E konsehonan ku Beibel ta duna tokante kon nos por logra un matrimonio felis ta duna resultado, pasobra nan ta bini di Esun ku a originá matrimonio, esta, Yehova Dios. Su Palabra ta animá nos pa desaroyá kualidatnan ku por hasi nos matrimonio felis i ta spièrta nos pa evitá e aktitutnan ku por kaba ku nos matrimonio. Tambe e ta siña nos kon pa komuniká mihó ku nos kasá, lokual ta oumentá felisidat den matrimonio.—Lesa Kolosensenan 3:8-10, 12-14.

Esposo i esposa mester respetá otro. Ora tur dos ta kumpli ku e papel ku Dios a duna nan den matrimonio, nan por ta felis.—Lesa Kolosensenan 3:18, 19.

Si un pareha kasá ta stima otro, nan union lo dura. Dios ta siña nos kon pa stima. Tantu é komo su yu, Hesus, a pone un ehèmpel perfekto pa nos den mustra amor di sakrifisio propio.—Lesa 1 Huan 4:7, 8, 19.

Ora esposo i esposa ta respetá nan matrimonio komo un areglo di Dios, nan lo keda huntu. Dios a krea matrimonio komo un union permanente entre un hòmber i un muhé pa asina e famia por ta protehá. Matrimonio por dura pasobra Dios a krea hòmber i muhé pa komplementá otro tantu den sentido físiko komo emoshonal. Ademas, el a krea nan den su imágen, pues ku e kapasidat di por imitá su amor.—Lesa Génesis 1:27; 2:18, 24.