Nen 2011, mas masaliw so bisikleta nen say kotse diad Italy. Say rason et lapud krisis ed ekonomya, mablin gasolina, tan magastos so pampaapiger na kotse. Balet no bisikleta, aliwan mabli pampaapiger tan mainomay ya usaren.

Base ed desisyon na European Court of Human Rights (ECHR), ag-inggalang na gobiernoy Armenia so human rights na 17 ya balolaki, amin da et Tasi nen Jehova, ya impriso ta agda labay ya gawaen so civilian service ya walad panangontrol na militar. Inobliga na ECHR so gobierno ya manbayar na danyos ed saramay 17, ontan met ed saray ginastos dad kaso.

Diad saray ugugaw ya abiktima lapud social networking sites, 63 porsiento so agbinilin na atateng da ed saray posiblin peligro na pangusar ed saratan a site. Diad 599 ya kason inimbestigaan, 74 porsiento ed saray suspek so inmamin ya uusaren da iratan ya site pian mi-sex ed saray menor-de-edad.

Pian nasolusyonan so graben trapik, lilimitaan lad angkakabaleg iran syudad so bilang na makaalay permit ya nawalaan tan manparehistro na balon luluganan. Alimbawa, diad Beijing et ag-onlampas ed 240,000 so makapanparehistro kada taon. Nen Agosto 2012, manga 1,050,000 so akilad raffle, balet 19,926 labat so naikdan na registration certificate. Labay ton ibaga, 1 labat ed kada 53 ya aplikante so naikdan.