Empatia ta e kapasidat di pone bo mes den sapatu di otro hende i komprondé su sintimentu- i pensamentunan. Dr. Rick Hanson, un eksperto riba tereno di salú mental, a bisa ku “empatia ta den nos sanger.”

ALGU PA PENSA ARIBA: Dikon nos sí por mustra empatia pero un bestia nò? Beibel ta splika ku Dios a krea hende den su imágen. (Génesis 1:26) Esei ke men ku te na sierto grado nos por imitá su bunita kualidatnan. Pues, ora un hende ta sintié konmoví pa yuda un otro hende, e ta reflehá e empatia di su Kreador kompasivo, Yehova Dios.—Proverbionan 14:31.

Dios tin empatia pa nos i e no ta gusta niun tiki pa mira nos sufri. Tokante e periodo di sklabitut kruel ku e israelitanan a pasa aden na Egipto i di e 40 añanan largu ku nan a pasa den desierto, Beibel ta bisa: “Den tur nan aflikshon e tabata afligí.” (Isaías 63:9) Tuma nota ku Dios no solamente tabata sa ku su pueblo tabata sufri, sino el a sinti nan doló tambe. El a bisa: “Mi ta konsiente di nan sufrimentunan.” (Éksodo 3:7) Tambe el a bisa: “Esun ku mishi ku boso ta mishi ku [mi] pret’i wowo.” (Zakarías 2:8) Pues, ora otro hende hasi nos daño, ta komo si fuera nan ta hasi é daño.

Beibel ta sigurá nos ku maske nos ta sinti ku nos no meresé Dios su kompashon, “Dios ta mas grandi ku nos kurason i sa tur kos.” (1 Huan 3:19, 20) Dios konosé nos mas mihó ku nos konosé nos mes. E sa bon kiko nos ta pasa aden, kiko nos ta pensa i ta sinti, anto e ta komprondé pa nos.

 Beibel ta sigurá nos:

• “Lo bo yama, i SEÑOR lo kontestá; lo bo sklama, i e lo bisa: ‘At’ami akí.’”—ISAÍAS 58:9.

• “‘Pasobra mi sa e plannan ku mi tin pa boso,’ SEÑOR ta deklará, ‘plannan pa pas i no pa kalamidat, pa duna boso un futuro i un speransa. Anto boso lo sklama na mi i bin hasi orashon na mi, i lo mi skucha boso.’”—YEREMÍAS 29:11, 12.

• “Pone mi lágrimanan den bo butishi; nan no ta den bo buki?”—SALMO 56:8.

Si bo sa ku Dios ta komprondé bo, esei lo yuda bo enfrentá problema ku éksito? Ban wak e kaso di Maria:

“Mira mi yu hòmber lucha dos aña kontra kanser i pèrdè e bataya ora e tabatin 18 aña tabata algu sumamente doloroso. Mi tabata sinti ku bida ta inhustu i kruel. Mi tabata rabiá ku Yehova no a intervení!

Mi tabata sinti ku Yehova no ta stima mi. Pero seis aña despues, un amiga hopi amoroso i kompasivo den kongregashon a laga mi deshogá mi mes. Despues di skucha mi pa oranan largu sin interumpí mi, el a sita 1 Huan 3:19 i 20. E teksto di Beibel akí a konmové mi. E ta bisa ku ‘Dios ta mas grandi ku nos kurason i sa tur kos.’ I el a splika mi ku Yehova ta komprondé kiko nos ta pasa aden.

Ma tòg, mi a keda rabiá. Pero dado momento, mi a lesa Salmo 94:19 ku ta bisa: ‘Den e multitut di mi preokupashonnan den mi, bo konsuelonan ta alegrá mi alma.’ Mi a sinti ku e teksto ei tabata nèt loke mi tabatin mester! Por fin, mi por a papia ku Yehova tokante mi sufrimentu pasobra mi tabatin konfiansa ku e ta skucha mi i komprondé mi. Esei a duna mi pas.”

Esta un konsuelo pa sa ku Yehova ta komprondé nos i ta sinti pa nos! Pero dikon tin asina tantu sufrimentu anto? Akaso ta pasobra Dios ta kastigá nos pa e pikánan ku nos a hasi? Dios lo kaba ku tur sufrimentu? Nos lo haña kontesta riba e preguntanan akí den e siguiente artíkulonan.