Panamegley na duaran panagkotkot, ipoposisyon na saray team na Site Works tan Mechanical so baleg ya kabiangan na tubo na danum. Nanengneng so Office Building diad beneg.

Ipepeket na saray contractor iray panel diad paway ya dingding. Say kolor tan desinyo na saray panel et pinili pian ombagay so bilding ed kaliberliber to.

Kayarin imbuhos so semento ed flooring, angusar na power float iray contractor pian pinoen, pasilengen, tan patibayen itan.

Say itsura manlapud tagey diad bandad amianen-bukig. Diad bandad leksab na litrato, nanengneng so pasen ya nilinisan na team na Site Works tan ipaparaan da so flooring na magmaliw ya car park parad main reception. Say steel frame na reception ya mangikokonekta ed duaran office building ya nanengneng ed kawigi et asumpal la. Say north tan south production building et nanengneng ed background.

Diad asingger ed Residence A, iinspeksionen na surveyor tan irerekord to so resulta na impankimey ed landscape. Lapud kagapo ni labat na proyekto et ginawa lay landscape, iilaloan ya baleg tan matibay la iray kiew tan tanaman no nipaalagey la iray bilding.

Pipintaan na resin paint na saray managpinta so flooring na parking area. Sakey ed sikara so akasulong na pangisuksokan na sapatos pian ag-ombakat ed apintaan lan parte. Say flooring ya apintaan na resin paint et matibay tan ag-ompeket so grasa​—dugaruga itan parad pasen ya pangi-parkingan na saray luluganan.

Susukaten insan puputoten na saray tubero iray kadena ya pangisabitan na saray radiant panels parad pampapetang ed maawang ya panagkimeyan.

Saray mankikimey et pipintaan da so loob na Office Building. Walay HVAC unit ed tagey na kada opisina ya binalkot ed andeket ya plastik pian naprotektaan itan.

Saray mankikimey et mangipepeket na steel frame ed tagey na magmaliw ya reception desk.

Saray contractor et manguusar na spider crane ya walay vacuum-lifter to pian ipeket iray angkabaleg ya salming ed paway na dining room tan auditorium.

Saray kabiangan na team na Electrical Data et kakargaan day socket iray sampot na saray data cable. Manga 50 kilometro na kable so ipadalan da ed silong na akaatagey ya flooring na amin ya apatiran grado na Office Building. Say akaatagey ya flooring et denisinyo pian diad arapen et mas mainomay ya i-reconfigure iray opisina tan agtanton naisturbo so kimey ditan.

Manre-rehearse so Emergency Response Team no panon dan tulongan so sakey ya mankikimey no bilang ta napelag ed scaffolding tan nabitin ed safety harness to.

Ipaparaan na sakey ya kaibad team na Site Works so dugan kaatagey na dadalanan na too antis ya ilapat iray bricks. Diad abay na dalan et walay compact excavator ya mankokotkot pian niparaan so dalin ya pantaneman na saray akahileran native ya kiew a hornbeam.

Say itsura manlapud tagey. Kinargaan na saray solar panel so atep na duaran production building ontan met ed Office Building, pian pagmaliwen ya koryenti so sinag na agew.

Ilalapat na sakey ya kaiba ed team na Finishes so limestone ya floor tiles diad lobby ed third-floor. Say maimpis ya orange ya apis diad dalem na tiles et ibiig toy tiles ed semento ya walad leksab to tan magmaliw ya proteksion itan pian agnabetag so tiles no onggalaw so semento na flooring.

Alaen na saray narasan ya komikimey so pangugtoan da insan ira mangan ed temporaryon dining room. Sayan dining room et uusaren ed taloran mantutumbokan ya schedule pian naserbian so ngalngali sanlibo ya mamangan kada agew.

Iyaalis na saray dump truck iray bengatlan walad beneg na office complex. Diad bandad kawanan, nanengneng iray louver ya walad saray poste pian nasiroman ed agew so dining room tan auditorium no panaon na winter.

Ilalapat na team na Finishes iray carpet tiles, tan ontutulong iray komikimey ya kabiangan na Day Volunteer Program. Panamegley na sayan uksoyan, saray kongregasyon na Saray Tasi nen Jehova ed nanduruman parte na Britain tan Ireland et naimbitaan ya mangipawit na saray volunteer ya ontulong na sakey agew. Kayari na Pebrero, masulok ya 5,500 so akapibiang ed panagpaalagey panamegley na sayan uksoyan.

Saray contractor et nanggawa na atagey ya divider diad pegley na bilding pian naketeg-keteg itan. Saray abeban orange ya poste ed flooring et palatandaan na anggaan na pasen ya nayarin pankimeyan na saray scissor lift pian anggapoy nadisgrasya.

Papanisan ya tampol na saray komikimey so pasen ya pankikimeyan da legan ya ipepeket so akaatagey ya flooring diad reception area.