Nos Por Tin un Fe Sólido Ku e Reino Lo Kumpli ku e Propósito di Dios
“Fe ta e konfiansa firme ku hende tin ku loke nan ta spera ariba lo keda realisá.”—HEB. 11:1.
1, 2. (a) Kiko por duna nos pleno konfiansa ku e Reino lo kumpli ku Dios su propósito pa humanidat? (b) Segun Efesionan 2:12, kon e paktonan ta fortalesé nos? (Wak e promé plachi.)
KOMO Testigunan di Yehova, nos ta proklamá ku e Reino di Dios ta e úniko solushon pa tur nos problemanan i nos ta kla pa mustra hende kon Beibel ta yuda nos komprondé esaki. I e speransa ku e Reino ta duna ta un gran konsuelo pa nos. Pero, nos ta realmente konvensí ku e Reino ta eksistí i ku Dios lo kumpli ku su propósito pa medio di dje? Dikon nos por tin un fe sólido den e Reino?—Heb. 11:1.
2 Ta Yehova, e Dios Todopoderoso, a establesé e Reino Mesiániko komo e medio pa e kumpli ku su propósito pa humanidat. I komo ku Yehova ta esun ku tin derecho apsoluto di goberná, e Reino ei lo dura pa semper. Awor, ken ta e Rei di e Reino akí? Ken lo goberná huntu kuné? I riba kiko nan lo goberná? Wèl, Yehova a regla tur e asuntunan importante akí pa medio di vários pakto. E paktonan akí ta kontraktnan, òf akuerdonan, legal ku Yehova òf su Yu Hesukristu a sera ku algun adoradó di Dios. Un análisis di e paktonan akí lo yuda nos komprondé mihó kon Yehova su propósito lo kumpli i dikon nos por tin konfiansa ku e Reino lo logra esaki.—Lesa Efesionan 2:12.
3. Kiko nos lo analisá den e artíkulo akí i den esun siguiente?
3 Beibel ta papia di seis pakto prinsipal ku tin di haber ku e Reino Mesiániko ku Hesukristu komo Rei. Nan ta (1) e pakto abrahámiko, (2) e pakto di Lei, (3) e pakto ku Dios a sera ku David, (4) e pakto pa un saserdote manera Melkísedèk, (5) e pakto nobo i (6) e pakto di Reino. Laga nos analisá e paktonan akí i wak ki relashon kada un tin ku e Reino di Dios i ki papel nan tin den kumplimentu di Dios su propósito pa ku tera i humanidat.—Wak e kuadro “ E Manera Ku Dios Lo Kumpli ku Su Propósito.”
UN PROMESA KU TA REVELÁ KON DIOS LO KUMPLI KU SU PROPÓSITO
4. Segun e buki di Génesis, kiko Yehova a dekretá relashoná ku hende?
4 Despues ku Yehova a prepará nos bunita planeta pa hende biba riba dje, el a dekretá tres kos relashoná ku hende: (1) Lo el a krea hende segun su imágen. (2) Hende mester a hasi henter e tera akí un paradeis, haña yu i yena tera. (3) Hende no tabatin mag di a kome di e palu di konosementu di bon i malu. (Gén. 1:26, 28; 2:16, 17) Kumplimentu di e tres dekretonan akí tabata tur loke tabata nesesario pa Dios su propósito pa ku hende i tera kumpli. Awor, si esei so tabata nesesario, dikon Yehova mester a sera vários pakto ku hende?
5, 6. (a) Kon Satanas a purba di stroba Dios su propósito di kumpli? (b) Kon Yehova a trata ku e rebelion ku a tuma lugá den Edén?
5 Den un intento malisioso pa stroba Dios su propósito di kumpli, Satanas e Diabel a start un rebelion. El a enfoká su atenshon riba e dekreto ku tabata mas fásil p’e stroba su kumplimentu, esta, esun ku a eksigí pa hende ta obediente. Sí, Satanas a persuadí e promé hende muhé, Eva, pa e kome di e palu di konosementu di bon i malu. (Gén. 3:1-5; Rev. 12:9) Hasiendo esei, Satanas a lanta duda enkuanto Dios su derecho di goberná Su kreashon. I mas despues, Satanas a akusá hende di ta adorá Dios pa motibunan egoista.—Yòb 1:9-11; 2:4, 5.
6 Kon Yehova a trata ku e rebelion ku a tuma lugá den Hòfi di Edén? E por a djis destruí e rebeldenan mesora. Pero esei lo a nifiká ku su propósito pa yena e tera ku desendientenan di Adam ku Eva lo no a kumpli. P’esei, Yehova no a destruí e rebeldenan mesora; mas bien, el a proklamá un profesia sumamente importante—e promesa ku el a hasi den Hòfi di Edén—ku a sirbi komo un garantia ku su propósito relashoná ku hende i nos planeta Tera lo kumpli sigur.—Lesa Génesis 3:15.
7. Ki garantia relashoná ku e kolebra i su simia e promesa ku Dios a hasi den Hòfi di Edén ta duna nos?
7 Pa medio di e promesa ku Yehova a hasi den Hòfi di Edén, el a dikta sentensia kontra e kolebra, Satanas e Diabel, i kontra su simia—esta, tur persona ku ta skohe e banda di Satanas den e kuestion tokante Dios su derecho di goberná. E Dios berdadero a duna e simia, òf desendiente, di “e muhé” outoridat pa destruí Satanas. Pues, e promesa ku Dios a hasi den Edén no solamente ta duna garantia ku Dios lo eliminá esun ku a start e rebelion den Hòfi di Edén sino ku Dios lo eliminá tambe tur e mal konsekuensianan ku e rebelion ei a trese kuné. E promesa ta indiká tambe kon Dios lo hasi esei.
8. Kiko nos por bisa di e identidat di e muhé i di su simia?
8 Ken lo a bira e desendiente di e muhé? Wèl, siendo ku e desendiente akí mester machiká kabes di e kolebra, esta, “kaba ku” Satanas e Diabel, kende ta un spiritu malbado, e desendiente di e muhé akí mester ta un spiritu invisibel. (Heb. 2:14) I esaki, na su turno, ta nifiká ku e muhé, ku lo duna lus na e desendiente, tambe lo mester ta invisibel. Miéntras ku e simia di e kolebra tabata multipliká rápidamente, e identidat di e muhé i di su simia sí a keda un misterio pa kasi 4.000 aña desde ku Yehova a hasi e promesa ei den Hòfi di Edén. Durante e añanan ei, Yehova a sera vários pakto ku a revelá identidat di e simia, òf desendiente, di e muhé i e medio ku lo E usa pa eliminá tur daño ku Satanas a kousa humanidat.
UN PAKTO KU TA IDENTIFIKÁ E SIMIA
9. Kiko e pakto abrahámiko ta enserá, i na ki tempu el a drenta na vigor?
9 Un dos mil aña despues ku Yehova a dikta sentensia kontra Satanas, el a duna Abraham e mandato pa bandoná su kas na Ur, Mesopotamia, i bai biba na Kanan. (Echo. 7:2, 3) Yehova a bisa Abraham: “Sali for di bo tera, i for di bo famianan i for di kas di bo tata, bai na e tera ku lo mi mustra bo; i lo mi hasi bo un nashon grandi, i lo mi bendishoná bo, i hasi bo nòmber grandi; i lo bo ta un bendishon. I lo mi bendishoná esnan ku bendishoná bo, i esun ku maldishoná bo lo mi maldishoná. I den bo tur e famianan di mundu lo ta bendishoná.” (Gén. 12:1-3) E promesa akí ku Yehova a hasi na Abraham ta ser yamá e pakto abrahámiko. Nos no sa eksaktamente na ki tempu Yehova a sera e pakto akí ku Abraham. Loke sí nos sa ta ku e pakto akí a drenta na vigor na aña 1943 promé ku Kristu, tempu ku Abraham a bandoná Haran i krusa Riu Eufrates; e tempu ei, e tabatin 75 aña di edat.
10. (a) Kon Abraham a demostrá un fe fuerte den Dios su promesanan? (b) Ki detayenan Yehova a revelá gradualmente tokante e simia di e muhé?
10 Na vários okashon, Yehova a ripití e promesa ku el a hasi na Abraham, i kada bes el a agregá mas detaye na dje. (Gén. 13:15-17; 17:1-8, 16) I ora Abraham tabata dispuesto pa sakrifiká su úniko yu hòmber, demostrando asina un fe fuerte den Dios su promesanan, Yehova a bolbe sigur’é ku e promesa ku el a hasi na dje lo kumpli sigur. (Lesa Génesis 22:15-18 *; Hebreonan 11:17, 18.) Despues ku e pakto abrahámiko a drenta na vigor, gradualmente Yehova a revelá detayenan importante tokante e simia, òf desendiente, di e muhé. El a revelá ku e simia lo ta desendiente di Abraham, ku lo e konsistí di hopi hende, ku e simia lo sirbi komo rei, ku lo e destruí tur e enemigunan di Dios i ku lo e trese hopi bendishon pa humanidat.
Abraham tabatin un fe fuerte den Dios su promesanan (Wak paragraf 10)
11, 12. Kon Beibel ta mustra ku e pakto abrahámiko tin un kumplimentu mayor, i kiko esei ta nifiká pa nos?
11 E promesanan di e pakto abrahámiko a kumpli literalmente ora e desendientenan di Abraham a heredá e Tera Primintí. Pero Beibel ta mustra ku e promesanan akí tin un kumplimentu mayor tambe. (Gal. 4:22-25) Apòstel Pablo a splika ku e parti prinsipal di Abraham su simia, òf desendiente, ta Kristu i ku e parti sekundario, òf adishonal, ta referí na e 144.000 kristiannan ungí. (Gal. 3:16, 29; Rev. 5:9, 10; 14:1, 4) E muhé ku ta produsí e desendiente akí ta “Herúsalèm djariba”—e parti selestial di Dios su organisashon—ku ta konsistí di angel fiel. (Gal. 4:26, 31) I manera e pakto abrahámiko a primintí, e desendiente di e muhé lo trese hopi bendishon pa humanidat.
12 E pakto abrahámiko ta un garantia ku e Reino di Dios lo bira realidat i ta habri kaminda pa e Rei i su ko-gobernantenan heredá e Reino selestial. (Heb. 6:13-18) Pa kuantu tempu e pakto akí lo keda na vigor? Wèl, Génesis 17:7 ta bisa ku e ta “un aliansa eterno.” Lo e keda na vigor te ora ku e Reino kaba ku tur e enemigunan di Dios i tur famia riba tera ser bendishoná. (1 Kor. 15:23-26) Pero e bendishonnan ku e pakto akí ta trese kuné sí ta pa semper. E pakto ku Yehova a sera ku Abraham ta duna prueba konvinsente ku E ta determiná pa kumpli ku su propósito pa “yena e tera” ku hende hustu.—Gén. 1:28.
UN PAKTO KU TA GARANTISÁ KU E REINO LO DURA PA SEMPER
13, 14. Ki garantia enkuanto e gobernashon di e Mesías e pakto ku Dios a sera ku David ta duna nos?
13 E promesa ku Yehova a hasi den Hòfi di Edén i e pakto ku el a sera ku Abraham ta mustra ku Yehova su gobernashon semper ta basá riba su normanan hustu. Pues, e Reino Mesiániko tambe ta basá riba su normanan hustu. (Sal. 89:14) Awor, lo yega un dia ku e Reino Mesiániko lo bira korupto i ku lo e mester ser remplasá? Wèl, tin un otro pakto ku ta garantisá nos ku esei lo no sosodé nunka.
14 Esaki ta e pakto ku Yehova a sera ku David. (Lesa 2 Samuel 7:12, 16.) El a hasi esei durante David su reinado na Herúsalèm. El a primintí Rei David ku e Mesías lo a bini di su liña di desendensia. (Luk. 1:30-33) Di e manera ei, Yehova a duna informashon mas spesífiko enkuanto e liña di desendensia di e Mesías i a bisa ku ta un desendiente di David lo tin e “derecho” legal pa sinta riba e trono di e Reino Mesiániko. (Eze. 21:25-27) Ta pa medio di Hesus, e desendiente di David, e reinado di David lo dura “pa semper.” Dikon? Pasobra Hesus i su trono lo permanesé pa semper, meskos ku solo. (Sal. 89:34-37) Pues, nos por tin e konfiansa ku e gobernashon di e Mesías nunka lo bira korupto i ku e bendishonnan ku e gobernashon akí lo trese lo dura pa semper!
UN PAKTO PA UN SASERDOTE
15-17. Segun e pakto pa un saserdote manera Melkísedèk, ki funshon mas e desendiente di e muhé lo ehersé, i dikon?
15 Tantu e pakto ku Dios a sera ku Abraham komo esun ku el a sera ku David ta sigurá nos ku e desendiente di e muhé lo goberná komo rei. Pero pa humanidat por benefisiá plenamente di e bendishonnan ku e Reino lo trese kuné, e desendiente di e muhé no por tin solamente e funshon di rei. E mester sirbi tambe komo saserdote. Dikon? Pasobra pa humanidat por ser librá di piká i bira parti di Yehova su famia universal, nan mester di un saserdote pa hasi sakrifisio pa nan. P’esei, nos Kreador a sera un otro pakto ku ta garantisá esei, e pakto pa un saserdote manera Melkísedèk.
16 Mediante Rei David, Yehova a revelá ku lo el a sera un pakto personalmente ku Hesus. E pakto akí lo a enserá dos kos. Promé: Hesus lo a ‘sinta na man drechi’ di Dios te ora e tempu yega pa e ‘goberná meimei di su enemigunan.’ Di dos: Hesus lo a sirbi komo “saserdote pa semper, segun e òrdu di Melkísedèk.” (Lesa Salmo 110:1, 2, 4.) Dikon “segun e òrdu di Melkísedèk”? Wèl, hopi tempu promé ku e desendientenan di Abraham a konkistá e Tera Primintí, Melkísedèk, kende tabata rei di Salèm, tabata sirbi komo “saserdote di e Dios Haltísimo.” (Heb. 7:1-3) Ta Yehova mes a nombr’é komo rei i saserdote i e tabata e úniko persona menshoná den e Skritura Hebreo ku a sirbi komo tal. I komo ku nunka a eksistí un otro persona ku a sirbi komo rei i saserdote a la bes, Beibel ta yama Melkísedèk “saserdote pa semper.”
17 Pa medio di e pakto akí, Yehova a nombra Hesus direktamente pa sirbi komo saserdote. I Hesus lo ta “un saserdote pa semper na e manera di Melkísedèk.” (Heb. 5:4-6) Esaki ta mustra klaramente ku Yehova a komprometé su mes ku lo e usa e Reino Mesiániko pa kumpli ku su propósito relashoná ku tera i humanidat.
E REINO TA FUNDÁ RIBA PAKTO
18, 19. (a) Kon e paktonan ku nos a analisá den e artíkulo akí ta relashoná ku e Reino? (b) Kiko nos lo trata den e siguiente artíkulo?
18 Den e artíkulo akí, nos a analisá algun pakto i a mira kon esakinan ta relashoná ku e Reino Mesiániko i kon e Reino ta firmemente basá riba akuerdonan legal. Por ehèmpel, e promesa ku Dios a hasi den Hòfi di Edén ta garantisá nos ku Yehova lo usa e simia, òf desendiente, di e muhé pa realisá su propósito pa ku tera i humanidat. E pakto ku Dios a sera ku Abraham ta splika ken ta e desendiente ei i ki papel e ta hunga.
19 E pakto ku Dios a sera ku David ta duna mas detaye tokante e liña di desendensia di e simia di e muhé. E pakto ei ta mustra tambe ku Hesus tin tur derecho pa goberná mundu pa semper i ku e bendishonnan ku e Reino lo trese lo dura pa semper. E pakto pa un saserdote manera Melkísedèk ta duna nos e garantia ku e simia, òf desendiente, lo sirbi tambe komo saserdote. Pero no ta Hesus so lo yuda humanidat alkansá perfekshon. Dios a ungi mas persona pa sirbi komo rei i saserdote. Di unda e personanan akí ta bini? E siguiente artíkulo lo kontestá e pregunta akí.
^ par. 10 Génesis 22:15-18 (NW): “I e angel di Yehova a prosedé di yama pa segundo bes na Abraham for di shelu i a bisa: ‘Pa mi mes di bèrdat mi ta hura,’ ta e ekspreshon di Yehova, ‘ku pa motibu dje echo ku bo a hasi e kos akí i ku bo no a retené bo yu, bo úniko, siguramente lo mi bendishoná bo i lo mi siguramente multipliká bo simia manera e streanan di shelu i manera e pipitanan di santu ku ta na oriya di laman; i bo simia lo tuma poseshon dje porta di su enemigunan. I pa medio di bo simia tur nashon di tera sigur lo bendishoná nan mes debí n’e echo ku bo a skucha mi bos.’”
