутӕ бирӕ азты фӕстӕ дӕр кӕй нӕма фервӕзтысты, гадзрахатӕй сыл кӕй рацыдысты ӕмӕ сӕ кӕй ныууагътой, уыцы хъуыдытӕй. Ахӕм адӕм фӕзӕгъынц, царды рӕстдзинад кӕй нӕй, адӕймаджы фыдӕнхъӕл фӕкӕны ӕмӕ йӕ иунӕгӕй ныууадзы, зӕгъгӕ.

 ЦЫ ИС САРАЗӔН?

• Маст кӕныс, дӕ цардӕмбал дӕ фарсмӕ кӕй нал ис, ууыл. Чи зоны дӕ цардӕмбалы ныр дӕр ма уарзыс ӕмӕ йӕ мысыс. Кӕд уӕ кӕрӕдзи бынтон хорз не ’мбӕрстат, уӕддӕр, чи зоны, маст кӕныс, уӕ цард баиу кӕныны размӕ уӕм цы рӕсугъд фӕндтӕ уыд, уыдонӕй уын кӕй ницы рауад, ууыл (Ӕмбисӕндтӕ 5:18). Кӕуын дӕм куы цӕуа, уӕд-иу ма ӕфсӕрмы кӕн (Екклесиаст 3:1, 4).

• Дӕхи иннӕтӕй дард ма лас. Кӕд фенкъард кӕныс ӕмӕ дӕ фӕфӕнды хибарӕй аззайын, уӕддӕр, бирӕ рӕстӕг иунӕгӕй уай, уый раст нӕу (Ӕмбисӕндтӕ 18:1). Де ’мбӕлттимӕ-иу куы ныхас кӕнай, уӕд-иу дӕ ныхас уӕд, ныфс сӕ цы бауадздзӕн, ахӕм хъуыддӕгтыл, уымӕн ӕмӕ ӕдзух дӕ раздӕры цардӕмбалӕй куы хъаст кӕнай, уӕд сӕ дӕхицӕй адард кӕндзынӕ. Дӕ цардӕмбалимӕ куы ахицӕн стут, уымӕй кӕд бирӕ нӕма рацыд, ӕмӕ дӕ исты ахсджиаг уынаффӕ рахӕссын хъӕуы, уӕд ӕххуыс бацагур, кӕуыл ӕууӕндыс, ахӕм адӕймагӕй.

• Де ’нӕниздзинадыл тыхс. Адӕймагӕн йӕ бинонты цард куы фехӕлы, уӕд уый фӕзыны йе ’нӕниздзинадыл дӕр, зӕгъӕм, йӕ туджы ӕлхъывдад сбӕрзонд вӕййы кӕнӕ йӕ сӕры рыстӕй йӕ хуыссӕнӕй сыстын дӕр нал фӕфӕразы. Хорз хӕр, гимнастикӕ кӕн ӕмӕ фаг фынӕй кӕн (Ефесӕгтӕм 5:29).

• Дӕ раздӕры цардӕмбалы мӕстытӕ дын дӕ зӕрдыл цы дзауматӕ лӕууын кӕнынц кӕнӕ дӕ чи нал хъӕуынц, уыдон аппар, фӕлӕ хъӕугӕ гӕххӕттытӕ ма аппар. Кӕд дын, зӕгъӕм, уӕ чындзӕхсӕвы къамтӕм кӕсын зын у, уӕд сӕ къоппы сӕвӕр, ӕмӕ сӕ искуы бафснай, цӕмӕй-иу сӕм уый фӕстӕ уӕ сывӕллӕттӕ кӕсой.

• Ӕвзӕр хъуыдытимӕ тох кӕн. Ольгӕйыл йӕ цардӕмбал гадзрахатӕй куы рацыд, уӕд дзы ахицӕн. Ольгӕ зӕгъы: «Ӕдзух-иу хъуыды кодтон, уыцы сылгоймаг мӕнӕй цӕмӕй хуыздӕр у, зӕгъгӕ». Фӕлӕ йӕ фӕстӕдӕр бамбӕрста, адӕймаг ӕдзух ахӕм цӕуылдӕрты куы фӕхъуыды кӕны, уӕд йӕ зӕрдӕ кӕй асӕтты (Ӕмбисӕндтӕ 18:14).

  Бирӕтӕ зӕгъынц, зӕгъгӕ сӕ цы фӕтыхсын кӕны, уыдӕттӕ гӕххӕттыл фӕфыссынц. Уый сын ӕххуыс кӕны, цӕмӕй-иу сӕ хъуыдытӕ хуыздӕр бамбарой ӕмӕ сыл сӕ бар цӕуа. Афтӕ куы кӕнай, уӕд-иу бацархай, цӕмӕй ӕндӕр цӕуылдӕрты хъуыды кӕнай, ӕмӕ, кӕимӕ тох кӕныс, уыцы ӕвзӕр хъуыдытӕн дӕ зонды бынат мауал уа (Ефесӕгтӕм 4:23). Рӕдыд хъуыды цавӕр раст хъуыдыйӕ ис аивӕн, уымӕн дӕлдӕр ис дыууӕ цӕвиттоны.

  Рӕдыд хъуыды: «Мӕ цардӕмбал мыл гадзрахатӕй кӕй рацыд, уый мӕ аххос у».

  Раст хъуыды: «Кӕд мӕм цавӕрдӕр хъӕндзинӕдтӕ ис, уӕддӕр мӕ цардӕмбалӕн уый бар нӕ уыд, цӕмӕй мыл гадзрахатӕй рацыдаид».

  Рӕдыд хъуыды: «Мӕ хуыздӕр азтӕ ӕвзӕр адӕймагимӕ арвыстон».

  Раст хъуыды: «Фӕстӕмӕ нӕ, фӕлӕ размӕ куы кӕсон, уӕд амондджындӕр уыдзынӕн».

• Зӕрдӕриссӕн ныхӕстӕ мацӕмӕ дар. Чи зоны дын де ’мбӕлттӕ ӕмӕ дӕ хӕстӕджытӕ сӕ хорз зӕрдӕйӕ дзурой, хъыг дын чи уыдзӕн кӕнӕ дӕ уавӕрмӕ чи нӕ хауы, ахӕм цыдӕртӕ, зӕгъӕм: «Ницы кӕны, уӕддӕр дӕу аккаг нӕ уыд». Кӕнӕ: «Хуыцау йе сӕфт уыны, лӕг ӕмӕ ус куы ахицӕн вӕййынц, уымӕй» *. Уӕдӕ Библийы дзӕгъӕлы фыст нӕй: «Адӕм цы дзурынц, уыдон се ’ппӕт дӕ зӕрдӕмӕ ма ис» (Екклесиаст 7:21). Дыууӕ азы йӕ лӕгӕй хицӕн чи у, иу ахӕм сылгоймаг, Мартинӕ, зӕгъы: «Зӕрдӕ чи фӕриссын кӕны, ахӕм ныхӕстыл хъуыды кӕныны бӕсты архайын алцӕмӕдӕр Хуыцауы цӕстӕй кӕсыныл. Уый хъуыдытӕ мах хъуыдытӕй уӕлдӕр сты» (Исай 55:8, 9).

• Хуыцаумӕ кув. Хуыцау йӕ лӕггадгӕнджытӕн дзуры, цӕмӕй йын се ’ппӕт сагъӕстӕ дӕр йӕ бар бакӕной, уӕлдайдӕр та истӕуыл тынг куы фӕмӕт кӕнынц, уӕд (1 Петры 5:7).

Джулианӕ йӕ лӕгимӕ фӕцард 11 азы. Джулианӕ загъта: «Мӕ лӕгӕн лӕгъстӕ кодтон, цӕмӕй ма ацыдаид. Фӕлӕ куы ацыд, уӕд мӕстӕй фыхтӕн уымӕ дӕр ӕмӕ, кӕмӕ ацыд, уыцы сылгоймагмӕ дӕр». Йӕ цардӕмбал кӕй ныууадзы, уыдонӕй бирӕтӕн сӕ маст бирӕ азты дӕргъы дӕр не ссӕуы. Фӕлӕ сӕ уӕддӕр хатт фӕхъӕуы семӕ ныхас кӕнын, уӕлдайдӕр та сын сывӕллӕттӕ куы вӕййы, уӕд.

ЦЫ ИС САРАЗӔН?

• Дӕ раздӕры цардӕмбалмӕ знаджы цӕстӕй ма кӕс. Дзурут-иу, ӕрмӕстдӕр ӕнӕмӕнг цы хъӕуы, уыдӕттыл, фӕлӕ-иу уӕ ныхас ма ныддаргъ кӕнут. Бирӕтӕ зӕгъынц, уый сын кӕй ӕххуыс кӕны кӕрӕдзимӕ хорз цӕстӕй кӕсынӕн (Ромӕгтӕм 12:18).

• Ахӕм ныхӕстӕ ма кӕн, цӕмӕй йӕ смӕсты кӕнай. Уӕ ныхас хылмӕ кӕй асайдзӕн, уый-иу куы бамбарай, уӕд-иу дын хорз ӕххуыс фӕуыдзӕн Библийы уынаффӕ: «Дзурынмӕ тагъд чи нӕ кӕны, уымӕ ис ӕцӕг зонындзинӕдтӕ» (Ӕмбисӕндтӕ 17:27). Бӕлвырд хъуыддӕгтыл дзурынӕй уӕ ныхас ӕндӕр цӕмӕдӕр куы ахиза, ӕмӕ уын стӕй, цӕуыл дзырдтат, ууыл аныхас кӕнын куы нал уайа, уӕд дӕ бон у зӕгъын: «Цы мын загътай, ууыл ахъуыды кӕндзынӕн, ӕмӕ уӕд ӕндӕр хатт аныхас кӕндзыстӕм».

• Раздӕр уын иумӕйаг чи уыд, уыцы хабӕрттыл ныр алчидӕр йӕхӕдӕг тыхсӕд, зӕгъӕм, закъон кӕй домы, уыцы ӕмӕ медицинон гӕххӕттытыл, стӕй ӕхцайы хабӕрттыл.

Марийӕ йӕ лӕгӕй куы ахицӕн, уый хӕдфӕстӕ цы уыд, уый тыххӕй радзырдта: «Мӕ кӕстӕр чызг-иу ӕдзух кодта кӕугӕ ӕмӕ та ногӕй ӕхсӕвыгӕтты йӕ бын хуылыдз кӕнын райдыдта. Мӕ хистӕр чызг бӕргӕ архайдта, йӕ зӕрдӕйы цы уыд, уый ӕмбӕхсыныл, фӕлӕ йӕ уыдтон, уымӕн дӕр ӕнцон кӕй нӕ уыд». Чи зоны дӕм афтӕ кӕса, ӕмӕ дӕ сывӕллӕтты ӕххуыс ӕппӕты тынгдӕр куы фӕхъӕуы, уӕд кӕнӕ дӕ бон ницы вӕййы, кӕнӕ дын рӕстӕг нӕ вӕййы.

ЦЫ ИС САРАЗӔН?

• Архай, цӕмӕй дын дӕ сывӕллӕттӕ, сӕ зӕрдӕйы цы ис, уый дзурой, кӕд дӕм афтӕ кӕсы, ӕмӕ уый «ӕнӕзонд ныхӕстӕй» дарддӕр ницӕмӕ ӕркӕндзӕн, уӕддӕр (Иов 6:2, 3).

• Алчидӕр хъуамӕ уа йӕхи бынаты. Дӕ зӕрдӕйы рыст дын чи бамбара, ахӕм адӕймаджы ӕххуыс дӕ куы хъӕуа ӕмӕ дӕм афтӕ куы кӕса, дӕ сывӕллон дӕ бамбардзӕн, уӕддӕр сывӕллоны уӕхсчытыл стыр адӕймаджы уаргъ сӕвӕрын нӕдӕр раст уаид, нӕдӕр – пайда (1 Коринфӕгтӕм 13:11). Дӕ зӕрдӕйы сагъӕстӕ дӕ сывӕллонӕн ма кӕн кӕнӕ дзы минӕвар ма араз дӕу ӕмӕ дӕ раздӕры цардӕмбалы ’хсӕн.

• Дӕ сывӕллоны цард нырмӕ куыд цыд, дарддӕр дӕр хъуамӕ афтӕ цӕуа. Хорз уыдзӕн, кӕм цӕрут, уырдыгӕй куы никуыдӕм ацӕуиккат ӕмӕ ныронг куыд цардыстут, дарддӕр дӕр афтӕ куы цӕриккат. Фӕлӕ уымӕй ахсджиагдӕр та у, уӕ уырнындзинад куы фидар кӕниккат. Уымӕ хауынц Библи кӕсын дӕр ӕмӕ бинонты ахуыр дӕр (Дыккаг закъон 6:6–9).

Кӕд дӕ бинонты цард фехӕлд, уӕддӕр дӕ бон у дарддӕр цӕрын. Мелиссӕ йӕ лӕгимӕ фӕцард 16 азы ӕмӕ стӕй ахицӕн. Мелиссӕ зӕгъы: «Куы ахицӕн стӕм, уӕд хъуыды кодтон: „Мӕ зӕрдӕ мӕхицӕн ахӕм цард никуы загътаид“». Фӕлӕ, кӕд иунӕгӕй баззад, уӕддӕр ныр йӕ цардӕй райгонд у. Мелиссӕ ма загъта: «Мӕ раздӕры цард аивыныл куы нал архайдтон, уӕд мын бирӕ фенцондӕр».