TULONG PARAD PAMILYA
No Panon Mon Natulongan so Anak Mo Pian Ontagey so Grades To
Nalilikas mo ya ngalngali aglabay na anak mo so manaral, tan agto gagawaen iray assignment tod eskuelaan. Kanian abebbeba so grades to, tan naapektoan pati ugali to. Panon mon natulongan so anak mo pian ontagey so grades to?
No antoy nepeg mon naamtaan
Mas onloor so problema no i-pressure moy anak mo. No i-pressure moy anak mo, na-stress lapud grades to no walad eskuelaan tan anggano wala lad abung! Lapud stress et ompan nanonotan to laingen so mantila, agto ipaamta ed sika no abeba so grades to, aligen to lay pirmam ed report card to, odino agla onloob ed klase to. Onloor la laingen so problema.
Nayarin baliktad so epekto na premyo. “Pian nakombinse mi anak mi ya manaral a maong, imbaga mi ya walay premyo to no atagey so grades to,” so imbaga na tatay ya si Andrew, “pero amay premyo so sankanonot to. Kanian nen abeba so grades to, maermen ta anggapoy premyo to, aliwan lapud abeba so grades to.”
Makapuy no tetelen mo ray teacher to. Ta no tetelen mo ra, isipen na anak mo ya agto kaukolan so mansagpot pian maong so pansumpalan to. Nayarin tetelen to met so arum no walay nagawaan ton lingo tan akadepende lad arum pian nasolusyonan so problema to. No ontan, agto naaralan so magmaliw ya responsable legan ya ugaw ni, ya kaukolan pian ombaleg a makalakal.
No antoy nayarin gawaen mo
Kontrol moy liknaan mo. No makakapasnok ka, agmo ni kakatongtongen so anak mo tungkol ed grades to. “Mas marakep so pitongtong mi nen asawak ed saray anak mi no kalmado kami labat tan ipalikna min natatalosan mi ra,” so kuan na tatay ya si Brett.
Prinsipyo ed Biblia: “Nepeg ya aliston ondengel, agbengatbengat a mansalita, matantan a manpasnok.”—Santiago 1:19.
Amtaen no anton talaga so problema. Say mabetbet ya rason no akin ya abeba so grades na sakey ya estudyante et walay manbu-bully ed sikato, balon transfer na eskuelaan, aburidon maong ed exam, kulang na ugip, magulo so eskedyul to, odino agmasyadon makakapan-concentrate. Agmo sirin iisipen ya abeba so grades na anak mo lapud mangiras ya manaral.
Prinsipyo ed Biblia: “Samay mangipapatnag na aralem a pakatalos ed sakey a bengatla et ontalona.”—Proverbio 16:20.
Manggawa na paraan pian nasagyat so anak mo ya manaral. Manggawa kay eskedyul parad panaral tan panggawa toy assignment to. Dapat walay lugar ed abung yo ya ditan makapanaral ya anggapoy makadisturbo (pati TV tan cell phone). Gawaen ya antikey labat so panaon na panaral tan panggawa na assignment pian mas makapan-concentrate so anak mo. Onia so imbaga nen Hector, ya tatay ed Germany: “No walay exam, man-review kami na sandaraiset kada agew imbes ya maminpinsan ya man-review no asingsingger la.”
Prinsipyo ed Biblia: “Walay panaon na amin a bengatla.”—Eclesiastes 3:1.
Ipalinew ed sikato iray pakinabang na panaral. Mas labay na anak mo so manaral no mas natatalosan to iray pakinabang na panaaral tod eskuelaan natan. Alimbawa, lapud panaaral toy math et amta ton i-budget so iiter yon balon to kada agew.
Prinsipyo ed Biblia: “Onggamor kay karunongan, onggamor kay pakatalos. . . . Pablim a maong so karunongan.”—Proverbio 4:5, 8.
Tip: Tulongan moy anak mo ed saray assignment to, pero aliwan sika so manggawa. Inamin nen Andrew: “No walay asainmin to may anak mi, onaasa lad sikami, imbes ya sikato komoy man-isip.” Ibangat moy anak mo no panon ton nagawaan ya bukor iray assignment to.