1 Korintionan 13:1-13
13 Si mi ta papia idioma di hende i di angel, pero mi no tin amor, mi ta manera un gòn ku ta resoná òf un simbal* ku ta saka zonido skèrpi.
2 I si mi tin e don di profetisá i sa di tur sekreto sagrado i di tur konosementu, i si mi tin asina tantu fe ku mi por kita seru for di nan lugá, pero mi no tin amor, mi no ta nada.
3 I si mi duna tur mi pertenensianan pa alimentá otro hende, i si mi entregá mi kurpa komo sakrifisio, pa mi por broma, pero mi no tin amor, mi no ta gana nada ku esei.
4 Amor tin pasenshi i ta bondadoso. Amor no ta yalurs,* e no ta broma, e no ta halsa su mes,
5 e no ta komport’é indesentemente, e no ta buska su mes interes, e no ta rabia lihé. E no ta keda kòrda e malu ku hende a hasié.
6 E no ta alegrá ku inhustisia, ma ta alegrá ku loke ta bèrdat.
7 E ta wanta tur kos, kere tur kos, spera tur kos, soportá tur kos.
8 Amor no ta kaba nunka.* Pero si tin don di profetisá, lo e yega na su fin; si tin don di papia otro idioma, lo e stòp di eksistí; si tin don di konosementu, lo e yega na su fin.
9 Pasobra nos tin konosementu parsial i nos ta profetisá parsialmente;
10 pero ora loke ta kompleto yega, loke ta parsial lo yega na su fin.
11 Tempu mi tabata mucha, mi tabata papia manera mucha, pensa manera mucha, rasoná manera mucha; pero awor ku mi a bira hende grandi, mi a pone kos di mucha un banda.
12 Pasobra awor nos ta mira un forma vago komo si fuera ta den un spil di metal nos ta wak, pero e tempu ei lo ta kara kara. Aktualmente mi tin konosementu parsial, pero e tempu ei lo mi tin konosementu kompleto meskos ku Dios konosé mi kompletamente.
13 Sinembargo, awor lo keda fe, speransa, amor, e tresnan akí; ma esun di mas grandi ta amor.
