1-3. (a) Tempu ku Zakarías a kuminsá profetisá, den ki situashon e pueblo di Yehova tabata? (b) Dikon Yehova a pidi su pueblo pa ‘bolbe serka dje’?

UN RÒL ku ta bula, un hende muhé sintá den un makutu i dos hende muhé ku ala manera ala di oyevar ta zueif. Esakinan ta algun esena impaktante di e vishonnan ku tin den e buki di Zakarías. (Zak. 5:1, 7-9) Dikon Yehova a duna profeta Zakarías e vishonnan akí? Den ki situashon e israelitanan tabata e tempu ei? Kon e vishonnan akí ta benefisiá nos awe?

² Na aña 537 promé ku Kristu, e pueblo di Yehova tabata masha kontentu pasobra despues di 70 aña nan a ser librá di koutiverio na Babilonia. Na prinsipio, e israelitanan tabata ansioso pa restorá adorashon berdadero na Herúsalèm. Na aña 536 promé ku Kristu, nan a pone e fundeshi di e tèmpel. Na e tempu ei, e pueblo tabata asina kontentu ku nan “tabata grita duru, i te leu aya por a tende e zonido.” (Èsd. 3:10-13) Pero, no a dura mashá ku nan a haña oposishon. Debí na hopi  reto i difikultat, e pueblo a bira desanimá, a stòp ku e proyekto di konstruí e tèmpel i a bai traha riba nan kasnan i kultivá nan kunukunan. Anto 16 aña despues, ainda e tèmpel di Yehova no tabata kla. Yehova mester a kòrda su pueblo ku nan mester a pone é na promé lugá i no nan interesnan personal. E tabata ke pa nan bolbe serka dje i ador’é sin miedu i di henter nan kurason.

³ Na aña 520 promé ku Kristu, Dios a manda profeta Zakarías pa yuda e israelitanan kòrda dikon nan a ser librá for di Babilonia. Zakarías su nòmber mes kaba, ku ta nifiká “Yehova A Kòrda,” lo por a yuda nan kòrda un bèrdat importante: aunke e pueblo di Yehova a lubidá loke el a hasi pa nan, e sí no a lubidá nan. (Lesa Zakarías 1:3, 4.) Ku amor el a sigurá nan ku lo el a yuda nan restablesé adorashon puru, pero tambe el a spièrta nan ku lo e no tolerá adorashon ku no ta hasí ku un kurason kompleto. Laga nos wak kon Yehova a motivá nan na akshon pa medio di e di seis i di shete vishon di Zakarías. Ademas, laga nos wak kiko nos awe por siña for di e vishonnan akí.

4. Kiko Zakarías a mira den su di seis vishon, i dikon e ròl tabata skirbí na tur dos banda? (Wak number 1 di e promé plachi.)

⁴ Zakarías kapítulo 5 ta kuminsá ku un vishon ekstraordinario. (Lesa Zakarías 5:1, 2.) Den e di seis vishon, Zakarías a mira un ròl di 9 meter largu i 4,5 meter hanchu ta bula den laira. E ròl tabata habrí i skirbí na tur dos banda. Den dje tabatin un mensahe di huisio, kla pa ser lesá. (Zak. 5:3) Normalmente, un ròl tabata skirbí na un banda so, pues ta bisto ku e ròl akí tabata kontené un mensahe serio i di peso.

5, 6. Kiko Yehova ta pensa di hòrtamentu?

⁵ Lesa Zakarías 5:3, 4. Tur hende tin ku duna kuenta na Yehova, pero spesialmente e pueblo ku ta karga su nòmber. Hende ku ta stima Dios sa ku tur tipo di hòrtamentu lo “profaná [òf, “desonrá,” NW] e nòmber di [nan] Dios.” (Pro. 30:8, 9) Sea kual sea e motibu òf e sirkunstansia ku un hende ta aden, un hende ku ta hòrta ta pone deseonan egoista promé ku Dios, asina dunando demasiado balor na kosnan material. Un hende asina ta mira Yehova, Su nòmber i Su leinan komo ménos importante.

⁶ Ripará ku Zakarías 5:3 i 4 ta bisa ku “e maldishon . . . lo drenta kas di e ladron” i ku e maldishon “lo pasa nochi [òf, “keda,” NW] den e kas ei i kaba kuné.” Nada ni niun hende no por stroba Yehova su huisio desfaborabel. Yehova lo haña sa di kualke mal echo ku sosodé meimei di su pueblo. Asta si un hende logra skonde e akto di ladronisia pa polis, su doño di trabou, e ansianonan òf su mayornan, e no por skond’é pa Dios, kende ta sigurá nos ku lo e saka esaki na kla. (Heb. 4:13) P’esei ta un goso pa asosiá ku hende ku ta hasi nan esfuerso pa ta “onesto den tur kos.”—Heb. 13:18.

7. Kiko e vishon di e ròl ku ta bula ta siña nos?

⁷ Yehova ta odia tur tipo di hòrtamentu. Pa nos, ta un onor pa biba segun e normanan moral haltu di Yehova i hasi nos esfuerso pa mantené un kondukta ku no ta daña su nòmber. Si nos hasi asina, nos por skapa di Yehova su huisio kontra hende ku deliberadamente ta kibra su lei.

8-10. (a) Kiko ta un huramentu? (b) Ki huramentu Rei Sedekias a keda sin kumpli kuné?

⁸ Despues, e mensahe skirbí riba e ròl ku ta bula ta duna un spièrtamentu na  hende ‘ku ta hasi huramentu falsu den e nòmber di Dios.’ (Zak. 5:4) Un huramentu ta un deklarashon pa konfirmá ku algu ta bèrdat òf un promesa solèm den kua un hende ta primintí ku lo e hasi òf keda sin hasi algu.

⁹ Ta algu masha serio pa hasi un huramentu den e nòmber di Yehova. Anto esei ta nèt loke Sedekias, e último rei di Herúsalèm, a hasi. Rei Sedekias a hura den e nòmber di Yehova ku lo el a someté su mes na e rei di Babilonia. Ma, Sedekias no a tene su mes na su palabra; Beibel ta bisa ku ‘el a despresiá su huramentu i a kibra su aliansa.’ Komo resultado, Dios a bisa ku lo el a muri na Babilonia.—Eze. 17:16.

¹⁰ Rei Sedekias mester a kumpli ku e huramentu ku el a hasi den e nòmber di Dios, manera Yehova a ferwagt di dje. (2 Kró. 36:13) En bes di esei, Sedekias a bai buska yudansa serka Egipto pa e por a libra for di e gara di Babilonia. E plan ei a frakasá barbaramente.—Eze. 17:11-15, 17, 18.

11, 12. (a) Kiko ta e promesa di mas importante ku nos por hasi? (b) Den ki maneranan nos promesa di dedikashon mester tin un efekto riba nos bida di tur dia?

¹¹ Yehova ta tende e promesanan ku nos tambe ta hasi. Nan ta algu masha serio p’e, i pa nos por haña su aprobashon, nos mester kumpli ku nan. (Sal. 76:11) Di tur e promesanan ku nos ta hasi, esun di mas importante ta nos dedikashon na Yehova. Un dedikashon ta un promesa solèm pa sirbi Yehova sin pone ningun kondishon.

¹² Kon nos por kumpli ku nos promesa di dedikashon? Nos ta demostrá ku nos ta tuma na serio nos promesa di alabá Yehova “dia tras dia” ora nos ta para firme bou di tantu pruebanan chikitu komo grandi. (Sal. 61:8) Por ehèmpel,  ora un kolega di trabou òf kompañero di skol flirt ku nos, nos ta mira esei komo un oportunidat pa nos “tin delisia den [Yehova su] kamindanan” i ta rechasá e atenshon ku e ta mustra nos? (Pro. 23:26) Si nos famia no ta Testigu, nos ta pidi Yehova yuda nos mantené nos personalidat kristian asta ora niun hende rònt di nos ta hasi esfuerso pa hasi esei? Nos ta hasi orashon tur dia na nos Tata den shelu ku ta stima nos i ta yam’é danki ku e ta stima i guia nos? Nos ta saka tempu pa lesa Beibel tur dia? Nos a primintí ku nos lo kumpli ku tur e kosnan akí, no ta bèrdat? Pues nos mester obedesé i kumpli ku nan. Nos adorashon di kurason ta demostrá ku nos ta stima Yehova i ku di bèrdat nos ta dediká na dje. Nos adorashon ta un forma di biba, e no ta djis un formalidat. Ora nos ta kumpli ku nos promesa, esei ta bon pa nos mes; nos fieldat ta hiba na un futuro briante.—Deu. 10:12, 13.

13. Kiko nos ta siña for di e di seis vishon di Zakarías?

¹³ E di seis vishon di Zakarías a yuda nos mira ku hende ku ta stima Yehova no mester partisipá den niun tipo di hòrtamentu ni hasi huramentu falsu. Tambe nos a mira ku apesar ku e israelitanan a peka, Yehova no a mira nan komo un kaso pèrdí. El a komprondé e difikultatnan ku nan tabata enfrentá ora nan tabata rondoná pa enemigu. Yehova a pone un ehèmpel pa nos ora el a kumpli ku su promesanan, i lo e yuda nos kumpli ku e promesanan ku nos ta hasi. Un manera ku Yehova ta yuda nos ta di duna nos e speransa ku pronto lo e pone un fin na maldat riba henter tera. Anto e siguiente vishon di Zakarías ta sigurá nos di esaki.

14, 15. (a) Kiko Zakarías a mira den e di shete vishon? (Wak number 2 di e promé plachi.) (b) Kiko e hende muhé den e makutu ta representá, i dikon e tabata será den e makutu?

¹⁴ Despues ku Zakarías a mira e ròl ku ta bula, un angel a bis’é p’e hisa su kara i “wak” ariba. Kiko e di shete vishon lo a revelá? Awor el a mira un makutu di midi sali bai. (Lesa Zakarías 5:5-8.) E makutu akí tabatin un “tapa di chumbu” riba dje. Ora a kita e tapa, Zakarías a mira “un muhé sintá den e makutu.” E angel a splika ku e hende muhé den e makutu ta “Maldat.” Imaginá bo kon spantá Zakarías lo tabata ora el a mira e hende muhé ei ta purba di sali for di e makutu. Ma e angel a tuma akshon mesora i a hink’é aden bèk i a ser’é ku e tapa pisá di chumbu. Kiko esaki ta nifiká?

¹⁵ E parti akí di e vishon ta resaltá e echo ku Yehova lo no tolerá niun sorto di maldat den su pueblo. Lo e sòru pa e tuma akshon mesora kontra dje. (1 Kor. 5:13) E angel ta sigurá nos di esei ora el a sera e makutu bèk ku e tapa di chumbu.

16. (a) Kiko a pasa ku e makutu? (Wak number 3 di e promé plachi.) (b) Unda e hende muhénan ku ala a hiba e makutu?

¹⁶ Despues, den e mesun vishon, Zakarías a mira dos hende muhé ku tabatin alanan fuerte manera di oyevar. (Lesa Zakarías 5:9-11.) Ki diferente e dos hende muhénan akí tabata kompará ku e hende muhé den e makutu. E dos hende muhénan ei a usa nan alanan fuerte pa hisa e makutu ku “Maldat” aden. Na unda nan a bai hib’é? Nan a hib’é na “tera di Sinar,” òf Babilonia. Pero dikon nan a hiba e makutu Babilonia?

17, 18. (a) Dikon Babilonia tabata e debido lugá pa hiba “Maldat”? (b) Kiko mester ta nos determinashon relashoná ku maldat?

 ¹⁷ Pa e israelitanan ku tabata biba den tempu di Zakarías, Babilonia lo tabata e debido lugá pa hiba Maldat. Zakarías i e hudiunan por a bisa ku den nan tempu maldat tabata reina na e stat di Babilonia. Komo ku nan a lanta den e stat ei kaminda tabatin inmoralidat i adorashon di dios falsu, nan mester a lucha tur dia pa resistí influensia pagano. E vishon akí sigur lo a trese un alivio pa nan; e tabata un garantia ku Yehova lo a mantené adorashon berdadero limpi.

¹⁸ Ademas, e vishon a rekordá e israelitanan ku nan tabatin e responsabilidat di tene nan adorashon na Dios puru. P’esei nos no mester permití pa maldat slùip drenta i keda den Yehova su pueblo. Despues ku Yehova a trese nos na su organisashon limpi kaminda nos ta sinti su amor i protekshon, nos tin e responsabilidat di ten’é limpi. Nos ta sinti nos motivá pa tene e organisashon limpi? Den nos paradeis spiritual no tin lugá pa niun sorto di maldat.

19. Kiko nos por siña for di e vishonnan impaktante di Zakarías?

¹⁹ E di seis i di shete vishon di Zakarías ta un spièrtamentu pa hende ku ta sigui hasi loke ta robes; nan mester kòrda ku Yehova no ta tolerá mal echo. Su sirbidónan ku ta sirbié di henter nan kurason mester odia maldat. Ademas, e vishonnan akí ta sigurá nos ku nos Tata den shelu ta stima nos. Si nos ta hasi nos esfuerso pa ta e tipo di hende ku tin Dios su aprobashon i protekshon, nos lo no haña maldishon. Mas bien, Yehova lo ta masha kontentu pa bendishoná nos. I ta bale la pena pa nos lucha pa keda limpi den un mundu yen di maldat. Anto nos por ta sigur ku nos lo logra ku yudansa di Yehova. Pero kon nos por tin sigur ku adorashon berdadero lo sigui eksistí den e mundu akí ku ta yen di maldat? Ki garantia nos tin ku Yehova lo protehá su organisashon segun ku e tribulashon grandi ta aserká? Nos lo analisá e preguntanan akí den e siguiente artíkulo.