Den nos organisashon no tin klero ku ta kobra salario. Mas bien, meskos ku tempu e kongregashon kristian a kuminsá, awe tambe superintendentenan kualifiká ta ser nombrá “pa pastoriá e kongregashon di Dios.” (Echonan 20:28) E ansianonan akí ta ruman hòmbernan spiritualmente maduro ku ta dirigí i pastoriá e kongregashon “no obligá, sino di buena gana; no pa amor pa ganashi desonesto, sino ku entusiasmo.” (1 Pedro 5:1-3) Ki sirbishi nan ta rindi pa nos bienestar?

Nan ta kuida nos i ta protehá nos. Ansianonan ta guia e kongregashon i ta yuda proteh’é den sentido spiritual. Nan ta konsiente ku ta Dios a konfia nan ku e tarea importante akí. P’esei, nan no ta manda riba e pueblo di Dios; mas bien, nan ta kontribuí na nos bienestar i goso. (2 Korintionan 1:24) Meskos ku un wardadó di karné ta kuida kada un di su karnénan, asina tambe ansianonan ta purba di konosé i mustra interes den kada un di e miembronan di e kongregashon.—Proverbionan 27:23.

Nan ta siña nos kon pa hasi e boluntat di Dios. Tur siman e ansianonan ta dirigí e reunionnan di kongregashon pa asina fortalesé nos fe. (Echonan 15:32) Ademas, e rumannan dediká akí ta dirigí e aktividat di prediká; nan ta traha ku nos i ta entrená nos den tur aspekto di sirbishi.

Nan ta duna nos animashon personal. Pa e ansianonan di nos kongregashon por duna kada un di nos e yudansa spiritual i e konsuelo ku nos tin mester for di e Palabra di Dios, nan ta bishitá nos na nos kas òf ta papia ku nos na Salòn di Reino.—Santiago 5:14, 15.

Aparte di nan trabou den e kongregashon, mayoria di ansiano tin tambe nan trabou i responsabilidatnan di famia ku ta eksigí tempu i atenshon di nan. E ruman hòmbernan diligente akí meresé nos rèspèt.—1 Tesalonisensenan 5:12, 13.

• Kiko ta tarea di un ansiano di kongregashon?

• Kon ansianonan ta mustra interes personal den nos?