“TEMPU KU MI TABATA CHIKITU, MI TABATIN KUSTUMBER DI TENDE HOPI INSULTO I GRITAMENTU NA KAS,” un señora ku yama Patricia a bisa. El a agregá: “Nunka mi no a siña pordoná. I ora mi a bira grandi, si un hende hùrt mi, mi tabata keda pensa riba loke e hende a hasi pa hopi dia, i komo konsekuensia mi no por a drumi.” En bèrdat, rabia i renkor no ta hasi nos felis tampoko nan no ta bon pa nos salú. I segun investigadónan, hende ku no ta pordoná . . .

• Ta laga rabia i renkor daña nan amistat ku otro hende, i esei por pone nan sinti nan mes solitario i bandoná

• Ta ser ofendé lihé, ta sufri di ansiedat òf asta di depreshon grave

• Ta enfoká asina hopi riba un ofensa ku nan no ta disfrutá di bida

• Ta sinti nan kulpabel pasobra nan no ta sigui e norma- i balornan ku nan tin

• Ta haña mas strès i tin mas chèns di haña preshon haltu, malesa di kurason i otro malesa doloroso, manera artrítis i migrèn *

KIKO KE MEN PORDONÁ? Pordoná ke men no keda rabiá, karga renkor ni kana rònt ku gana di tuma vengansa kontra e hende ku a ofendé nos. Pero pordoná no ta nifiká ku nos ta aprobá di un mal echo òf hasi komo si fuera ku ta algu chikitu òf ku nada no a pasa. Mas bien, esei ta un desishon personal bon pensá ku ta mustra ku e persona tin un deseo sinsero pa mantené pas, forma un bon relashon ku e hende i mantené esei.

Un hende ku ta pordoná ta mustra tambe ku e ta hinka su mes den sapatu di otro hende pasobra e ta komprondé ku nos tur ta faya den loke nos ta bisa òf hasi. (Romanonan 3:23) Beibel ta rekonosé esei, bisando: “Sigui soportá otro i pordoná otro libremente, asta si un di boso tin motibu pa keha un otro.”—Kolosensenan 3:13.

Ta bisto anto ku pordoná ta un manera importante ku nos ta mustra amor, ku ta “e laso perfekto di union.” (Kolosensenan 3:14) Segun e website Mayo Clinic, e benefisio di pordoná . . .

•   Ta ku bo tin un mihó relashon ku otro hende pasobra bo tin komprondementu, kompashon i ta hinka bo mes den sapatu di e hende ku a ofendé bo

• Ta ku bo estado mental ta mehorá i bo ta sinti ku bo ta na pas ku Dios

• Ta ku bo ta sinti ménos ansiedat, strès i ta ménos agresivo

• Ta ku lo bo tin ménos síntoma di depreshon

PORDONÁ BO MES. E revista Disability & Rehabilitation ta bisa ku pordoná bo mes “ta sumamente importante pa bo por tin un bon salú,” tantu físikamente komo mentalmente. Sinembargo, e revista a rekonosé sí ku “esei por ta hopi difísil pa logra.” Kiko por yuda bo pordoná bo mes?

• No spera perfekshon di bo mes. Sea realístiko i rekonosé ku abo, meskos ku tur otro hende, ta hasi fout.—Eklesiástes 7:20

• Siña di bo foutnan; e ora ei tin ménos chèns ku lo bo bolbe hasi e mesun fout.

• Tene pasenshi ku bo mes; tin algun defekto i mal kustumber ku no ta kita mesora. —Efesionan 4:23, 24

• Buska amigu ku ta positivo, bondadoso i ku ta animá bo, pero ku lo ta sinsero ku bo tambe.—Proverbionan 13:20

• Si bo hùrt un hende, rekonosé bo eror i pidi pordon mesora. Ora bo hasi pas ku hende, lo bo haña pas mental.—Mateo 5:23, 24

Patricia, kende nos a menshoná anteriormente, a siña pordoná despues ku el a studia Beibel. El a bisa: “Mi a libra for di e rabia ku tabata venená mi. Mi no ta sufri mas ni mi no ta pone otro hende sufri. Prinsipionan di Beibel ta sigurá nos ku Dios ta stima nos i ku e ke lo mihó pa nos.”

Un mener ku yama Ron tambe a haña pas mental ora el a apliká prinsipio di Beibel. El a bisa: “Mi no por kontrolá loke otro hende ta bisa òf hasi, pero loke ami ta bisa òf hasi sí mi por kontrolá. Si mi ke tin pas, mi no mester karga renkor.”