1. Antoy alikna nen David ed si Jehova, tan antoy ginawa to lapud satan?

INSULAT nen Arin David: “Si Jehova et agnaparaan tan sankamakanepegan na dayew.” (Sal. 145:3) Inaro toy Jehova, tan satan ya panangaro so amakiwas ed sikaton idayew so Dios “diad pegley na kongregasyon.” (Sal. 22:22; 40:5) Seguradon inarom met si Jehova tan mipakna ka ed sayan imbaga nen David: “O Jehova a Dios nen Israel ya ama mi, narayew ka komon ya anggad angga.”​—1 Awa. 29:10-13.

2. (a) Panon tayon nidayew si Jehova? (b) Antoy mairap ya gawaen na arum, tan antoy repasoen tayo nin unona?

² Natan, say sakey a paraan pian nidayew tayoy Jehova et diad panamegley na pankomento ed saray aral. Balet wala ray agagi ya mairap day mankomento. Labay day mankomento balet natatakot ira. Panon dan nalabanan so takot da? Tan anto ray makatulong ed sikatayon amin pian makapangiter tayoy makapaseseg ya komento? Antis tayon ebatan iratan ya tepet, repasoen tayo nin unona so apatiran importantin rason no akin ya mankokomento tayo ed saray aral.

3-5. (a) Base ed Hebreo 13:15, akin et mankokomento tayo ed saray aral? (b) Kasin kaukolan ya parepareho so klase na komento tayo? Ipaliwawa.

³ Amin tayo et inikdan nen Jehova na pribilehyo ya mangidayew ed sikato. (Sal. 119:108) Saray komento tayo ed saray aral et kabiangan na “bagat a panangidayew” tayo, tan satan ya bagat tayo et agnayarin iyapay na arum parad sikatayo. (Basaen so Hebreo 13:15.) Kasin iilaloan nen Jehova ya parepareho so klase na bagat odino komento tayo? Andi!

 ⁴ Amta nen Jehova ya nanduruma so abilidad tan situasyon tayo, tan aapresyaen ton maong iray bagat ya sarag tayon iyapay ed sikato. Isipen pa ray bagat ya aawaten nen Jehova ed saray Israelita. Saray arum ya Israelita et sarag day mangiyapay na kordero odino kanding. Balet saray mairap-bilay et nayarin mangiyapay na “duaran palekpek odino duaran sibong a malapati.” Tan no agsarag na sakey so mangiyapay na anggan dinan ed saratan, aawaten nen Jehova so “kakaplo na sakey ya efa na pinon arina.” (Lev. 5:7, 11) Mas mamura so arina, balet siansia nin aapresyaen nen Jehova itan ya bagat, basta “pinon arina.”

⁵ Ontan nin siansiay nalilikna natan na makonsideran Dios tayo. No mankokomento tayo, agto iilaloan ya amin tayo et maong a mansalita ya singa si Apolos odino maong ya mangombinse ya singa si Pablo. (Gawa 18:24; 26:28) Say labay nen Jehova et pansagpotan tayon iter so sankaabigan ya komento tayo—samay nayarian tayo. Isipen imay balon bii ya angipelag na duaran angkelag ya sinsilyo. Sikatoy papablien nen Jehova lapud inter toy amin ya nayarian to.​—Luc. 21:1-4.

6. (a) Base ed Hebreo 10:24, 25, antoy nayarin epekto ed sikatayo na saray komenton narerengel tayo diad aral? (b) Panon mon nipanengneng ya aapresyaen mo ray komento ya makapaseseg ed sika?

⁶ Napapaseseg tayoy sakey tan sakey panamegley na saray komento tayo. (Basaen so Hebreo 10:24, 25.) Labalabay tayon amin so makarengel na nanduruman klase na komento diad saray aral tayo. Naliliketan tayo ed simpli balet impapuson komento na melag ya ugaw. Napapaseseg tayo ed komento na sakey ya malikeliket ton inanabang so balon katuaan ya naaralan to. Tan pandinayewan tayo iramay ‘manpapakpel’ ya mankomento anggano mabaing ira odino aaralen da ni labat so lenguahe tayo. (1 Tes. 2:2) Panon tayon nipanengneng ya aapresyaen tayoy pansasagpot da? Sarag tayo ran pisalamatan lapud makapaseseg ya komento ra kayari na aral. Say sakey nin paraan et diad pankomento tayon mismo. Diad ontan, aliwan sikatayo labat so napapaseseg ed saray aral tayo, noagta napapaseseg tayo met so arum.​—Roma 1:11, 12.

7. Panon itayon nagugunggonaan no mankokomento tayo?

 ⁷ Nagugunggonaan tayon mismo no mankokomento tayo. (Isa. 48:17) Panon? Unona, no plano tayoy mankomento ed aral, mas lalo tayon napakiwas ya manparaan a maong. No manparaan tayon maong, mas onaralem so pakatalos tayo ed Salita na Dios. Tan no mas aralem so pakatalos tayo, mas niyaplika tayo ray nanaaralan tayo. Komadua, mas naliketan tayo ed saray aral lapud mibibiang tayo. Komatlo, lapud kaukolay sagpot ed pankomento, mabetbet ya natandaan tayo ray punto ya inkomento tayo anggano abayag lan asumpal so aral.

8, 9. (a) Parad sika, antoy nalilikna nen Jehova ed saray komento tayo, a singa napatnagan ed ibabaga na Malaquias 3:16? (b) Anto nin siansiay tatakotan na arum?

⁸ Napapaliket tayoy Jehova no ibabalikas tayoy pananisia tayo. Makaseguro tayon dedengelen itayo nen Jehova no mankokomento tayo ed saray aral tan aapresyaen ton maong so pansasagpot tayo. (Basaen so Malaquias 3:16.) Ipapanengneng toy apresasyon to diad pamebendisyon tod sikatayo sano gagawaen tayoy anggaay nayarian tayon sikatoy paliketen.​—Mal. 3:10.

⁹ Malinew sirin ya wala ray maabig a rason no akin ya mankokomento tayo ed saray aral. Balet siansia nin natatakot so arum ya iyatagey so lima ra. No ontan so naliliknam, agka nadidismaya. Aralen tayo so pigaran prinsipyo ed Biblia, saray alimbawa, tan praktikal iran suhestion ya ontulong ed sikatayon amin pian mas pansagpotan tayoy mankomento ed saray aral.

10. (a) Akin ya maslak ed sikatayo et natatakot a mankomento? (b) No natatakot kan mankomento, anton maong a kualidad so mapatnag a walad sika?

¹⁰ Kasin nanenerbiyos ka kada no iisipen mon iyatagey moy limam pian mankomento? No ontan so naliliknam, agmo bukbukor. Diad tua, maslak ed sikatayo et makakaliknay nerbiyos no mankokomento. Pian nalabanan moy takot mon makomento, kaukolan mon talosan  no akin ya ontan so naliliknam. Kasin natatakot ka ya nalingwanan moy ibagam odino ompan nalingo ka? Kasin manaalangan ka lapud iisipen mo ya say komentom et aliwan onman karakep ed komento na arum? Diad tua, say takot ya naliliknam et pakapatnagan ya mapaabeba ka tan ipapasen mon mas atagey so arum nen say sika. Labalabay nen Jehova itan ya kualidad. (Sal. 138:6; Fil. 2:3) Balet labay met nen Jehova ya sikatoy idayew mo tan pasesegen mo ray agagi ed saray aral. (1 Tes. 5:11) Inar-aro to ka tan ikdan to kay pakpel ya kaukolan mo.

11. Anto ran panonot ed Biblia so ontulong ed sikatayo?

¹¹ Imanoen so pigaran panonot ed Biblia. Ibabaga na Biblia ya amin tayo et nalilingo ed panagsalita tayo. (Sant. 3:2) Amta nen Jehova ya aliwa tayon perpekto, tan amta met itan na saray agagi tayo. (Sal. 103:12-14) Sikaray espiritual a pamilya tayo, tan inar-aro da tayo. (Mar. 10:29, 30; Juan 13:35) Natatalosan da ya no maminsan et agtayo eksakton nibaga so labay tayon ikomento.

12-13. Antoy naaralan tayo ed alimbawa nen Nehemias tan Jonas?

¹² Isipen pay pigaran alimbawa ed Biblia ya ontulong ed sikan nalabanan so takot mo. Nonot moy Nehemias. Sikatoy nanlingkor ed palasyo na sakey a makapanyarin ari. Maer-ermen si Nehemias lapud abalitaan to ya aderal iray padir tan puerta na Jerusalem. (Neh. 1:1-4) Imadyin mo pay pannerbiyos to nen tinepetan na ari no akin ya maer-ermen! Nampikasin tampol si Nehemias insan inmebat. Bilang resulta, baleg so intulong na ari ed saray totoo na Dios. (Neh. 2:1-8) Isipen met si Jonas. Nen ingganggan nen Jehova ya pasakbayan to ray taga Ninive, tinmakot ya maong si Jonas kanian amaarap ed sananey ya direksion. (Jon. 1:1-3) Balet diad tulong nen Jehova, sinumpal nen Jonas so asainmin to. Tan lapud saray imbaga to, maabig so nansumpalan na saray taga Ninive. (Jon. 3:5-10) Naaralan tayod si Nehemias ya importante so pampikasi antis ya onebat. Tan naaralan tayod si Jonas ya sarag itayon tulongan nen Jehova ya manlingkor ed sikato anggano natatakot tayon maong. Isipen pa, wala tay kongregasyon ya makapataktakot ya singa saray taga Ninive?

¹³ Anto sirin iray praktikal ya suhestion ya ontulong pian makapangiter kay makapaseseg iran komento diad saray aral? Konsideraen tayoy pigara.

14. Akin ya nepeg itayon manparaan ya maong parad saray aral tayo, tan kapigan tayo nayarin gawaen itan?

¹⁴ Manparaan parad kada aral. No masakbay ka lan manplano tan manparaan kan maong, mas walay kompiyansam ya mankomento. (Pro. 21:5) Siempre, aliwan pareparehoy eskedyul tayo. Si Eloise, ya abalon sister a manedad na masulok ya 80, et ipaparaan to la so Panag-bantayan kagapo ni labat na simba. Imbaga to, “Mas nagunggonaan ak ed aral no masakbay ak lan manparaan.” Si Joy, ya full-time  a mantratrabaho, et eskedyul toy manaral na Panag-bantayan no Sabado. “Mas mainomay kon natandaan no aganok ni itan ya inaral,” so kuan to. Si Ike, a busy ya elder tan payunir, et imbaga to, “Mas labay koy manaral na sandaraiset ed interon simba nen say maminpinsan ak ya manaral.”

15. Panon kan makapanparaan ya maong parad aral?

¹⁵ Panon kan makapanparaan ya maong parad saray aral? Antis kan manaral, ipikasim ed si Jehova ya ikdan to kay masanton espiritu to. (Luc. 11:13; 1 Juan 5:14) Insan mangigana kay pigaran minuto pian nengnengen so titulo, saray subtitulo, saray litrato, tan saray kahon. Legan mon aaralen so kada parapo, no nayari et basam ya amin iray nisitan teksto. Dalepdepen so impormasyon, ya manpokus ka ed saray punto ya labay mon komentoan. No manparaan kan maong, mas nagunggonaan ka tan nayarin mas mainomay moy mankomento.​—2 Cor. 9:6.

16. Anto ran uusaren ed panagaral so walad sika, tan panon mon uusaren iratan?

¹⁶ No posible, usaren so intarya na organisasyon tayo ya app, website, tan computer program ya walad lenguahe ya antam. Si Jehova, panamegley na organisasyon to, et angitarya na saray elektronikon uusaren ya ontulong ed sikatayon manparaan parad saray aral. Diad JW Library^® app et na-download tayo ed gadyet tayo iray aaralen ya publikasyon. Kanian sarag tayon aralen, odino anggan panon et basaen o dengelen so publikasyon, diad anggan anton oras tan anggan iner. Uusaren iya na arum pian makapanaral ira no oras na panangugto diad trabaho o diad eskuelaan odino legan iran manbiabiahe. Sarag tayon usaren so Watchtower Library tan say Watchtower ONLINE YA LIBRARYA^™ pian mas mainomay tayon i-research iray punto ya labay tayo nin aralen ya maong.

17. (a) Akin et maabig no mangiparaan ka na pigaran komento? (b) Antoy naaralan mo ed video ya Magmaliw ya Kaaro nen Jehova​—Iparaan Moy Komentom?

¹⁷ No posible, mangiparaan na pigaran komento parad kada aral. Akin? Lapud ompan agka lanang ya natawag no iyatagey moy limam. Ompan wala ray kabansag mon mangiyatagey na lima, tan sakey ed sikara so nayarin turoen na manangikondukta. Pian nasumpal so aral ed suston oras, wala ray parapo ya nayarin limitaan na manangikondukta so turoen ton mankomento. Kanian agka nasasakitan o nadidismaya no agka naturon tampol. No mangiparaan ka na pigaran komento, mas dakel so pankanawnawam ya onebat. Sakey ed saray sarag mon iparaan ya komento et say pambasa na teksto. Balet no posible, mangiparaan ka met na komento ya ibagam ed sarilim ya salita. *

18. Akin et maabig no gawaen mon antikey so komentom?

 ¹⁸ Gawaen ya antikey so komentom. Mabetbet ya mas makapaseseg so komento no antikey tan simpli. Kanian gawam ya antikey iray ebat mo. No nayari et anggad 30 segundo labat. (Pro. 10:19; 15:23) No mankokomento kad saray aral diad loob na dakel lan taon, importante ya ipanengneng moy maong ya alimbawa ed pangiter na antikey iran komento. No komplikado tan pigaran minuto iray komentom, ompan natatakot lay arum ya onebat ta isipen dan agda naparaan so abilidad mo. Sakey ni, no antikey so komentom, mas dakel so makaebat ed aral. Mangiter na simpli tan direktan ebat lalo la no sika so unonan naturo. Agmo kokobrian so amin a punto ed parapo. No nikomento la so manunan ideya ed parapo, sarag mo lan ikomento so arum nin punto.​—Nengnengen so kahon ya “ Antoy Sarag Kon Ikomento?”

19. Panon kan natulongan na manangikondukta, balet antoy nepeg mon gawaen?

¹⁹ Ipaamtam ed manangikondukta ya labay mon komentoan so sakey a parapo. No planom iyan gawaen, asinggeran mo la so manangikondukta antis ni na aral. No nasabi la may parapo ya komentoan mo, iyatagey mon tampol so limam. Iyatagey mon maong pian nanengneng na manangikondukta.

20. Akin ya say aral ed kongregasyon et singa panangan ya pandurungoan na sankakaaro?

²⁰ Ipasen mon saray aral ed kongregasyon et singa panangan ya pandurungoan na sankakaaro. No bilang ta wala ray agagi ed kongregasyon ya inimbitaan da kan man-picnic tan kinerew dad sika ya manparaan kay simplin kakanen, antoy gawaen mo? Ompan medyo naaburido ka, balet seguradon gawaen moy anggaay nayarian mo ya mangawit na kakanen ya nagustoan na amin. Si Jehova so angimbita ed sikatayo ed saray aral, tan intarya to ditan so dakdakel ya espiritual a naakan parad sikatayo. (Sal. 23:5; Mat. 24:45) Sikatoy naliliketan no mangawit tayoy simplin regalo, say sankaabigan ya niiter tayo. Kanian manparaan kan maong tan mankomento ka labat. Diad ontan, agka labat mangan ed saray naakan ya intarya nen Jehova noagta wala met so awit mon regalo ya inabang mo ed kongregasyon.