1. Kiko e paradeis spiritual ta, i kiko nos mester ta determiná pa hasi?

 RIBA mundu awe tin un paradeis spiritual a kaminda miónes di hende ta disfrutá di berdadero pas. Nan ta determiná pa nunka bandoná e paradeis ei, i nan ke yuda mas tantu hende posibel pa tambe forma parti di dje.

2. Dikon ta asina inkreibel ku un paradeis spiritual ta eksistí?

² Pa inkreibel ku por parse, Yehova a krea un ambiente kalmu i yen di pas meimei di Satanas su mundu malbado, peligroso i yen di odio. (1 Huan 5:19; Rev. 12:12) Yehova ta mira kuantu daño e mundu akí ta hasi hende, i debí ku e stima nos, e ta hasi sigur ku su sirbidónan sí ta sinti nan safe i por sigui sirbié ku goso. Beibel ta deskribí e paradeis spiritual komo un “refugio” i tambe komo un “hòfi bon muhá.” (Isa. 4:6; 58:11) Ku Yehova su bendishon, esnan den e paradeis ei por sinti nan kontentu i safe durante e último dianan akí.​—Isa. 54:14; 2 Tim. 3:1.

3. Kon e profesia na Isaías 65 a kumpli pa promé biaha?

³ Yehova a inspirá Profeta Isaías pa deskribí kon bida di hende den e paradeis spiritual lo ta. Bo por haña e deskripshon ei na Isaías 65. E promé biaha ku e profesia ei a kumpli, tabata na 537 P.K. E tempu ei, e hudiunan ku tabata prezu na Babilonia por a bolbe nan pais bèk. Ku Yehova su bendishon i yudansa nan a rekonstruí e stat di Herúsalèm hasié bunita atrobe, i nan a rekonstruí e tèmpel ku tabata e lugá prinsipal kaminda nan tabata adorá Yehova.​—Isa. 51:11; Zak. 8:3.

4. Kon e profesia na Isaías 65 a kumpli pa di dos biaha?

 ⁴ E di dos biaha ku e profesia di Isaías a kumpli tabata den tempu moderno. Na 1919, Yehova a liberá su sirbidónan for di Babilonia e Grandi. For di e momento ei, e paradeis spiritual a kuminsá plama i hopi kongregashon a ser formá rònt mundu. Hende ku ántes tabata violento i inmoral awor a “bisti e personalidat nobo ku a ser kreá segun e boluntat di Dios.” (Efe. 4:24) Pero klaru, tin kosnan ku Isaías a papia over di dje ku nos mester warda te den mundu nobo pa nan kumpli literalmente. Sinembargo, tin kosnan ku nos por disfrutá di dje asta for di awor. Ban wak kon nos ta sinti ora nos ta den e paradeis spiritual anto dikon nunka nos no mester bandon’é.

KON HENDE DEN E PARADEIS SPIRITUAL TA?

5. Segun Isaías 65:13, kiko nos lo haña den e paradeis spiritual?

⁵ Refreská i bon kuidá. Den e profesia di Isaías nos ta mira un diferensia hopi grandi entre bida di un persona ku ta den e paradeis spiritual i un ku ta pafó. (Lesa Isaías 65:13.) Yehova ta pèrkurá tur loke su adoradónan tin mester pa nan por tin un amistat será kuné. Nos tin su spiritu santu, su Palabra i asina tantu kuminda spiritual te ku nos por “kome, . . . bebe, . . . [i keda] kontentu.” (Kompará ku Revelashon 22:17.) Pero di otro banda, esnan ku ta pafó di e paradeis spiritual ta “pasa hamber . . . , lo tin set . . . , [i] lo pasa bèrgwensa.” Pues, den sentido spiritual nan no ta bon kuidá.​—Ámos 8:11.

6. Kiko Yoèl 2:21-24 ta bisa tokante kuminda spiritual ku Yehova ta duna nos, i kon nan ta benefisiá nos?

⁶ Yoèl a usa den su profesia produktonan básiko manera grano, biña i zeta di oleifi pa ilustrá kon Yehova na un manera generoso ta duna Su pueblo tur loke nan mester, inkluso kuminda spiritual. (Yoèl 2:21-24) Por ehèmpel, e ta hasi esei mediante su Beibel, publikashonnan, nos website i tambe nos reunion-, asamblea- i kongresonan. Nos por disfrutá di tur e kosnan akí tur dia, i komo resultado, nos ta sinti nos mas refreská i bon kuidá.

7. Dikon nos “kurason ta kontentu”? (Isaías 65:14)

⁷ Felis i satisfecho. Dios su pueblo por “grita di alegria pasobra nan kurason” ta yen di apresio pa Yehova. (Lesa Isaías 65:14.) Nos “kurason ta kontentu” debí na e bèrdat i promesanan ku tin den Beibel ku ta animá nos i konsolá nos. Ademas, nos tin e reskate ku ta duna nos un speransa sólido. Ora nos ta papia ku nos rumannan tokante e kosnan akí, esei ta hasi nos felis.​—Sal. 34:8; 133:1-3.

8. Kiko ta dos kos importante ku tin den e paradeis spiritual?

⁸ E dos kosnan importante ku tin den e paradeis spiritual ta amor i union entre Dios su pueblo. ‘E laso di union’ akí ta djis un ñapa chikitu di e amor i union ku nos lo eksperensiá den e mundu nobo. (Kol. 3:14) Un ruman muhé ta konta loke el a nota ora el a topa Yehova su pueblo pa promé biaha. El a bisa: “Mi no tabata sa ki ta felisidat, ni den mi mes famia. E promé biaha ku m’a mira hende trata otro ku amor tabata meimei  di e Testigunan di Yehova.” Si un hende ke ta realmente felis i satisfecho, e mester drenta e paradeis spiritual. Sin importá kiko e mundu akí ta pensa di Yehova, nos mester kòrda ku nos tin un bon nòmber, òf reputashon, serka Yehova i su famia universal.​—Isa. 65:15.

9. Kiko lo pasa ku e kosnan ku ta kousa nos doló i sufrimentu? (Isaías 65:16, 17)

⁹ Rilèks i trankil. Isaías 65:14 ta bisa ku esnan ku ta skohe pa keda pafó di e paradeis spiritual, “lo sklama di doló di kurason, i [nan] lo grita yora pasobra [nan] ta tur kibrá.” Pero Dios su pueblo tambe ta pasa den doló i tambe ta sufri. Kiko lo pasa ku tur e kosnan ei? Ku tempu, e kosnan ei “lo ser lubidá [i] nan lo ser kitá for di [Dios su] bista.” (Lesa Isaías 65:16, 17.) Yehova lo kita nos problemanan, i ku tempu nos lo no ni kòrda kon e kosnan ei a laga nos sinti.

10. Dikon ta un bendishon pa ta huntu ku bo rumannan? (Wak e plachi.)

¹⁰ Asta for di awor nos por sinti nos trankil na nos reunionnan. Ora nos ta einan, nos por pone tur preokupashon di e mundu akí un banda. Anto nos por yuda nos rumannan sinti nan trankil ora nos demostrá kualidatnan manera amor, goso, pas, bondat i suavedat ku ta algun di e kualidatnan di Dios su spiritu santu. (Gal. 5:22, 23) Esta un bendishon pa por forma parti di Dios su organisashon! Si nos no bandoná e paradeis spiritual, nos lo por mira kon Dios lo kumpli ku su promesa di krea “shelu nobo i un tera nobo.”

11. Kon nos mester sinti debí ku nos ta biba den e paradeis spiritual? (Isaías 65:18, 19)

¹¹ Gradisidu i yen di entusiasmo. Djei Isaías a splika ki motibu nos tin pa ta “kontentu i alegrá” den e paradeis spiritual. Esei ta pasó ta Yehova a kre’é. (Lesa Isaías 65:18, 19.) Pues, ta masha lógiko ku Yehova ta usa nos pa yuda hende sali for di e mundu akí su organisashonnan, ku no ta siña nan e bèrdat tokante Dios, anto yuda nan forma parti di nos bunita paradeis spiritual. Ki kontentu nos ta di ta den e bèrdat! P’esei nos ke konta otro hende tokante e bendishonnan ei.​—Yer. 31:12.

12. Kon e promesanan na Isaías 65:20-24 ta laga bo sinti, i dikon?

¹² Nos ta masha gradisidu i entusiasmá  pa e speransa ku nos tin. Djis imaginá tur e kosnan ku nos lo mira i hasi den e mundu nobo! Por ehèmpel, Beibel ta primintí ku “nunka mas lo no tin un bebi . . . ku ta biba djis un par di dia so, ni lo no tin un hende bieu ku no ta biba tur su dianan.” Nos lo “traha kas i biba den nan, i . . . planta wendrùif i kome nan fruta.” Nos “lo no traha duru pòrnada,” pasobra “Yehova [lo] bendishoná” nos. Yehova a primintí ku nos lo no djis biba pa biba. Mas bien, nos lo tin un bida stabil, yen di satisfakshon. “Asta promé ku [nos] yama,” Yehova lo sa kaba kiko kada un di nos mester i lo e “satisfasé deseo di tur ser bibu.”​—Isa. 65:20-24; Sal. 145:16.

13. Kon Isaías 65:25 ta deskribí e kambionan ku hende ta hasi ora nan kuminsá sirbi Yehova?

¹³ Safe i na pas. Ku yudansa di Yehova su spiritu santu, hopi hende ku ántes tabata desonesto, violento i agresivo, a hasi kambio den nan bida. (Lesa Isaías 65:25.) Nan a hasi hopi esfuerso pa deshasí di nan kualidatnan negativo. (Rom. 12:2; Efe. 4:22-24) Klaru ku nos ta keda imperfekto i por faya. Sinembargo, Yehova a uni “tur sorto di hende,” kendenan ta stim’é i ta stima otro. Komo resultado, tin berdadero pas i union! (Tito 2:11) Esei ta un milager ku solamente nos Dios todopoderoso por hasi!

14. Kon Isaías 65:25 a kumpli den bida di un ruman?

¹⁴ Di bèrdat hende por kambia nan personalidat? Wèl, ban wak e eksperensia di un yònkuman ku tabata hiba un bida violento i inmoral. Ya pa ora e tabatin 20 aña, el a bai prizòn vários biaha pa hòrtamentu i otro krímen serio. Semper e tabata kla pa bringa ku ken ku e topa den su kaminda. Ora el a skucha e bèrdatnan di Beibel pa promé biaha i a kuminsá bai e reunionnan di Testigunan di Yehova, e tabata konvensí ku el a haña un meta den bida​—adorá Yehova den e paradeis spiritual. Despues ku el a batisá, kada bes e tabata pensa kon Isaías 65:25 a kumpli den su bida. Ántes e tabata violento manera un leon, pero awor el a bira un persona pasífiko, meskos ku lamchi.

15. Dikon nos ke yuda otro hende djòin nos den e paradeis spiritual, i kon nos por hasi esei?

¹⁵ Isaías 65:13 ta kuminsá ku e palabranan akí: “Señor Soberano Yehova ta bisa.” Anto versíkulo 25 ta kaba bisando: “Esei ta loke Yehova ta bisa.” Yehova su palabra semper ta kumpli. (Isa. 55:10, 11) E paradeis spiritual ya kaba ta eksistí. Anto Yehova a krea un famia di adoradó ku ta realmente úniko. Entre e famia ei, nos por sinti nos sigur i na pas apesar ku nos ta biba den un mundu violento. (Sal. 72:7) P’esei, nos ke yuda mas tantu hende posibel pa djòin nos famia. Nos por hasi esei dor di focus riba e trabou di hasi disipel.​—Mat. 28:19, 20.

YUDA OTRO HENDE DRENTA E PARADEIS SPIRITUAL

16. Kiko por yuda otro hende forma parti di e paradeis spiritual?

¹⁶ Kada un di nos por hasi algu masha importante pa yuda otro hende haña gana di drenta e paradeis spiritual: imitá Yehova. E no ta fòrsa niun hende pa forma parti di su organisashon. Mas bien, bondadosamente e ta hala nan  serka dje. (Huan 6:44; Yer. 31:3) Ora hende sinsero haña sa tokante Yehova su dushi kualidatnan i su bunita personalidat, outomátikamente nan lo sinti nan atraí na dje. Pero awor, kon nos bunita kualidatnan i bon kondukta por yuda otro hende drenta e paradeis spiritual?

17. Kon nos por atraé otro hende na e paradeis spiritual?

¹⁷ Un manera ku nos por atraé otro hende na e paradeis spiritual ta ora nos ta trata nos rumannan ku amor i bondat. E promé biaha ku un hende bini Salòn di Reino, nos ke p’e sinti meskos ku esnan no kreyente ku probablemente a bai e reunionnan na Korinto pa promé biaha. Nan a bisa: “Di bèrdat Dios ta meimei di boso.” (1 Kor. 14:24, 25; Zak. 8:23) P’esei, laga nos sigui e konseho den Beibel pa ta “na pas ku otro.”​—1 Tes. 5:13.

18. Kiko por atraé hende na nos organisashon?

¹⁸ Tambe semper nos mester hasi esfuerso pa mira nos rumannan manera Yehova ta mira nan. P’esei nos ta focus riba nan bon kualidatnan i no riba nan imperfekshonnan, ku den futuro lo disparsé. Si semper nos ta “bondadoso ku otro, mustra tierno kompashon [i ta] pordoná otro libremente,” lo no tin niun desakuerdo ku nos no por resolvé ku amor. (Efe. 4:32) Anto e ora ei, hende ku ke wòrdu tratá ku amor, lo haña gana di drenta e paradeis spiritual. b

 KEDA DEN E PARADEIS SPIRITUAL

19. (a) Kiko algun hende a bisa despues ku nan a bolbe na e paradeis spiritual? (Wak e kuadro “ Nan A Bai, Pero Nan A Bolbe.”) (b) Kiko mester ta nos determinashon? (Wak e plachi.)

¹⁹ Nos ta masha gradisidu ku nos ta forma parti di e paradeis spiritual! Awe, e paradeis ei ta mas bunita ku nunka, i nunka tabatin asina tantu hende ta forma parti di dje. Pues, laga nos semper ta gradisidu pa e paradeis spiritual ku Yehova a krea pa nos. Ken ku ke ta refreská, kontentu, kalmu i safe, mester drenta e paradeis spiritual i no bandon’é nunka. Pero tene masha kuidou! Satanas ta usa masha hopi triki pa saka nos for di e paradeis spiritual. (1 Ped. 5:8; Rev. 12:9) No lag’é logra su meta. P’esei, laga nos traha duru pa protehá e bunitesa, e puresa i e pas ku tin den e paradeis spiritual.